الموضوع: إحساسك إيه وانت شايف عربيتك تاكسى

طيب ايه رأيكم بئى لما يكون التاكسي أعلى من عربيتك أصلا و بمراحل!!!!

أنا أمبارح شفت تاكسي تويوتا أفالون!!!!!!!ايوة و الله و دي مش أول مرة أشوف العربية دي (الكلام ده هنا في الرياض العاصمة السعودية لحسن حد يقول الراجل ده مجنون و لا حاجة)

و العادي ان التاكسي يكون تويوتا كامري أو شفروليه ابيكا أو هيونداي سوناتا أو ألنترا أو نيسان ألتيما أو كيا أوبتيما و مؤخرا السيراتو الجديدة و فورد كراون فكتوريا و مازدا 6 و شفروليه لومينا و كابريس و غيرهم بس هما دول أكتر حاجة منتشرة

طيب تقول ايه لو نزلت موقف العربيات اللي بالنفر في البطحاء و لقيت شباب سعوديين بيسترزقوا على عربياتهم الملاكي العادية بيسافروا بيها مدن تانية و يحملوها بالنفر و الشرطة سايباهم عادي و تلاقي عمالي ينادي الطائف الطائف أو القصيم القصيم أو جدة جدة و تروح تبص في الأخر تلاقي العربية فورد فايف هاندريد أو كامري 2009 أو فورد كراون فكتوريا و جمس سبيربان و غيرهم كتير لدرجة اني مرة شفت ناس بتنادي و عربياتهم مرسيدس فياجرا أو بي أم سبعمية الحوت و اللي قبلها بتاعة التسعينات............أرزاق

و جنب كل ده انته راكب عربيتك الكرولا2007 حبيبتك و رفيقة دربك و جنبك التاكسيات الوهم دي!!!

مش ناقص غير يعملوا دودج تشارجر علشان تبقى العملية خل خالص!!!!!

أما موضوع التاكسي الجديد ده انا أشجعه جدا و أحييه رغم انه اتعمل و انا برة و لسه ما شفتوش الا انه وجه حضاري جميل يارب يفضل نضيف و ينجح و يستمر و ما يغلاش عن كده

لو عربيتى انتشرت كتاكسى هاتضايق ...
لأن من أحد الأسباب غير الجوهرية لشراءها ان عمرها ما هتبقى تاكسى.

زمان التاكسيات فى مصر-ولحد السبعينات- كانت مرسيدس ولحد موديل الخنزيرة اشتغل تاكسى، وقبلها كانت الكابريس والبلايموث والفورد هى تاكسيات مصر وبعدها كانت البيجو ال504 سيارة الناجحين فى الحياه وسيارة كل الأطباء والمهندسين والمحامين والمحاسبين وكبار التجارو كل الناحجين هى نفسها اشهر سيارة تاكسى، يعنى كانت افخم عربيات هى اللى بتتعمل تاكسى علشان قدرتها على التحمل وطول عمرها الافتراضى وقله مصاريف صيانتها بالمقارنة بالسيارات الأقل قيمة
وزمان مكانش الراجل اللى عنده مرسيدس او بيجو او قبلهم الكابريس او الفورد بيزعل لما بيشوف عربية زى بتاعته بالظبط مهموة تاكسى لأن الثقافة العامة كانت هى ان التاكسى عربية فخمة وحلوة
وفى دول اوروبا التاكسيات مرسيدس وباسات ولانشيا وألفا روميو وأودى ، يعنى مش معنى ان السيارة بقت تاكسى انها بقت (بيئة ) ولا حاجة، دى ثقافة ترسخت عندنا فى مصر فقط من منتصف التمانينات وطالع بعد اغلاق باب استيراد السيارات وبعد ما تاكسيات الفترة السابقة على ذك اللى كانت لسة شغالة بقت كهنة وتم ترسيخ هذة الثقافة بعد احلال سيارات التاكسى القديمة فى اول موجة احلال بسيارات اقتصادية جدا مثل الإكسيل واسويفت وبالتالى حلت فكرة التاكسى البيئة محل فكرة التاكسى الفخم
وعمومل لو بصينا حاليا هنلاقى ان التاكسى الأبيض برضه السيارات المستخدمة فيه هى سيارات اقتصادية، يعنى اللانوس او الفيرنا او الاسبيرانزا لا تختلف اى منها كثيرا عن الاكسيل او السويفت فى وقت ظهورها ، ولا تختلف اى منهم عن ال 128 و ال 124 فى وقت ظهورهم
وبالتالى العيب مش فى التاكسى، لكن العيب فينا احنا اللى بقت عندنا صورة جاهزة بتقول: تاكسى= بيئة، مع ان محدش فى العالم كله بيفكر كدة غيرنا

المشاركة الأصلية كتبت بواسطة sab3aawy

وبالتالى العيب مش فى التاكسى، لكن العيب فينا احنا اللى بقت عندنا صورة جاهزة بتقول: تاكسى= بيئة، مع ان محدش فى العالم كله بيفكر كدة غيرنا

أكيد تقصد بزيينا ده العرب ككل مش المصريين بس لأن موضوع تاكسي = بيئة ده موجود في معظم الدول العربية و خاصة الخليج أكتر من مصر بكتير فالسعودية مثلا اي واحد يخجل يجيب كامري لونها ابيض لأنه هيبئى شبه التاكسي جدا و بيجيبوها أي لون تاني أكتر بكتير زي الفضي و الشباب بيفضلوا الأكورد عنها بكتير لأنها مش تاكسي و فيه ناس كتير فعلا بتبعد عن عربية معينة لأنها بقت تاكسي و بقت مرطرطه في كل حته و مش شبابية مميزة و هكذا

و ده سائد في كل دول الخليج مش بس السعودية.........

و لو انه فعلا لما العربية تبئى اجرة ده ميزة اكتر ما هو عيب عالأقل هتعرف تصلح و تجيب قطع غيار و اكسسوارات كتير و فرش و هكذا بسهولة مش تدوخ شهر علشان تجيب فانوس و لا طاسة!!!