و فيه كمان هجوم ضاري من بعض الاعضاء بدون ذكر أسماء على العربية زي ما يكونوا ما صدقوا. لأ وطلعوا العربية فيها عيوب صناعة جوهرية في العفشة عامة في كل النيو سيراتو .
كل ده ليه؟ عشان حادثة فردية؟ و حتى الحادثة دي محدش يعرف لغاية دلوقتي سببها ايه. مع احترامي للمهندس غازي و تمنياتي له بالشفاء و أن يأجره الله في مصيبته و أن يخلفه خيرا منها, بس هو كل واحد عمل حادثة بعربيته ايا كان نوعها يبقى العربية ورق و مقصاتها بيتكسروا لوحدهم؟ طيب ما ياما عربيات الماني و ياباني بتتقلب و تتدشدش رغم كل عوامل الأمان و على سرعات أقل من 100 كمان. في عوامل كتير داخلة في الموضوع من الطريق و السائق نفسه و العربية....الخ.
و معلش يعني المهندس غازي بيحكي و متأكد قوي انه السرعة مازادتش عن 100, رغم ان الواحد و هو سايق كتير بيسرح في حكاية السرعة بالذات ان الطريق فاضي و مفتوح قدامه وحكاية قلبة العربية 10-12 مرة دي بترجح سرعة أكبر من كدة. و واضح انه هو مكنش مركز قوي بدليل النقرة اللي شافها فجأه لدرجة انه معرفش يتفاداها. ايه اللي خلاه يجزم انه فيه عيب في العفشة و ان المقصات اتكسرت قبل ما يتقلب و انه هو رد فعله كان 100% صح؟ في مثل بيقول "ساعة القدر يعمى البصر" و المهندس غازي مهما كانت رباطة جأشه مش معقول يبقى متأكد من كل تفصيلة صغيرة زي ما يكون كان بيتفرج على فيلم.
انا مش باجزم ان العربية ما كانش فيها عيب, بس ده مجرد واحد من الاحتمالات الكتيرة لسيناريو الحادثة. في منتديات تانية نقلوا القصة بتاعت المهندس غازي و كتير من الناس حاولوا يحطوا تصور للأسباب (غير حكاية عيب العفشة)و كتير من كلامهم منطقي جدا.
و لكن تبقى جميع التصورات و التحليلات بما فيها فرضية وجود عيب بالسيارة مجرد استنباطات و افتراضات, و يبقى الموضوع مجرد حادث فردي - رغم جلله لصاحبه شافاه الله - لا يصلح ابدا للحكم على السيارة او تعميم وجود العيب - ان ثبت وجوده في سيارة المهندس غازي - على جميع السيارات من نفس الموديل.