الموضوع: نداء الى tananybasha

المشاركة الأصلية كتبت بواسطة tamertamer

يعنى احنا مننفعش لازم طنانى باشا طيب ماشى خلاص هنيالك ياعم طنانى جمهورك عيزك

تامر حبيب قلبى يا كبير
هو حد يقدر يستغنى عنك يا باشا
الكبير كبير برضوا
بالنسبة للترخيص
يازين مانقيت المرور بتاع فيصل مرور عك
على العموم
1. هتاخد العقد المسجل و التوكيل اللى معاك ان وجد و 4 صور معاك
2. الرخصة و لو مش سارية خليه يجيب شهادة بيانات و 4 صور
3. شهادة مخالفات المفروض شهر بس هما بيقولوا 15 يوم
4. البطاقة الرقم القومى سارية يعنى ميكونش عدى على تاريخ الأصدار 7 سنين و ال 4 صور
5. هتخش المرور و تخش على الخزنه فى الدور الأرضى تحت السلم و تقوله عايز ورق فحص فنى و نقل ملكية
6. هتاخد الورق ب 30 جنيه و متحاولش تحسب بتوع ايه و ده للسنة الواحده
7. هتشترى ملف كرتون من على الباب ب 2 جنيه
8. تخش بالعربية منطقة الفحص الفنى اللى هى تحت الكوبرى و انت جاى من تحت كوبرى فيصل و تخش بقلب جامد و معاك 30 جنيه
9. معاك طفاية هيقلك غير صالحه و هتضطر تشترى طفاية من عندهم و هى ب 121 جنيه
10 . فيصل من وحدات المرور اللى لغاية شهر 10 اللى فات مكنش فيها كشف بيئة دلوقتى معرفش لو فيه حط فى ايدك 20 جنيه تانى لو عربيتك زيرو هيسقطها من غير ال 20 جنيه
11 . ربنا كرمك و خلصت الفحص و طابقت البصمه على الرخصة او شهادة البيانات و ختمت ورق الطفاية و البيئة طلع العربية بره
12. فك اللوحات المعدنية و خليها معاك او خللى حد يفكها و اديله جوز جينهات
13. قبل ما تطلع رص الورق فى الدوسية و من غير صور غير صورة البطاقة بس
14. تخش على مكاتب التأمين الأجبارى و تعمل تأمين اجبارى حسب المده اللى هتجددها السنة من 79-99 جنيه و برضوا متسألش ليه و اعمله من غير رقم عربية برقم الشاسية و الموتور بس
15. تطلع على الشباك اللى فى الدور الأرضى و تخش تسلم الورق و تحط فى ايدك 20 جنيه
16. هيراجع الورق و يطلعلك اذن دفع عبارة عن
- ضريبة 50 جنيه للسنه
- رسم تنمية 400 جنيه للسنة
- رسوم تطوير و احلال لوحات معدنية 20 جنيه للسنة
- تأمين لوحات جديده 125 جنيه
- رسم استخدام راديو و حاجات تانية 25 جنيه
17. تدفع فى الخزنه و تاخد الوصل الأحمر و الأزرق و تروح تانى على الشباك و تديهم للموظف و هيبقى مكتوب على اذن الدفع اللى هتاخده معاك
18. تقعد تستريح لغاية ما ربنا يكرمك و ينادوا عليك فى الميكرفون تروح تستلم الرخصه يعنى فيها ساعتين لو حظك حلو
19. هتاحد الرخصة و الحمد لله و هتروح على شباك تسليم اللوحات عشان يطلعلك اللوحه
- هنا بقى فيه احتمالين و معرفش نظام فيص ايه
1- انه يديك اللوحات فى ايدك و معاها 4 مسامير و تركبة بمعرفتك
2- انه يطلع معاك عسكرى عند ناس بره بتركب و تديهم 5 جنيه و لو ربنا كرمك رضيهم ب 10 جنيه
20. خد عربيتك و امشى و تشوفهم تانى بعد 3 سنين ان شاء الله لأن الفحص كل 3 سنين و مش هتحتاج العربية و انت بتجدد الرخصه كل سنة