أرجو ايضاح العيوب دى واساسها من الصحة فى النيو سيراتو

**Beeso** · 11-11-2009 08:54 AM

ياجماعة بجد العربية ده فعلن بيتشنع عليها بطريقة غريبة فعلن أنا معايا العربية من تلت أسابيع تقريباً ومبسوط بها جداً في معدة حاجتين بس وحدة إلي في ناس لحظتها وهيي
١-سخونة من جمب الكونسل من ماسورة السخن وده مش ملحوظة طول الوقت وكماً بتختفي مع التكييف نهائي
٢الحدف البسيطة إلي في عربتي إلي مش عرفلهة سبب وساعات تحصل أو لأ ونة عمل post على الموضوع دة وهو ممكن يكون فال-SX بس الله أعلم بس هو مش مشكلة خالص عشان أكن صرح معك عشان إنت بتحسها بس لم تسب الدركسيون يعني إنت أصلاً مش محتاج تسيبه ونة ماشالله جربت العربية على الطريق ونة بروح دائري كل يوم على ١٦٠ وملفات وجري مشألة جميلة ربنا يستر علينا جميعاً من الدائري
يعني من الاخر الموضوع دة مش مسبايب أي مشاكل في ثبات العربية
بنسبة لموضوع الاذذ إلي ورى دة بصراحة ضحك أوي بصراحة لئن مش مسببلي أي مشكلة بس هو فعلن مساحة الرؤية أصغر سنة بسيطة
أما إستهلك البنزين فأنا عمل بالعربية 1700km وبيثيئلي الواحد لسة بدري شوية على مايحكم عليها بس هو مش عال ولا واطي وحسب سوأتك
العفشة باءة أنا مبسوط بها بس هي ناشفة سنة وبتحسهة لو في بلاعة فالطريق انما غير كدة كلو تمام ونة مبسوط بها برد ماشالله
أرجو أكون افداك

**OilMan** · 11-11-2009 09:04 AM

متهيالى ممكن نستنى شويه عليها لحد 20 الف كيلو مثلا ونشوف مدى مصداقيتها ونجاحها ويا ريت بقى نفكنا من قصة اليابانى والكورى ديه لانها ماسخه اوى وبقت دمها تقيل ومالهاش محل من الاعراب

**yasso79** · 11-11-2009 10:16 AM

بيسو باشا , جميل جدا اللى انت قولتو داه و ربنا يباركلك فى العربيه و يحفظهالك
اما عمنا اويل مان فعنده حق بجد فى موضوع نستنا عليها شويه بس المشكلة انى حجزت خلاص يا رجالة
عموما بجد تسلم افادتكم جميعا يارب

**Beeso** · 11-11-2009 10:41 AM

طبعاً كل حاجة حتبان مع الوقت ونشالله كل خير
شكراً يا yasoo

**wookiee** · 11-11-2009 08:03 PM

1- العافشة ناشفة جدا
حاجة بسيطة جدا وأنا مبسوط منها جدا أحسنا من عربيات تانية كتير

2- استهلاك البنزين عالى شويه
خالص...بالعكس يصدق أنا حاسس إنها بتوفر !! من غير تشغيل التكيف

3- الزجاج الخلفى مش بيكشف الطريق علشان عالى و صغير حكون أمين برده , صح هو صغير حاجة بسيطة بس برده أنا عارف أسوء وكل حاجة يعني مش مضايق قوي كده وأنا بسوء في حتت زحمة جدا ....ربنا يستر ...

- الخامات فى التابلوه مضروبه
4
أنا عن نفسي شايف إن في الفئة السعرية دي مفيش حاجة أحسن في الخامات كله بلاستيك من ماكسي جلد ..عدي جدا ...وعلى فكرة الخامات حلوة وال تابلووه معقول جدا .

اللون الاحمر مخصص للمداخلات الادارية فقط
__________________
مشرف القسم

**aminibrahim** · 11-11-2009 10:06 PM

صلي استخاره وتوكل

**yasso79** · 11-11-2009 10:06 PM

ربنا يخليك ياwookiee بجد متشكر جدا على رائيك وتوضيحاتك
وربنا يباركلك فى عربيتك

**yasso79** · 11-11-2009 10:08 PM

وهوا ده فعلا اللى انا ناوى اعمله انشاء الله
بحسب كنت لازم اسأل برده الاول يا أبو أمين

**sherif2net** · 11-11-2009 10:21 PM

3- الزجاج الخلفى مش بيكشف الطريق علشان عالى و صغير
حكون أمين برده , صح هو صغير حاجة بسيطة بس برده أنا عارف أسوء وكل حاجة يعني مش مضايق قوي كده وأنا بسوء في حتت زحمة جدا ....ربنا يستر ..

هى المشكلة مش ان الزجاج هو اللى صغير .. هو ضهر العربية هو اللى عالى فيديك احساس انك مش شايف كويس.
بس بردو مش لدرجة ان دا يرقى لمستوى العيب لأن فية سيارات أخرى بنفس الطريقة ... زى بنت عمها (الالنترا) و الاوكتافيا الa5.