هل هذا عيب بطارية؟؟!!

**أبو_يوسف** · 25-11-2009 04:12 PM

السلام عليكم
كل عام وانتم بخير
عندي مشكلة غريبة - على الاقل من وجهة نظري-
حصل معايا من اسبوعين تلاثة كنت ماشي بالعربية ونزلت اجيب حاجة لمدة 5 دقايق وكنت سايب النور الصغير بس العربية مش دايرة رجعت ادور العربية مابتدورش خالص تدي صوت مرتين كدا (تعتل) وبعدين تفصل وبعديها الكاسيت يشتغل لوحده وماكينة رفع الزجاج والسرينة تشتغل والنور شغال والكهربة كلها شغالة..
المهم دورتها زق ورحت اغير البطارية .. بطلت العربية ودورتها عند بتاع البطاريات دارت .. سألته لو عيب بطارية العربية تدور ؟ قالي لأ.. المهم قاس الشحن وقالي البطارية كويسة وتمشيك شوية كويسين
امبارح حصل نفس الموضوع بعد مشوار نزلت اجيب حاجة مع اني كنت مقفل العربية ومفيش حاجة منورة .. رجعت ادور مابتدورش .. ودارت زق برضه
رحت لكهربائي قالي عيب بطارية وانا مش قادر اقتنع لأن كل حاجة شغالة النور والكاسيت والانذار.. بس مابتدورش.. ومع العلم مش بتغلبني الصبح في الدوران ولله الحمد.. بتدور على طول.. المشكلة دي بتحصل بعد مشوار ..
الراجل علشان يقنعني فتح الكونتاكت والنور العالي شوية وجينا ندور مادارتش بس انا بعد كدا العربية ماشية وبتدور الحمدلله..
حد عنده فكرة مشكلة ايه دي؟
واسف جدا على الإطالة

**أبو_يوسف** · 25-11-2009 05:39 PM

أرجو الإفادة وجزاكم الله خيرا

**lada2010** · 25-11-2009 06:18 PM

بص روح لكهربائى يعمل للبطارية قفلة لو دارت وهو بيعمل لها قفلة يباق البطارية سليمة لو ما دارت يباق تغيرها

**SHNORY** · 25-11-2009 06:21 PM

حصلت معايا
وكنت لما بمشي كتير بالعربيه وابطلها واجي ادور مترضاش تدور غير لما تتزق
بس لما اسيبها نص ساعه واجي ادورها تدور عادي
واول حل كان اننا نزود ميه البطاريه علشان كانت ناقصه
ولما غيرت البطاريه وعملت نفس العيب تاني
الكهربائي ركبلي كتاوت تقويه للمارش ومن ساعتها معملتهاش تاني

**samirayad** · 25-11-2009 06:41 PM

البطاريه عندك تمام
وفعلا ده عيب فى كفاءة المارش
ممكن يكون عاوز شوية نظافه وتغيير شربون والكشف على حالة جلبه
وتوصيلاته بالمره

**SHNORY** · 26-11-2009 04:26 PM

المشاركة الأصلية كتبت بواسطة timtim

جزاكم الله خيرا وكل عام وانتم بخير
واللي يعمل الموضوع دا كهربائي ولا ميكانيكي؟

كهربائي يا باشا
بس احتمال تروح للخراط يظبطلك شويه حاجات في المارش
بس دا اللي يحدده الكهربائي بعد ما تروحله

**SHNORY** · 26-11-2009 08:26 PM

المشاركة الأصلية كتبت بواسطة timtim

طب والكلام اللي فوق دا ميقولش انه ممكن يكون عيب بطارية؟

خليه يركب بطاريه من عنده ويجرب بيها
لو دارت تبقي بطاريه
مدارتش تبقي مش بطاريه

المشاركة الأصلية كتبت بواسطة timtim

عندي سؤال كمان..
بالرغم من ان العربية بتدور من غير مادوس دبرياج .. إلا اني متعود اني ادوس دبرياج وانا بدور العربية كنت سمعت مرة ان الموضوع دا مفيد بس مش فاكر مفيد لايه بالظبط.. ايه رأيكم في الموضوع دا؟

الحاله الوحيده المفيد فيها
ان لو العربيه واخده غيار وانت مش واخد بالك مش حتنط منك وانت بتدور