الموضوع: مفاجأة لانسر بومة 1600 موديل 2010

أخى العزيز و استاذى الفاضل و حبيب قلبى المهندس/ طارق

اولا كل سنة و حضرتك و كل الأخوة فى المنتدى طيبين بمناسبة عيد الأضحى اعاده الله علينا جميعا باليمن و الخير و البركات.

ثانيا شكرا على المعلومات الجميلة التى تأتينا بها ، ده غير ردودك و مساعداتك لنا التى تفيدنا بيها دوما و بأسرع ما يمكن ، و اعتقد لو نقعد نشكر فيك لا يمكن نوفيك حقك ابدا.. ربنا يخليك لينا و يجعله فى ميزان حسناتك.

ثالثا لي سؤال ، طبعا الإضافات اللى حضرتك ذكرتها جميلة و لكن دى مش جديدة و انا كنت منزل من النت كتالوج دعاية عن اللانسر و الكتالوج مطبوع 3/2006 و فيها الفتيس الستيبترونيك و العدادات البيضاء ، و سؤالى هو ان لما الحاجات دى موجودة فى الموديلات بره من زمان ، ليه لازم نستنى و نبقى آخر ناس تجيبها ؟؟؟

بصراحة انا باحب الفتيس ال CVT جدا و لكن ما أنكرش ان لو كان قدامى اختيار ال CVT او الأوتوماتيك العادى و لكن بالستيبترونيك اكيد كنت هابقى محتار و ممكن اختار التانى ، و لو فيه CVT و ستيبترونيك سوا فأكيد هو ده اللى هاختاره ، ماعلينا ... نرجع لسؤالى ... ليه الوكيل مابينزلش الأختيارات كلها و يسيب المشترى يختار اللى يناسبه ؟؟

ماعتقدش ان الموضوع فرق السعر ، ماهى نازلة دلوقتى ، و لا لازم تكون قدمت علشان فرق السعر يكون اقل ؟؟؟

ليه بنلاقى ان الأوبشن عندنا لازم تبقى اقل من بره فى حين ان لو حسبنا السعر الأساسى اللى العربية بتيجى بيه من بره هانلاقى ان شوية الأوبشنز دى مش هاتعمل زيادة ملحوظة ، ولا لازم الإضافات يقابلها رفع غير عادى فى السعر ؟؟

انا مش قصدى اهاجم ميتسوبيشى موتورز ايجبت ابدا ، انا بس باستعجب ... لما الاقى اللانسر بره فيها 6 ايرباج و مثبت سرعة و فتيس ستيبترونيك و كان سعرها ساعتها حوالى 14600 دولار و اللى من غير مثبت سرعة و الفتيس CVT سعرها حوالى 14100 دولاريعنى الفرق جوالى 3000 جنبه ، و لو الوكيل حط مكسب 100% نقول الفرق 6000 جنيه ، ماعتقدش ده هايمنع او يقلل بيع العربية ، بالعكس هايدى قاعدة اختيار اوسع و بالتالى عدد الناس اللى هاتلاقى اللى هى عاوزاه هايكون اكتر و بالتالى المبيعات تزيد .

ماعرفش انا صح و لا غلطان فى اللى قلته عن البيع و لكن ده اللى انا فاهمه عن العرض و الطلب...

انا مش عارف ارفع الكتالوج ال PDF ازاى لأنه اكبر من الحد المسموح به للمرفقات ، و هاحاول ارفعه على موقع لرفع الملفات فى اقرب وقت لو حد عايزه ، و لكن اسمح لى ارفع بعض الصور منه بتبين العدادات البيضاء و الفتيس الستيبترونيك و مثبت السرعة ، و على فكرة ، الطارة اللى فى الصور هى القديمة الرباعية مش الجديدة الثلاثية ، شوف بقى حضرتك الكلام ده من امتى و احنا لسه بننزله دلوقت ...

نفسى نجيب الجديد اول بأول ، مش فى ميتسوبيشى بس ، بس فى العربيات كلها ..

اسف لتطويلى و شكرا لك و لجهودك معنا ..

و تحياتى