الموضوع: لعربية البيتلز بتنتش

السلام عليكم أخي الكريم
بخصوص الكربراتير هو مؤثر جداً في السحب لدرجة كبيرة وكلامي ده عن تجربة والحكاية بتاعتي هي:
كنت أملك عربية 128 وفي فترة من الفترات لاقيت السحب بيقل يوم بعد يوم وكانت في طلعة الكباري ماتسحبش خالص فقمت مغير طقم كهرباء، اتعدلت شوية لكن برده حاسس أن في حاجة غلط في العربية وأخيراً لاقيتها بتاكل بنزين بطريقة بشعة، فرحت للميكانيكي بتاعي قال لي أحسن حاجة تطلع على ورشة الحاج إبراهيم إللي في شبرا عند السينما القديمة بالعربية هيلا بيله وهما أساتذة في صيانة الكربراتير، فعملت بالنصيحة ورحت إلى ورشة الحاج إبراهيم فقام الأسطى رجب الميكانيكي إللي هناك بفك الكربراتير ووديته للورشة وسبت العربية طبعاً هناك، وروحت البيت لمدة 4 ساعات ورجعت تاني واستلمت الكربراتير، حسيت ساعتها أن مش هو ده الكربراتير بتاع عرابيتي، وابتديت أكلم نفسي: (هي الورشة غلطت وأدتني كربراتير جديد لانج ولا إيه) ما علينا.
استلمت الكربراتير والميكانيكي ركبه وظبط الموتور والكهرباء وصوت الموتور بقى ناااااااااااااااااااااااا ااعم، وبعدها السحب بسم الله ما شاء الله تؤلش العربية كانت متكتفة بسلبة وفك لجامها، وحسيت بفرق شاااااااااااااااااسع عن الأول
وآسف جداً على الإطالة
وأرجو أن أكون أفدت

مشكوووووور والله يعطيك الف عافيه

وبارك الله فيك

لا شكر على واجب يا جماعة احنا كلنا واحد بنفيد ونستفيد، بإذن الله هحاول أفضي نفسي وأروح النهاردة ورشة الحاج إبراهيم بتاع الكربراتير علشان يضبط الكربراتير بتاع عربيتي لأن أن العربية بتستهلك بنزين فوق العادي أنا حسبت الاستهلاك لاقيته 150 كيلو في الـ 20 لتر

أنا باعتذر بكل شدة لأي شخص راح لورشة الحاج إبراهيم بتاع الكربراتير إللي في شبرا وحصل معاه موقف زي الزفت وعربيته ماتصلحتش كويس عن ما قبل للأسف الصنايعية الكويسين مش موجودين وإللي موجودين دلوقتي هناك مجموعة من الصنايعية إللي ضميرهم يكاد يكون معدوم.
حسبنا الله ونعم الوكيل في هذه الورشة
أنا حبيت أبعت الرسالة دي علشان انا كنت نصحت الناس إللي عندهم مشكلة في الكربراتير يرحوا لهذه الورشة، دلوقتي مانصحش أي حد يروح الورشة دي ويتعامل معاها.
وآسف جداً إذا كان حد قرأ تعليقي السابق وراح ليهم وحصلت مشاكل في عربيته بعد كده
وبعتذر لكم جميعاً مرة أخرى

المشاركة الأصلية كتبت بواسطة semam

ياريت يا استاذ عمرو تحكيلنا عن الموقف بالظبط علشان نقدر نستفيد من اخطائنا ومنكررهاش بعد كدة

إظاهر ان الضمير اليومين دول معدوم حتى عند الناس إللي كانوا واخدين سمعة أنهم أشهر بتوع كربراتير في مصر (حسبنا الله وتعم الوكيل) عندي مشكلة تحرق دم أي شخص مكاني العربية بتاعتي بولونيز وبها موتور 132 سعة 1600 اثنين كامة وكان معدل سحب البنزين 145 كيلو في الصفيحة فلما سألت الميكانيكي بتاعي فقال لي أن الاستهلاك ده عالي شوية والمفروض أنها تعمل 180 كيلو في الصفيحة.
أخذت العربية ورحت عند ورشة الحاج إبراهيم كربراتير إللي في شبرا في حارة الدرملي المتفرع من الترعة البولاقية، فقام الميكانيكي إللي عنده هناك بفك الكربراتير وسلمته للورشة، الصنايعي إللي في الورشة شافه وقال لي هيحتاج أكس وباب وبكين سرعة وبك صلانصيه وهيتراجع عليه والحساب 85 جنيه وهتاخده الساعة 5 المغرب، فقلت له اشتغل فلما جيت استلمت الكربراتير والميكانيكي ركبه ومشيت بيها يومين علشان احسب معدل الاستهلاك بالضبط لاقيته مش مكمل 110 كيلو في الصفيحة ده غير أن العربية مابقتش مظبوطة زي الأول، طبعاً اتحرق دمي وقلت لنفسي أنا بأدفع الفلوس علشان أتأدب ولا علشان أرتاح من الهم ده فكلمت الميكانيكي إللي عنده انبارح وقلت له الوضع كذا كذا، فقال هات العربية تاني نشوف إيه الموضوع فذهبت إلى الورشة إنبارح علشان يظبطولي الكربراتير تاني وسبت العربية عندهم ورحت شغلي وبعد ما جيت من الشغل ورحت الورشة أستلم العربية.... تمام ياعم الأسطى، قال لي كله تمام وبإذن الله مش هتسحب معاك بنزين تاني، فقلت له: يعني المشكلة كانت في إيه بالضبط، قال لي: بكين السرعة إللي اتغيرو من عندنا هما إللي كان فيهم المشكلة، فقلت له: وده اسمه كلام.. مش حرام المشورة دي؟؟؟ يعني كده المفروض تسحب أد إيه في الصفيحة؟؟، قال لي: من 170 إلى 180 كيلو داخل البلد، وخارج البلد 200 كيلو في الصفيحة، طبعاً أخدت العربية ومشيت ولسة النهاردة بأشوف هتعمل كام كيلو في الصفيحة.
عموماً هي دي مش أول مرة يتحرق دمي من التعامل مع ورشة الحاج إبراهيم بتاع الكربراتير إللي في شبرا، لأنه كانت هناك سابقة زي الزفت في عربيتي السابقة برده ورحت وجيت ورحت وجيت كذا مرة عقبال ما اتظبط الكربراتير بعد كده، وكانت هتولع مني بسببه علشان كان الكربراتير بعد ما استلمته منه على أساس أنه تمام 100×100 لاقيته بينقط بنزين على الموتور وبرده كان بسبب سوء الصنعة والاستهتار بالعمل القائمين به، بس بصرحة فضلت العربية متظبطة فترة طوييييييييييلة جداً بعد ما عملت الكربراتير (بس بعد عذاااااااااااب مرير).
والله أنا باحكي لكم المواقف دي علشان أنا زعلان على الورشة العريقة دي أن حالها يتدهور بالدرجة دي، ده كمان لما سألت كذا واحد من أهل الخبرة اجمعوا على أن الصنايعية الكويسين إللي كانوا عنده مشيوا وطبعاً دلوقتي عنده مجموعة من الصنايعية معندهمش ضمير وممكن مايكنش الكربراتير محتاج أكس وباب ويعمل عليك شغل وده حصل قدامي بعد ما مشي الزبون من عندهم، ده غير أنهم خربوا الورشة بسبب عدم مصداقيتهم مع الزباين، وشغلهم الخطأ، بس بإذن الله أنا عمر ما رجلي هتخطي الورشة الملعونة دي تاني أبداااااااااااااااااااا، وأبقى الستهال الضرب على دماغي لو رحت هناك تاني
وأخيراً حسبنا الله ونعم الوكيل في كل صنايعي معندهوش ضمير ويأكل أموال الناس بالباطل

الحمد لله علي كده واحمد ربنا انها مش في حاجه كبيره