العربية بتبطل وهى على السلانسية

**teto2007** · 05-12-2009 07:29 AM

السلام عليكم ورحمة الله وبركاتة لو سمحتم يا اخوانى عندى مشكلة فى العربية لما بدورها مع اول تدويرة ليها العربية بدور بس بتروح فاصلة تانى وعشان متفصلش لازم ازود ليها بنزين عشان متفصلش وافضل دايس شوية لغاية ما تسخن بعد كدة مش بتبطل بتمشى عادى للعلم انى خليت الميكانيكى وطا الكهربا بتاعتها ولما كانت الكهربا عاليا مكنتش بتفصل كدة كانت بدور على طول بدات تعمل كدة لما وطيت الكهربا فهل اعلى الكهربا تانى ولا دة يكون عيب من البوجيهات او الكوندنسر ارجو افادتى وشكرا لكم

**HeMa_LanCeR** · 05-12-2009 01:44 PM

طيب لو الكهربا كده مظبوطه
انت ممكن تعلي السلانسيه سنه صغيره
روح للميكانيكي وهيعملهالك في 10 ثواني

**caysersosaih** · 05-12-2009 04:27 PM

تمام

**samirayad** · 05-12-2009 08:21 PM

ولو أن بيانات العربيه مش واضحه
فلو المكنه كربوراتير عادى
يبقى راجع برضه على نظافة بيك السلانسيه

دا لو كانت سرعة السلانسيه معقوله
وممكن تعاير تانى مسمارى الهواء والبنزين
بس جرب نظافة بيك السلانسيه الأول
لأنه لو مسدود شويه حيعملك خلل وقت السلانسيه

**teto2007** · 05-12-2009 08:27 PM

شكرا لك يا باش مهندس سمير على الرد العربية 128 م 91 والعربية بدات تعمل كدة لما الميكانيكى وطا الكهربا بتعاتها لانها كانت عاليا شوية رحتلو تانى قالى غير طقم البوجيهات والابلاتين والكوندنسر فهل دة كلام صحيح ولا راى حضرتك اية يا باش مهندس وشكرا ليك

**samirayad** · 05-12-2009 09:32 PM

والعربية بدات تعمل كدة لما الميكانيكى وطا الكهربا بتعاتها

طيب ماتخليه يلف الأسبراتير سنه ويعلى الكهرباء بين الوضع الحالى والوضع الأولانى
كنوع من التجربه
بدل ما هو عاوز يكلفك
أو الأول جرب ترجع للوضع الأولانى
لو كانت السرعه عاجباك ساعتها
وأنا شايف كلامه مش صحيح
طالما العيب ظهر فعلا بعد التوطيه الأولانيه

**sameh127** · 06-12-2009 03:14 AM

الشغل الصح و من الأخر تكشف على:
- فلتر البنزين نظيف و سالك"لونه فاتح مش مسود"
- ابلاتين فصَه مش مكربن"سنفره بورقة سنفرة" و كندنسر مش مرطب "لون الشرر الكهربي بين فصي الأبلاتين( اصفر ناصع يميل للزرقة) الصادر من تحريك شاكوش الإسبيراتير و الكونتاكت مفتوح"
لو اصفر مائل للحمار او البرتقالية يبقى الكودنسر مرطب
- فلتر هواء نظيف
- تفتح الكربيراتير و تبص على خزنة البنزين نظيفة بدون شوائب"منديل ورق للتنظيف و لم الشوائب و امتصاص عكارة البنزين" و بك البنزين سالك "سلكه بدبوس ترحة رفيع" و بك الهواء سالك و مظبوط صح"بالمفك".
لما الموتور يدور معاك تبقى تقدم و تأخر الكهرباء من الإسبيراتير بفك صامولة مقاس 13 اسفل الإسبيراتير و تدويره تمينا او يسارا قليلا حتي تحصل على احسن اتزان لساعة المحرك"تلاقي صوت الموتور بقى ناعم بدون تقطيع وصوت الإحتراق+صوت حركة الصبابات منتظم زي صوت الساعة العقارب بس بسرعة اعلى" تك تك تك تك تك.