السلام عليكم ورحمة الله وبركاته
بسم الله والصلاة والسلام علي رسول الله صلي الله عليه وسلم
دي أول مشاركة لي علي منتدي النايل متورز وكنت من قبل قارئ فقط فأرجو أن تكون المشاركة مفيدة حيث انها مبينة علي أحتكاك مباشر مع ال نيو أكسنت فقد من الله علي بسيارة نيو أكسنت اتوماتيك وعاملة معايا 20000 كم .
التقييم :
السيارة : نيو أكسنت -1600 CC
الصناعة :كوري
بداية الموديل :2006
فئات السيار : مانيوال –أتوماتيك
السعر : 84000 اتوماتيك – 77000 مانيوال
أفضل الألوان : السماوي- الفضي –الأسود-الأبيض -الكحلي
سيارات في نفس الفئة : كيا ريو – بروتون جين 2 –برليانس اف ار في –رينو سيمبول –فيات جراند بونتو –تويوتا ياريس –شيفروليه أفيو
المواصفات :
قدرة المحرك :112 حصان عند 6000 لفة وده اكبر تحميل علي الموتور CVVT
أقصي سرعة : 182 اتوماتيك
معدل التسارع : من 0 الي 100 في 11.8 ثانية (تجربة راحدة والعربية عاملة 20000 )
أستهلاك البنزين : السفر :7.5 ليتر في 100 كم لو معدل السرعة من 100 ل 130 كم\ساعة
داخل المدينة 10 ليتر في 100 كم
العفشة: رياضية والامامية ماكفرسون أمريكي , والمساعدين غاز .
الكاماليات الأساسية :
تكييف – باور هيدروليكي –زجاج كهرباء أربعة أبواب - سنتر لوك –مسند يد للسائق – ماب لايت –غطاء للمحرك –راديو سي دي وأربع سماعات –عداد رحلات لرحلتين
كاوتش السيارة : كومهو كوري 14 "\185\65
ملاحظات :
باور موديلات ماقبل 2008 كان كهرباء
موديلات 2009 و2010 لون المرايات والجريد الجانبي والمقابض وحلية الشنطة نفس لون السيارة
موديلات 2009 و2010 لا تحتوي علي لمبة أضاءة في صندوق القفازات
المميزات الرئيسية
أستهلاك بنزين متوسط بصفة عامة وجيد في السرعات ما بين 100 و120 كم\ساعة
أداء المحرك رائع حتي 130 وذلك من حيث التجميع والتسارع وانا بتكلم علي الأتوماتيك
مستوي الضوضاء داخل اكابينة القيادة فوق المتوسط لكون السيارة ذات أداء رياضي ,مقارنة بالتويوتا
التكييف زي معظم التكيفات الكوري جيد جداً تبريداً ومتوسط تسخيناً
العفشة الرياضية توفر أداء ثابت وأتزان جميل للسيارة في المنحنيات يقارب أتزان الهوندا سيفيك مع الفارق طبعاً بس ده عن تجربة انا بتكلم عن سرعات أقل من 140 كم \ساعة
قطع الغيار متوفرة جداً جداً وأسعارها معقولة وكذا مراكز الخدمة متوفرة (وكل قطع الغيار الصيني و التيواني متوفرة )
سعر أعادة البيع معقول جداً
العيوب الرئيسية
العفشة لكونها رياضية والمساعدين غاز رغم أنها توفر الثبات ولكنها ناشفة تسمع يعني أصوات خبط في الأمام لو فيه حفر في الطريق
التابلوه وبطانة الأبواب بالكامل من الفيبر , رغم انه سهل التنظيف وشديدالتحمل , الا انه بيصدر منها أصوات تزييق أحياناَ عند تغير درجات الحرارة
لا يوجد عداد للحرارة ود أستعوض عنه بلمتين واحدة تضئ أزرق في حالة برودة المحرك والأخري أحمر في حالة سخونة المحرك (اللمبة الزرقاء مش موجودة في موديلات ما بعد 2009 ؟؟؟؟؟؟!!!!)
صوت المحرك بيعلو فوق ار بي ام 3000 بصورة ملحوظة
لا يوجد مرايات كهرباء وديه حاجة غريبة جداً بس في حد في المنتدي بيقول انها نزلها مرايات كهربة سعرهم حوالي 700 جنيه بس ده حيستدعي لعب في الضفيرةلأني مش عارف اذا كانت مجهزة لذلك ام لا
لا يوجد فوانيس شبورة
لا يوجد فرامل أيه بي أس وديه مهمة جداً جداً في العربيات الجديدة
مفيش لمبة Check وأيضاً تحذير حزام الأمان ضوئي رغم وجود سينسور في قفل الحزام بس مفيش صوت
مفتاح عادي مافيهاش ايموبليزر
تقييم عام :
السيارة من نوعية السيارات الأعتمادية الأقتصادية , السيارة في مصر تنازلت عن الكثير والكثير من الرفاهية رغم سعرها المرتفع نوعاً ما , فالموديلات الاصلية بها مرايات كهرباء وفوانيس شبورة و ايه بي أس وأي بي دي وكاسيت دفي دي وتكييف تاتش وتحكم في مستوي الالفوانيس اتوماتيكياً والكنبة الخلفية تطوي ومميزات اخري انتزعت من الموديل الغبوري لا أعلم السبب .
لو بتفكر في مصاريف تشغيل وسعر اعادة بيع فالسيارة مناسبة جداً وكذا في هي ذات محرك قوي بس متفكرش في الرفاهية لأنها مش موجودة في والعربية بتتباع أكثر من الريو اللي انا شايف اجمالاً ان الريوعربية مش واخدة حقها بسبب سعر اعادة البيع بس الريو عربية كويسة من ناحية خامات التقفيل والتقفيل ذاته الا ان الأكسنت تتفوق بمراحل من ناحية المحرك.
لو حتقدر تزود في الناحية المالية شوية وتجيب لانسر بومة او نيسان صني فطبعاً ده أختيار صائب جداً بس لو فضلت في مستوي 75000 الي 85000 الف فالأكسنت أفضل , فتبتعد عن الصيني و الماليزي اللي لسه غامض وكمان تبعد عن مشاكل البيع وقطع الغيار في الموديلات الاخري .
مصطلح CVVT :
Continuous variable valve timing
هي تكنولوجيا تسمح بتغيير سرعة غلق وفتح بلوف التحكم في دخول الوقود الي السيلندرات او خروج العادم منها حسب سرعة دوران المحرك RPM .
القادم : غبور والتوكيل –الصيانات – الحوادث –قطع الغيار