الموضوع: طريق العين السخنة - القاهرة وطريق الزعفرانه

الحمد لله وصلت بسلامة الله والعائلة بخير بعد اللي شفته

قلت منها الواحد يفصل شويه ويلين العربيه في طريق كويس واختارت العين السخنه وقلت بلاش ويك اند خليها
اول الاسبوع علشان اكون لوحدي وفعلا الطريق كان تحفه والعربية كانت بتسرح متي لاني مقابلتش وانا رايح
غير ٥ عربيات بس بجد والطريق كله فاضي ..تخيل بقا ١٢٠ كيلو فاضيه ادامك

المهم وصلنا وسألت علي بورتو سخنه وكانت الساعه ٦ فواحد ابن "حلال" قالي دي بعد الكمين علي طول في طريق الغردقة وطلعت بعدها بـــ ٢٥ كيلو المصييبة ان الطريق رايح جاي ويمينك جبل وشمالك بحر وهبل في نقل وطبعا
لو اعرف كل الكلام دامكنتش اتحركت علشان بورتو نيله دي"عباره عن ٥ مطاعم ومالهاش لازمه علشان محدش يفكر فيها"

واخيرا وانا راجع دخلت الطريق الجديد وشكله برضو مفهوش ولا عربية وعديت البوابات وبحضر مثبت السرعة
ولقيت عربية بوكس قافله الطريق وبقاله فيه ايه قالي مأمورية ولا فهمت حاجه طبعا قالي الطريق مقفول من الساعه ١١ الي الساعه ٢ لييييه طيب ...برضو مأموريه

طب امشي ازاي حضرتك تلف وتمشي في طريق المحاجر ،اللي عرفته ان دا كان طريق العين السنخة القديم
ودي معلومة من ظابط وختمها وهو بيبص علي ساجد بنظرة اسي وبيقولي خد بالك من النقل

وكانت صدمة طريق متسفلت من سنه ٦٢ ومفيش غير عربيات نقل شايله حجاره ورمل وعبارة عن حارتين ومفيش حتي ٢ متر رمل حتي الواحد ممكن يدخل فيهم لو حصل حاجه لقدر الله واتفرج بقا علي لعب المقطورة
انا اول مره اشوف بجد كذا مقطورة بتغرز كأنها عربيات أطفال لدرجة ان ها عجبت ساجد ولبشت ابو ساجد طبعا

وفي الاخر وصلت لنفق يخرجك علي الطريق الجديد تاني ودا قبل البوابات علي طول بعد ٩٠ كيبو لبش
وافجأ ان الطريق كان مقفول علشان مسابقات الدورة العربية للدرجات :shock: :shock: :shock:

يييييييا حلاووووووووووووووووة عجل في الاخر عجل اتقلب واخسر حياتي وحياة اسرتي عشان عجل


حاجة تنرفز بصراحة

المهم محدش يفكر يدخل الطريق دا حتي لو الطريق مقفول استني لغايه ما يتفتح
وطريق الزعفرانة متفكرش تمشي فيه بالليل
تماما


واسف اني اطلت عليكو

حمد الله على سلامتكم يا أبو ساجد :-) أنا صعبان عليه عربيتك اللى مشيت فى طريق المحاجر حرام! الحمد لله عديت على خير و شكرا جزيلا على النصيحة.