الموضوع: عربيتك اتسرقت؟ او خايف تتسرق؟

لو نزلت في يوم الصبح رايح الشغل ملقتش عربيتك تحت البيت ممكن تعمل الاتي: حدد هي امتي اتسرقت بالضبط. طبعا واحد ذكي هيقولي انا نمت الساعة 12 صحيت 8 ملقيتهاش بس هقوله مليش فيه لازم تحدد أو ده اللى هتبقي المفروض تعرفه لما سعادتك تروح القسم علشان تعمل محضر. ممكن تسأل جيرانك ، تسأل بتاع الفول ، بتاع العيش بس اهو حاول تعرف. بس متضيعش وقت نص ساعة بالكتير. بص في مكان العربية وحاول تشوف هي طلعت ازاي ، يعني مثلا اثار العجل ، شوف لو فيه زجاج مكسور في الارض. طبعا مش هتفرق معاك قوي لو عرفت انه كسر الزجاج علشان يدخل لكن مين عالم. لو مفيش اي اثار للعنف والعربية شكلها طالع بشكل طبيعي وانت عربيتك موديل حديث مش سهل فتحه يبقي ممكن يكون حد دخل بمفتاحها.

روح القسم واسأل على مكتب المباحث واعمل محضر سرقة سيارة. لو مكانش ضابط المباحث موجود يبقي هتلاقي شوية بلهاء ملهمش لازمة خلص المحضر قوام قوام وحاول تكلم الضابط وتقابله. هو او امين شرطة هيطلب انه يروح مكان العربية المسروقة علشان يعمل معاينة علشان يتأكد ان العربية اتسرقت بجد!!!!!

اطلب من الضابط انه يتصل بمباحث السيارات في مديرية الامن علشان دي ادارة متخصصة في مكافحة سرقة السيارات (يا فرحتي) طبعا المفروض ان القسم يتصلوا بيهم ويبلغوهم لكن متضمنش لانهم برضه مش عايزين يطلعوا سمعة وحشة على نفسهم والناس تقول الضباط مش شايفة شغلها في المنطقة!!! اتصل بعد كده بمباحث السيارات بنفسك (ممكن تاخد نمرتهم من الضابط) واتأكد ان الضابط بلغ فعلا. لو متطلعش يبقي بكل ذوق اطلب منه جواب لمباحث السيارات.

اطلع على مديرية الامن واسأل على مباحث السيارات. في القاهرة دي موجود في باب الخلق في شارع بورسعيد. بيبقي عندهم فترة راحة مساء من الساعة 7 أو 8 للساعة 10 مساء. وبيكملوا من 10 ل 1 او 2 صباحا. هتروح هناك مكتب اسمه بلوكامين ، هتتأكد ان البلاغ موجود وتعرف هما عملوا ايه وايه اللي لسه هيعملوا وتتطلب منهم جواب للمرور اللي انت تابع ليه.

تاخد الجواب ده وتطلع على المرور اللي انت تابع ليه علشان يتخذوا اللازم تجاه ملف العربية قال يعني علشان يبقوا عارفين ان العربية دي مسروقة.
طبعا واحد ممكن يقولي طب انا ليه روحت المرور مكانت المباحث تخطرهم وخلاص ، وهو انا ليه اصلا روحت مباحث السيارات اصلا ماهو القسم بيخطرهم كده كده. معرفش.

عربيتك مكنش فيها بنزين؟ لو كانت مشحطة يبقي فيه فرصة انها تكون وقفت من الحرامي في السكة ونزل سابها وجري. حاول تخمن وابدأ دور في الطرق الخلفية أو الصحراوية القريبة منك على حسب البنزين اللي كان فاضل في العربية!

لو انت فاضي قوي ومقتنع انك محظوظ يبقي اتصرف في عربية تانية واطلع دور على عربيتك. ابدأ دور في كل المناطق البعيدة الهادية (لو انت في القاهرة الكبرى يبقي القاهرة الجديدة والمقطم والطرق الصحراوية على سبيل المثال). بس خليك عارف انك بتدور في 3 اكبر مدينة في العالم على عربية بافتراض ان اللي سرقها راح بيها مشوار ورماها في حتة. انا اتقالي ان ده فعلا بيحصل وطبعا ساعتها هتبقي انت محظوظ.

حاول توصل للحرامية وتتفق معاهم. الفكرة ان الحرامي مش هيعرف يبيع العرابية ولا الشاسيه والا الموتور ، فهو هيطلع من عربيتك حوالي 20% من ثمنها. فممكن تحاول توصله انك مستعد تدفع ال 20% دي ليه بالود وتاخد عربيتك. بس ده لو تعرف توصله. بنسبة 99% مش هتعرف الا لو هو مخطط لكده من الاول اصلا. ممكن تلاقية بيتصل بيك وبيساومك!!!
كل اللي فوق ده هو اللي انا عملته وعربيتي لسه في خبر كان. لو خايف عربيتك تتسرق زي عربيتي ممكن تعمل الاتي:

• تحط AVL. طبعا هو موضوع بعيد عن اسواقنا بس ممكن عمله وتكلفته مش عالية قوي وفيه شركات بتعمله بس مش لافراد. انا معرفش ايه اخر تطورات الاجهزة الخاصة بالموضوع ده لان لمهمة زي دي احنا عايزين حاجة صغيرة وبتشتغل مع بطارية العربية مع بطارية احطياطية بتتشحن لما العربية تدور ، او حاجة زي كده المهم انها تتحط في مكان وتتنسي لغيت مالعربية تتسرق ساعتها تجيب العربية وتساهم في القبض علي مجرم.
• اشتري ذراع الامان ، ده احسن حاجة انت ممكن تعملها وهتكلفك حدود 100 جنية او اقل.
• متسيبش بنزين في العربية ، يعني لو روحت من الشغل ونسيت تفول علشان بكرة الصبح تطلع الشغل على طول ما تزعلش قوي!!
• لو معندكش بواب او امن تحت العمارة (لاي سبب كان) اتفق انت وجيرانك في العمارة انكم تجيبوا حارس فترة الليل.

طبعا كل الكلام ده مش المفروض انه يكون مطلوب من ساعدتك لكن للاسف دي ضريبة العيشة في مصر.