الموضوع: هاتلى جزمة يا حسانين !!!

أخوكم بقالوا أكتر من أسبوع بيلف على حذاء أسود مقاس 45 يحضر بيه مناسبة تانى ايام عيد الاضحى (كل عام و حضراتكم بخير و صحة) و مش لاقى !!!!
محلات أسكندرية كلها بقت أذواقها زى الزفت !!
بس قبل ما تقولوا انى باتلكك أو
انا مطلبى بسيط و هو عدم وجود بوز .............ايوه بوز عامل زى الجزمة بتاعت جحا و عامل زى العيال اللى بيطلعوا يغنوا ورا عماد بعرور و سعد الصغير
كل م اقف فى فاترينة و يعجبنى جوز (جزم طبعا) أدخل المحل و اسأل :فى مقاس 45 من الموديل ده ؟؟؟ يقولوا لا و الله يا بيه مافيش بس بص كده على دى و اتفاجأ بوجود صاروخ سكود فى ايد الراجل يا اما موديل عاملين فيه العجب العجاب من اضافة حتت من جلد التماسيح و التعابين و لا مانع من وجود حتة لميع كده علشان لما اتزنق ابقى اسرح شعرى فيها
رجاء من الاخوة الاسكندرانية يدلونى على مكان مايكونش فيه بوز

أحمدك يا رب انى ما طلعتش لوحدى فى المشكلة دى
حسستونى بالامان و المشاركة الوجدانية باشكركم اخ اخ
نزلت النهاردة بعد المغرب و لفيت لفة تانية و هى هى نفس مشكلة البوز اللعين !!! انا مش عارف ايه البلوة دى ؟؟؟
شكلى كده حالبس البدلة و عليها شبشب حمام فى الاخر لان فعلا الوقت زنق و انا مصر مادفعش 600 او 500 ملطوش عند تيمبرلاند أو كلاركس فى جوز براطيش مش بالبسه غير مرة واحدة فى السنة.
shnory بك انا رحت للطفى و بصيت فعلا و مالقتش مقاسى اما ريم فاشكله كده بيفلس و ابو علاء فى مستعمرة محطة الرمل و مش قادر اجازف اروح فى الزحمة بس شكلى كده حاعملها بكره و امرى الى الله
و اعذرنى لاننى ما جتش و لا مقابلة الى الان علشان دايما بتطلعلى مفاجات بس ربنا يسهل و ابقى معاكو فى اقرب فرصة باذن الله
Relentless_mayhem انا برضه عندى مشكلة شبه دى الا و هى ان طول كم القميص دايما بيبقى قصير و لا كانى شاحت القميص من عند المكوجى حاجة عرة بصراحة انا مش عارف ليه المقاسات بقت مش ماشية مع بعض ..يعنى يا كم مظبوط و قميص واسع زى القفطان يا قميص مظبوط و كم قصير ..فقر بعيد عنك و عن السامعين
اما عن التفصيل ممكن و لكن مش فى الزنقة دى
حد عنده جوز سلف طيب ؟؟؟