هل هذا عيب بطارية؟؟!!

السلام عليكم
كل عام وانتم بخير
عندي مشكلة غريبة - على الاقل من وجهة نظري-
حصل معايا من اسبوعين تلاثة كنت ماشي بالعربية ونزلت اجيب حاجة لمدة 5 دقايق وكنت سايب النور الصغير بس العربية مش دايرة رجعت ادور العربية مابتدورش خالص تدي صوت مرتين كدا (تعتل) وبعدين تفصل وبعديها الكاسيت يشتغل لوحده وماكينة رفع الزجاج والسرينة تشتغل والنور شغال والكهربة كلها شغالة..
المهم دورتها زق ورحت اغير البطارية .. بطلت العربية ودورتها عند بتاع البطاريات دارت .. سألته لو عيب بطارية العربية تدور ؟ قالي لأ.. المهم قاس الشحن وقالي البطارية كويسة وتمشيك شوية كويسين
امبارح حصل نفس الموضوع بعد مشوار نزلت اجيب حاجة مع اني كنت مقفل العربية ومفيش حاجة منورة .. رجعت ادور مابتدورش .. ودارت زق برضه
رحت لكهربائي قالي عيب بطارية وانا مش قادر اقتنع لأن كل حاجة شغالة النور والكاسيت والانذار.. بس مابتدورش.. ومع العلم مش بتغلبني الصبح في الدوران ولله الحمد.. بتدور على طول.. المشكلة دي بتحصل بعد مشوار ..
الراجل علشان يقنعني فتح الكونتاكت والنور العالي شوية وجينا ندور مادارتش بس انا بعد كدا العربية ماشية وبتدور الحمدلله..
حد عنده فكرة مشكلة ايه دي؟
واسف جدا على الإطالة

أرجو الإفادة وجزاكم الله خيرا

بص روح لكهربائى يعمل للبطارية قفلة لو دارت وهو بيعمل لها قفلة يباق البطارية سليمة لو ما دارت يباق تغيرها

حصلت معايا
وكنت لما بمشي كتير بالعربيه وابطلها واجي ادور مترضاش تدور غير لما تتزق
بس لما اسيبها نص ساعه واجي ادورها تدور عادي
واول حل كان اننا نزود ميه البطاريه علشان كانت ناقصه
ولما غيرت البطاريه وعملت نفس العيب تاني
الكهربائي ركبلي كتاوت تقويه للمارش ومن ساعتها معملتهاش تاني

البطاريه عندك تمام
وفعلا ده عيب فى كفاءة المارش
ممكن يكون عاوز شوية نظافه وتغيير شربون والكشف على حالة جلبه
وتوصيلاته بالمره

جزاكم الله خيرا وكل عام وانتم بخير
واللي يعمل الموضوع دا كهربائي ولا ميكانيكي؟

اقتباس:

---

المشاركة الأصلية كتبت بواسطة timtim

جزاكم الله خيرا وكل عام وانتم بخير
واللي يعمل الموضوع دا كهربائي ولا ميكانيكي؟

---

كهربائي يا باشا
بس احتمال تروح للخراط يظبطلك شويه حاجات في المارش
بس دا اللي يحدده الكهربائي بعد ما تروحله

اقتباس:

---

المشاركة الأصلية كتبت بواسطة timtim

الراجل علشان يقنعني فتح الكونتاكت والنور العالي شوية وجينا ندور مادارتش

---

طب والكلام اللي فوق دا ميقولش انه ممكن يكون عيب بطارية؟

عندي سؤال كمان..
بالرغم من ان العربية بتدور من غير مادوس دبرياج .. إلا اني متعود اني ادوس دبرياج وانا بدور العربية كنت سمعت مرة ان الموضوع دا مفيد بس مش فاكر مفيد لايه بالظبط.. ايه رأيكم في الموضوع دا؟

اقتباس:

---

المشاركة الأصلية كتبت بواسطة timtim

طب والكلام اللي فوق دا ميقولش انه ممكن يكون عيب بطارية؟

---

خليه يركب بطاريه من عنده ويجرب بيها
لو دارت تبقي بطاريه
مدارتش تبقي مش بطاريه

اقتباس:

---

المشاركة الأصلية كتبت بواسطة timtim

عندي سؤال كمان..
بالرغم من ان العربية بتدور من غير مادوس دبرياج .. إلا اني متعود اني ادوس دبرياج وانا بدور العربية كنت سمعت مرة ان الموضوع دا مفيد بس مش فاكر مفيد لايه بالظبط.. ايه رأيكم في الموضوع دا؟

---

الحاله الوحيده المفيد فيها
ان لو العربيه واخده غيار وانت مش واخد بالك مش حتنط منك وانت بتدور

انا حصل معايا نفس الموضوع كنت بجيب طلب من محل وكنت ناسى النور ورجعت لقيت العربية مش بدور بس البطارية عندى جافة
مش عارف من البطارية ولا من اية بالظبط

اقتباس:

---

البطاريه عندك تمام
وفعلا ده عيب فى كفاءة المارش
ممكن يكون عاوز شوية نظافه وتغيير شربون والكشف على حالة جلبه
وتوصيلاته بالمره

---

كلام ما بعده كلام
صدقنى صدقنى الكهرابائيه بيستسهلو ويطنشو اول حاجه يقولك بطاريه

الموضوع ده اتكرر معايا امبارح وجالي التفسير المنطقي الوحيد من صبي ميكانيكي بالصدفه قالي ان جلب المارش محتاجه تتغير لانها لما بتسخن بتفتح ومش بتلقط فلازم تتغير وكل حاجه حتتظبط ولا بطاريه ولا يحزنون

اقتباس:

---

الموضوع ده اتكرر معايا امبارح وجالي التفسير المنطقي الوحيد من صبي ميكانيكي بالصدفه قالي ان جلب المارش محتاجه تتغير لانها لما بتسخن بتفتح ومش بتلقط فلازم تتغير وكل حاجه حتتظبط ولا بطاريه ولا يحزنون

---

صح جدا
ومش محتاجه تفسير منطقى
مدام البطاريه بتدور العربيه مره اه ومره لا يبقى ده مااااااااااارش او ارضى او كابل المارش او ارضى البطاريه
و90% بيبقى جلب مارش او موبينه

لقطع الشك باليقين اختبر البطارية عند محلين بطاريات او اكتر، لول اجمعوا انها سليمة تاخد بعضك وتروح لكهرابائى يراجع لك المارش ويشوف الجلب والشاربون والبوبينة والمخدات والأوتوماتيك وسلك اللقط بتوعه، لو كل ده محلش المشكلةيبقى اعمل كتاوت للمارش لأن ممكن الكونتاكت يكون ضعيف

اقتباس:

---

المشاركة الأصلية كتبت بواسطة timtim

عندي سؤال كمان..
بالرغم من ان العربية بتدور من غير مادوس دبرياج .. إلا اني متعود اني ادوس دبرياج وانا بدور العربية كنت سمعت مرة ان الموضوع دا مفيد بس مش فاكر مفيد لايه بالظبط.. ايه رأيكم في الموضوع دا؟

---

انا بعمل زيك كده والموضوع ده مفيد انك بتشيل حمل الاسطوانه وجزء من الفتيس عن الموتور وبالتالي هيتشال من المارش وبيكون الحمل اخف وده مفيد لأطاله عمر المارش

اقتباس:

---

المشاركة الأصلية كتبت بواسطة shok

انا حصل معايا نفس الموضوع كنت بجيب طلب من محل وكنت ناسى النور ورجعت لقيت العربية مش بدور بس البطارية عندى جافة
مش عارف من البطارية ولا من اية بالظبط

---

كده البطاريه هتودع وخلي ابلك الجافه بتقطع مره واحده

اقتباس:

---

المشاركة الأصلية كتبت بواسطة misoalex

صح جدا
ومش محتاجه تفسير منطقى
مدام البطاريه بتدور العربيه مره اه ومره لا يبقى ده مااااااااااارش او ارضى او كابل المارش او ارضى البطاريه
و90% بيبقى جلب مارش او موبينه

---

انا بطاريتي الجافه عملت كده
كانت ساعات تقطع المارش ومتخليهوش يدور
طبعا انا كنت شاكك في المارش لحد ما في مره واحده لقيت العربيه مش عاوزه تدور رغم ان الانوار شغاله
وفي الخر طلعت البطاريه
علشان البطاريه الجافه بتقطع مره واحده وقبلها بتهيس حبتين تلاته

بص يا معلم انت تعمل بالعربيه مشوار محترم وبعد كده تطلع بيها عند الكهربائي بتاعك وتبطلها طبعا حتيجي تدورها مش هتدور تقوم مخليه يحط بطاريه من عنده مش يعمل وصله وساعتها لو دارت العربيه بسهوله يبقي كده عيب بطاره انما لو مدارتش وده غالبا اللي هيحصل كده يبقي عيب مارش ساعتها تخليه يفك المارش يبص عليه كله بس يركز علي الجلب والاوتوماتيك مهم جدا يبص علي الاوتوماتيك لأنها حصلت معايا قبل كده وطلع عيب اوتوماتيك بس مغيرتهوش خليتوا يسنفرلي البسكوتين بتوعه ومن ساعتها شغال بقاله دلوقتي 10 أشهر زي الفل

فعلا كشفت على البطارية عند اتنين وقالولي ان البطارية دي بتودع وممكن مرة تدور ومرة لأ.. من غير ماعرفهم المشكلة ايه.. وشفت بنفسي المؤشر وهو بينزل ..
وتم تغيير البطارية والحمدلله الدنيا اتظبطت بقالها 6 أيام..
القديمة كانت داخلة على 4 سنوات خدمة -عملت اللي عليها وزيادة- :)
لكم جميعا جزيل الشكر وكل عام وانتم بخير

اقتباس:

---

المشاركة الأصلية كتبت بواسطة sab3aawy

لقطع الشك باليقين اختبر البطارية عند محلين بطاريات او اكتر، لول اجمعوا انها سليمة تاخد بعضك وتروح لكهرابائى يراجع لك المارش ويشوف الجلب والشاربون والبوبينة والمخدات والأوتوماتيك وسلك اللقط بتوعه، لو كل ده محلش المشكلةيبقى اعمل كتاوت للمارش لأن ممكن الكونتاكت يكون ضعيف

---

+111111111111111 :verygood::verygood:

ممكن يكون عيب شحن دينامو يعنى ساعات يشحن و ساعات ما يشحنش ممكن بسبب الكتاوت الخاصة بالدينامو او بلية الدينامو و ممكن يكون فى عيب فى الضفيرة

بفضل الله المشكلة اتحلت بعد تغيير البطارية

اقتباس:

---

المشاركة الأصلية كتبت بواسطة timtim

بفضل الله المشكلة اتحلت بعد تغيير البطارية

---

الف مبروك يا باشا :hlopaet_prv:

الأغلب عيب مارش طالما تدور البطارية ووتشغل مسجل وحاجات تانية.