تعرفوا المطاعم الكويسة فى المنصورة

**good09** · 15-12-2009 04:54 PM

ياريت تعرفونا لأن بصراحة رحت بيتزا هت لاقيته مش كويس زى زمان و طبعا غالى و خسارة فيه الفلوس
ياريت تعرفونا مطاعم الكباب و الكفته و الاسماك وخلافه
تكون نضيفة و مضمونة وتكون اسعارها معقولة

**zAzU** · 15-12-2009 08:55 PM

الاسماك و البحريات فى استاكوزا ده فى قناة السويس بعد كابتشينو بس الناحيه التانيه وكابتشينو برده حلو والبيتزا عنده حلوه اوى و احسن بيتزا كلتها الأيام دى عند مطعم اسمه باندا ده فى الجلاء الشارع اللى على الناصيه بتاعته موافى امام مسجد الجمال وده برده حلو اوى المطعم ده و اكله نضيف واسعاره حلوه اوى دى الحاجات الجديده وعندك بقى المعروفين زى كووك دور و مؤمن وكنتاكى وتكا وفى واحد حلو برده بيتزا بارتى على المشايه فى الاخر برده
الكباب والكفته اعتقد احسن ناس العنانى والمحمدى وسمعت عن واحد اسمه ثروت جمبهم بيقولوا حلو بس بصراحه مش متابع الكباب والكفته

**M.Osman** · 15-12-2009 09:24 PM

اهم حاجة متروحش بيتزا ستيشن.. مكان منظر و اكل اي كلام و بارد..
و حاول برضه متاكلش fast food كتير عشان مش صحية

**Abdo_Eldesokey** · 15-12-2009 09:57 PM

جرب مطعم أم كلثوم للأسماك بميدان المحطة ، جامد جداً

البيتزا جربت أماكن كتير ومعجبنيش ولا واحد ، هجرب باندا ده وأشوف

السندوتشات ، أنا من عشاق بهجت وسمير ، هوا ممكن يكون مش أجمد واحد لكن أنا باكل عندهم من أيام ما كانوا في ميت حدر ، لكن لو زودوا الأسعار تاني هقاطعهم

كابتشينوا بردوا جامد وقعدته شيك ، وأنا شايف إنه أحسن خدمة في المنصورة

الكباب والكفتة غالباً كله زي بعضه ، لكن لو عايز واحد معدي ، فيه واحد اسمه قالوش في سمنود ، ده بجد حكاية وبيجيله ناس مخصوص من القاهرة واسكندرية

**mada121977** · 15-12-2009 11:48 PM

عن نفسى بحب اوى جاردينيو اللى جنب مؤمن .. مكان شيك ونضيف والخدمه ممتازه بس الاسعار نااار

**ehabbasha30** · 16-12-2009 11:49 AM

الخلاصة:
لو مهتم بالطعم بس ومش مهتم بالاسعار خد عندك
- الكباب = رمضان الفرع القديم مش الجديد(المحمدى ممتاز والسعر اقل من رمضان كتير بس شتان فى القعدة والخدمة والنضافة والطعم برضو)
- الاسماك = استاكوزا( مش بحب ام كلثوم )
- البيتزا= كابيتشينو والمطعم الايطالى
- وجبات = المطعم الايطالى (ارشحة لك وبقوة اسعارة معقولة جدا جدا والطعم تحفة فى الوجبات والبيتزا
- سندوتشات= كوك دوور ( بهجت وسمير نفس الاصناف والطعم بس السعر اقل شوية) وكابيتشينو كمان جامد جدا

بالهنا والشفا