السلام عليكم ورحمة الله وبركاته
أنا كنت متابع موضوعك وحقيقي نصيحة الأستاذ أحمد كمال نصيحة في محلها- وعلى فكرة أنا من متابعتي لمشاركاته فيما يتعلق باستخدامات التكنولوجيا الحديثة فهو راجل معلم وخد كلامه ثقة-
أنا كنت عاوز أشارك بس كنت مقفول من ساعة أحداث الجزائر الله يسامح الناس كلها ويهدينا جميعا للخير
شوف ياصديقي..خد نصيحة واحد بقاله سنين طويلة ماكي- نسبة إلى الماكنتوش-
ياريت لو إنت مش مستخدم للماك من فترة تحاول الأول تجرب على حاجة مستعملة رخيصة نسبيا وتمشي إيدك على السيستم والبرامج وطريقة التعامل مع الجهاز ومكوناته لأن النقلة للماكنتوش في بلدنا مش سهلة وحتلاقي نفسك متكتف بدرجة كبيرة لاسيما إن السائد في الأجهزة والأنظمة والبرامج والإكسسوارات والصيانة والخبرات والدعم هي أجهزة الويندوز
فالأفضل أن تتعود على النظام أولا
وتتابع المنتديات الخاصة بالماكنتوش سواء العربية أو الأجنبية
وتتعود على البرامج البديلة للبي سي وتعرف إيه المجاني من المدفوع، ولو في برامج بي سي مضطر تتعامل معاها
وطريقة حل المشاكل
وتاخد السينس بتاع التعامل مع النظام الجديد
ونظام الأكسسوارات وأسعارها -غالية-
وبعد كده تنقل لجهاز جديد نضيف زي الماكبوك برو سواء الأبيض أو الألومونيوم ولو الفلوس مش حتفرق معاك قوي يبقى خليك في الأفضل والأعلى في الإمكانيات ومش حتندم لأن الأجهزة دي تحفة جدا وتستاهل كل مليم تحطه فيها

أنا شغال على الماكنتوش من أيام الكلاسيك ٢ وحاليا معايا جهاز ماكبوك برو ١٣ الجديد وعدت عليا أجهزة أبل كتير جدا وأى استفسار أنا تحت أمرك

وعلى فكرة إنت ممكن تشغل الويندوز والماك سيستم على نفس الجهاز وفي نفس الوقت، وممكن تشغل الجهاز على الويندوز بس وتاخد مميزات نضافة الجهاز وجودة تصنيعه وقوة أداؤه

أخوك أحمد بحري