ننقل لكم أخر أخبار الوضع الحالي في السودان:E_braces[1]:
طبعا كترت المواضيع اللي بتتكلم عن وحدة مصر والسودان وياترى السودانيين هيشجعونا ولا لأ وإنقسمت الأراء بين المؤيد والمعارض.
أنا بشتغل في السودان بقالي 3 سنين تقريبا ومن حكم المدة والمعاملة اللي تعتبر طويلة شوية وبحكم موقع عملي الحالي وبحكم سني الصغير ليا نظرة عاوز أطرحها في شكل نقط وهي:
1-نسبة تشجيع السودانيين لمصر تقريبا تتراوح من 60% إلى 70% وهذه النسبة تحتوي على الفئة العمرية الكبيرة (من 35 سنة وإنت طالع) لأن دول الجيل اللي عارف قيمة مصر وفضلها ومكانتها.
2-باقي النسبة اللي هيا بتتراوح من 30% إلى 40% بتشجع الجزائر وده ليس عن حب فيهم ولكن عند في المصريين والنسبة ديه هي من صغار السن أو الشباب (30 سنة فما تحت) وسبب الكره ده أنهم بيشوفونا بنتنطط عليهم.
3-النهاردة كان فيه ظاهرة غريبة جدا وهي كثرة الأعلام الجزائرية المتعلقة على العربيات وخصوصا المواصلات العامة والركشات (الركشات هي التوك توك عندنا وهو وسيلة نقل رئيسية في السودان) لدرجة ان تقريبا نسبة الأعلام ديه وصلت 30% من العربيات الموجودة في الشارع.
طبعا كان وضع غريب جدا وشككني في نفسي جدا وفي أرقام النسب اللي قلتها فوق.بس بعد البحث والتدقيق إكتشفت السر وهو قيام السفارة الجزائرية بتوزيع الأعلام ديه مجانا على العربيات ووسائل المواصلات المختلفة.
4-تم تسكين المنتخب في فندق الفاتح وده أحسن وأكبر فندق في الخرطوم ويقع في منتصف الخرطوم تقريبا وعلى النيل مباشرة وقريب جدا من الإستاد وفي ظهر الفندق تقع السفارة المصرية والقنصلية في نفس الوقت.
5-تم تسكين المنتخب الجزائري في فندق السلام روتانا وده قريب جدا من المطار ويعتبر تاني أحسن فندق في السودان وطبعا بعيد شوية عن الإستاد والنيل.بس الغريب بقى إن المنطقة اللي فيها الفندق ديه تعتبر من المناطق اللي بيسكن فيها مصريين كتير جدااااااا لدرجة إن ظهر الفندق بيقع أكبر تجمع لمجموعة قهاوي بلدي تسمى بقهاوي المصريين:)
طبعا ترتب على كده إن تقريبا كل المشجعين الجزائريين اللي وصلوا بيحاولوا يسكنه في المنطقة ديه ومن الصبح وهما ماشيين في الشوارع لابسين الأعلام بتاعتهم وعماليين يسلموا على الناس (تقريبا بيحاولوا يكسبوا ود السودانيين).
6-لسه عارف حالا إن فيه مأدبة عشاء تجمع المنتخبين في فندق السلام روتانا تحت رعاية جمال الشريف رئيس نادي المريخ الذي يملك الإستاد الذي سيقام عليه المبارة.
في النهاية لو فيه أي حد جاي السودان أو تعرف حد جاي ومحتاج أي مساعدة أو سؤال أو أي حاجة أنا تحت الخدمة:)