بما إن حضرتك طالب رأى ملاك السيراتو
إحنا كنا فى نفس المقارنة دى قبل ما نجيب السيراتو
بس إحنا كنا بنقارن ما بين أول فئة اوتوماتيك فى الإلنترا و كذلك فى السيراتو
الإتنين نفس الكماليات تقريبآ فرق حاجة بسيطة جدآ
الخامات الداخلية للإتنين لقيت إنهم واحد مع فرق إن الخامات فى الإلنترا ممكن يكون ملمسها أنعم شوية من السيراتو بس بشكل عام الإتنين واحد
العربية عاملة معانا 4200 كيلو و سافرنا بيها سفرية طويلة من الإسكندرية للقاهرة و فى اليوم التالى ذهبنا للفيوم و رجعنا للإسكندرية يعنى المسافة الكلية 875 كيلو
الرحلة دى قدرت أحدد من خلالها المميزات اللى لقيتها فى العربية و كذلك العيوب
نبدأ بالمميزات:
1- العربية واسعة و صالونها مريح جدآ
2- الموتور هادى و مش بتحس بدوشة فى السكة
3- إستهلاك البنزين كان كويس يعنى من هنا للقاهرة 260 كيلو خدت فيهم 20لتر بالتكييف من أول السكة
4- التسارع ممتاز
و أعتقد نفس المميزات دى هتلاقيها فى الإلنترا برضه
بالنسبة للعيوب:
1- العفشة الخلفية بتبقى ناشفة شوية خصوصآ على الدائرى و الفواصل الظريفة بتاعته
بس انا مكنتش حاسس بإن العربية بتعوم من ورا او ان فيه ضعف فى الفرامل بسبب العفشة
انا محستش بأى عيب تانى فى العربية غير ده
بس فى المقابل السيراتو مش بتنزل على الأرض زى الإلنترا مع الحمل
لكن فى المقابل الإلنترا أريح فى العفشة فى الخلفية
ده اللى أقدر أقوله
و فى النهاية صلى صلاة الإستخارة و إنزل إتفرج على العربيتين و شوف مين فيهم اللى انت مستريحلها أكتر
و هرجع و أقولك انا مبسوط الحمد لله من السيراتو بس برضه لو كنت جبت إلنترا مكنتش هبقى متضايق خالص
المفضلات