ارجوكم حد يساعدنى فى مشكلة سخونة العربية

**memodragon** · 21-11-2009 07:43 PM

السلام عليكم
انا عندى العربيه لادا 2110 بتسخن بطريقه غريبه قوى
اول ما امشى المروحة بتاعة التبريد بتشتغل عادى 80/90 ولما اقف وابطل العربيه "اكون بشترى حاجه مثلا" وارجع تانى ادور واطلع الاقى المروحه تشتغل عند 110 وتبطل عند 90
رحت لكهربائى قالى ممكن تكون واخده هوا وراح شايل الخرطوم اللى داخل القريه والعربيه دايره وفعلا فيه شويه هوا طلعوا وبعد طده جرب وسخنت تانى راح مغير الثرموستات وركب واحد جديد ويدوب مشيت بيها شويه وعملت نفس الحركه المروحه رجعت تشتغل عند 110 وتبطل عند 90
رجعتله قالى خلى الكهربائى يبص على الثرموستات بتاع كوع الموتور ولما رحت للكهربائى لقاه متشال علشان انا كنت مركب تكييف
المهم قلت باه اروح التوكيل وهما هيفهموا فيها ورحت وقلت للفنى انى مغير الثرموستات
بس برده راح مغيره وقالى اللى راكب ده صينى ومش حلو
ويدوب مشيت شويه ووقفت اجيب حاجه "يعنى بطلت العربيه حوالى 15 دقيقه" وطلعت تانى لقيتها عملت نفس الحركة وعلى مرجعت كان التوكيل بيشطب بس برده ورتها للفنى فقالى يمكن الارضى اللى داخل للثرموستات بيسرب وروح لكهربائى يبص عليه!!!!!!
بصراحه انا مش فاهم حاجه و حاسس انهم بيشتغلونى
ارجوكم اى حد يفهمنى ايه اللى بيحصل و ايه الحل

**samirayad** · 21-11-2009 08:12 PM

هى فعلا مشكله كهربيه
بين ثرموثتات الردياتير (الساعه )
والمروحه
والمفروض فعلا تستشير كهربائى
يراجع على الكابلات بين الساعه والمروحه

**memodragon** · 21-11-2009 08:31 PM

اولا شكرا طبعا على سرعة الرد
بس ياريت لو ممكن تفهمنى ازاى ممكن مشكله فى الكهرباء تخلى المروحه تشتغل عند 110 وتبطل عند 90
هو مش المفروض ان الثرموستات هو اللى بيفتح الدائره عند 80 و يقفلها عند 90
انا بس عايز افهم علشان دى اول عربيه اجيبها ومش عايز افضل جاهل

**aymn2003** · 21-11-2009 09:04 PM

نفس الشكلة بتحصل معايا مع فرق ان المروحة احيانا كثيرة تشتغل عند 100 مش 90 (اسكودا فليشبا)
واى استفسار عندك مهنس سمير
هى الكابلات الكهربائى بيكشف عليها ازاى (يا اما واصلة كويس او مش واصلة)ولو مش واصلة المروحة مش هتشتغل فى الاصل
ارجوا الافادة ياباشمهندس سمير معلش بنتعبك معانا

**samirayad** · 21-11-2009 09:20 PM

صلى على النبى

أيه اللى بيكمل الدايره الكهربيه اللى رايحه من فيوز المرحه لتشغيل المروحه
هى ساعة الردياتير
لما بتسخن بتقفل الدايره وبكده بتشتغل المروحه (عادى جدا )

وبما أن عندك الوضع تمام والعربيه لسه بارده ...لحد هنا كويس
طيب أيه اللى بيخللى الساعه تعمل الحركات النص كم دى والعربيه سخنه
هى كابلات الكهرباء
ممكن تكون بتلمس مع السخونه أو عزلها بينهار شويه مع السخونه
وبكده بتأخر مرور التيار فى دايرة المروحه

وممكن تحتاج تغير كابلات (علشان موضوع العزل ده )

وممكن تحاول تجرب ساعة ردياتير تانيه (نوع كويس )

بس أنا حاسس أن مشكلتك فعلا زى ماقولنا فى البدايه

**memodragon** · 22-11-2009 10:47 PM

انا رجعت التوكيل تانى النهارده وغيروا كابلات الكهرباء زى محضرتك قولت والحمد لله مشيت بيها من عندهم فى العباسية لحد الجيزه و مسخنتش بس لسه انا مش مطمن
هجرب بقيت الاسبوع وان شاء الله تطلع دى المشكله علشان انا طلعت روحى بصراحه
متشكر جدا يا باشمهندس وادعولى انها مترجعش تانى
وانا هجرب واقول على النتيجه علشان لو حصلت لحد تانى

**samirayad** · 22-11-2009 10:58 PM

خيرا
ان شاء الله

**nab!l** · 22-11-2009 11:01 PM

متابع
وبسيطة ان شاء الله
بس انا بكره الموديل ده

**memodragon** · 24-11-2009 10:06 PM

الحمد لله بقالى يومين اهه ومسخنتش (وربنا يسهل وتكمل كده )
الف شكر ليك يا بشمهندس سمير ولكل الناس اللى ردت

**samirayad** · 24-11-2009 10:23 PM

الحمد لله
وألف مبروك

الموضوع: ارجوكم حد يساعدنى فى مشكلة سخونة العربية

LinkBack

أدوات الموضوع

عرض

-

المواضيع المتشابهه

مشكلة سخونة في العربية السيينا

يا جماعة حد يساعدنى ارجوكم !!!!!!

مشكله فى الكورسا 95 حد يساعدنى ارجوكم

ارجوكم حد يساعدنى

عايز اشترى فيات زيرو بس خايف حد يساعدنى ارجوكم

الكلمات الدلالية لهذا الموضوع

المفضلات

المفضلات

ضوابط المشاركة