ان شاء الله ناوي اشتري شانا بيني يا ترى ايه اخبرها اثناء بحثي على النت شفت ناس بتشكر فيها وفي ناس على العكس بتشتم فيها يا ترى ايه رايكم ونصايحكم
خصوصا اني هشتري تقسيط
عرض للطباعة
ان شاء الله ناوي اشتري شانا بيني يا ترى ايه اخبرها اثناء بحثي على النت شفت ناس بتشكر فيها وفي ناس على العكس بتشتم فيها يا ترى ايه رايكم ونصايحكم
خصوصا اني هشتري تقسيط
افتوني يا قوم
شانا بيني ديه بيني وبينك عربيه بويستي خالص
مقلب كبير في عربيه صغيره
ابعد عنها هيا تنفع للأستخدام البسيط جدا ممكن
انا مجربتهاش الصراحه بس اغلب الناس محدش شكر فيها
شكرا يا بباشا على النصيحه بس يا ريت اسمع من حد يكون استعملها ويقول ايه هي عيوبها
أحب أرد عليك رد عملى..وهوجزه فى عدة نقاط..حتى تعم الفائدة على الجميع............
.انا اشتريت شانا بينى من حوالى سنة وتحديدا شهر 5 2008..والعربية ناعمة فى سواقتها ومحركها سوزوكى وعملت بيها لغاية دلوقت 45 ألف كيلو
.السيارة فى رأيى ممتازة بالنسبة لسعرها لكن ما يعيبها جودة المواد الداخلية..والبلاستك الداخلى ردىء نوعا ما..لكن فيما عدا ذلك تقفيلها نضيف جدا وصاجها معقول جدا.
.المشاكل اللى واجهتنى فى خلال سنه ونص كانت مشكلتين..الأولى المساعد الخلفى الشمال تم تغييره بعد ظهور صوت خبط فيه..وللعلم تم تغييره فى الضمان مجانا..وكان فيه تقطيعة بسيطة فى العربية ظهرت بعد سنه واتضح انها كانت بسبب وحدة الأنجكشن ودى غيروها برضه فى الضمان.
.كل ما سبق يحسب للتوكيل خاصة ان فيه سيارات شهيرة فيها عيوب أكتر من كده بمراحل وبدون ذكر أسماء التوكيل بيرفض استبدال القطع التالفة الا على حساب العميل.
.أنا حاليا بعمل بيها مشاوير يومية فى حدود 150 كيلومتر وبسافر بيها أسبوعيا لطنطا وسافرت بيها للمصيف بمطروح وكان معايا الأسرة رايح جاى فى شهر 7 وشغلت التكييف كتير..و انا شخصيا شايف انها عربية زى الفل بالنسبة لسعرها..يعنى شوف ال50 ألف ممكن يجيبولك أيه تانى و انت تقدر تحكم.
.أسعار قطع الغيار قل سعرها فى التوكيل لزيادة عدد السيارات فمثلا سعر طنابير العجل الأمامى وصل ل 110 جنيه فى حين كانت 400 من سنه.
.الخلاصة أنت الوحيد القادر على اتخاذ قرار الشراء ولابد أن تعلم ان العربيات دى قرف..ممكن 2 يشتروا نفس العربية واحد يشتم فيها..والتانى يقول فيها شعر..فأحسن حاجة تشوف احتياجاتك قدرتك الشرائية وبعدين تقرر..قبل ما أنسى..العربية واسعة من جوة وصالونها كويس أوى بس ده جه على حساب الحوض قدام فبقى ضيق ولو هتعمل حاجات معينه قدام لازم تفك الأكصدام..
.أخر نصيحة..اوعى تحط كلمة صينى فى دماغك..ده هيخليك تعتقد ان أى حاجة تحصل سببها ان العربية صينى..أنا لما حصلت مشكلة المساعد كنت شايف ان ده وارد جدا فى أى عربية و خدت الموضوع ببساطة..خاصة لما قرأت مشكلة لأحد الأعضاء فى قسم سوباروا اللى اشتكى من حاجات لايمكن أحد يتصور انها فى سيارة يابانية وسعرها 130 ألف جنيه..وفى النهاية..فكر بهدوء حتى تصل للقرار السليم
اخويا كان معاه واحدة واتقابت بيه فى وادى الريان العربية و شركة ااتامين اعتبرت الحادثة توتال لوص و العربية اتكهنت
عرفنا بعدها ان سبب الحادثة ان الجنط اتكسر بس ما حصلش انه اتخبط و مدير التوكيل لما اتكلمنا مهاه قال بمنتهى البساطة انت هتجيب جودة عربية ب 100 الف جنيه زى الصنى مثلا بعبية ب 50 الف
ده غير ان التوكيل بتاعها مش امناء لان العربية كانت تخش تعمل صيانة و تخرج مخلوع منها حاجات و طبعا اتركبت فى عربيات المحاسيب و يتبع ذلك مجموعة من الخناقات علشان الحاجة ترجع
نصيحتى احسن حاجة ابعد عن الصينى بالذات لو معاك اطفال لسلامتك
الأخ أحمد..انت كدة قلقتنى..لأنك تانى واحد يقول كده جنوط البينى..ياريت لو تسمح تحكى تفاصيل اكتر عن الحادثة و كيفية وقوعها..بس ياريت تطمنا على اخوك الأول و لك جزيل الشكر
قبل ما أنسى..الضمان 3 سنوات أو 100 ألف كيلو..أيهما أقرب..وفيه حاجات بتتغير فى الضمان زى السنتر أو و حدة الأنجكشن أو الأشياء الثايتة الأخرى..لكن المساعدين و الأشياء المتحركة الأخرى ف دى المهندس بيشوف العربية ككل..لو أنت سواقتك وحشة..بيعتبر المساعد البايظ سوء استخدام منك..لكن لو انت بتحافظ على عربيتك و ده بيبقى واضح..ساعتها بيدخل فى الضمان..وبرضه ماننساش حاجة مهمة..انت لو بتروح الصيانة فى ميعادها ومنتظم..فيه حاجات ممكن يدخلها لك فى الضمان ذوقيا..لكن مثلا ليا صديق معاه هيونداى..راح صيانة الألف..وبعدين فضل ماشى بالعربية لغاية ال50 ألف..ولما لقى مشاكل راح التوكيل بتاع هيونداى..وده عاملوه سوء استخدام
استاذ احمد شكرا على النصيحه والف سلامه لاخوك وطبعا انا عندي اولاد وربنا يستر
انا كده هفكر في الكيا بيكانتو
الفرق مش كبير في القسط والكيا محدش قال عليها حاجه
farfasha
شكرا يا باشا على نصايحك وربنا يخليك مرسي جدا