السلام عليكم.........

اخباركم ايه يا جماعة؟؟انهاردة جايبلكم صور للشارع اللي انا ساكن فيه في العاصمة السعودية الرياض لكيفية أو لتقنية حفر الشارع لزرع كابلات كهرباء في الشارع معرفش بئى بيغيروا قديمة ولا كابلات زيادة المهم حفرة لكابلات.......

لمن زار الرياض او يعرفها أو عاش فيها الصور دي في شارع ابن كثير و هو شارع ((جانبي)) وخليكم فاكرين كلمة جانبي دي كويس و هوه موازي لشارع الستين و طريق الملك عبد العزيز(شارع المطار القديم يعني) و عمودي على جسر الخليج.....في حي السليمانية......

و كما قال القرموطي : حته كده..منطقة عدالة يعني......

المهم...أخليكم مع الصور و تعليقي عليهم...........

أولا الحفر نفسها مثار الجدل...عبارة عن حفرة لا يتجاوز عرضه بتاع عشرين سنتيمتر تقريبا أو تلاتين مثلا معرفش اتحفرت ازاي بالجودة و الدقة دي يا دوب على قد الكابلات اللي هتتوصل .....و بتفكرني بعلاء ولي الدين-رحمة الله عليه- في مسرحية حكيم عيون لما بيقول لكريم عبدالعزيز البلطو ضيق فقاله مش أنا دكتور عيون و العين دي قد كده يبئى لازم ألبسلها بلطو صغير على قدها......

الغريب ناتج الحفر اللي بيتشال و بيختفي في ساعتها ليه بقى؟؟ أقولك ليه علشان الناس بتستخدم المواقف دي عادي جدا و بتعدي تركن و تطلع من فوق الحفرة عادي طالما داخل بالكاوتش بزاوية خلاص مفيش مشكلة خالص.....و باين أهوه ان فيه عربيات راكنة............و لما يخلصوا بتجيلهم عربيات بتربة نضيفة جديدة و يدكوها كويس و يسفلتوا.......



و الله شارع جانبي......

والدليل على انه جانبي ان التقاطعات عليها المطبات اللي زي المزيكا دي مش أشارات.....بجد مطبات زي الفل و ناعمة و بتأخد العربية كلها فوقها يعني لو راكب بورش حتى عدي بقلب ميت......
و ممكن لو عندك عيال تأخدهم في العربية تفسحهم عالمطب يعني تأخده رايح جاي بالعربية قال يعني مراجيح و اهو توفير برضه.........



و دي صورة لشارع عمودي عليه لما خلص.........لما بييجوا يسفلتوا بعد ما بيخلصوا بيسفلتوا حته أعرض من اللي كانوا حافرينه علشان ما يهبطش الأسفلت الجديد عن القديم...............



ملحوظة: الأسفلت الجديد هوه الغامق شوية اللي تحت اللاندكروزر لأنه ممكن حد ما يأخدش باله منه لأنه لا يختلف اطلاقا عن القديم..........بس أغمق شوية ولازم يشوفوا شغلهم مظبوط و يحلوا مشكلة فرق اللون........أقترح يأخدوا الشارع كله وش ورنيش أسود علشان يبئى لون واحد بدل المنظر الوحش ده......................بأفكر أعزل ............. الحته بقت بيئة أوي ......و لو أني خلاص راجع مصر ان شاء الله قريبا جدا أخيرا........


أتمنى ينال الموضوع رضاكم...................

أخوكم: أشـــــــــــــــرفــــــ ـــــــــــ.......................