الموضوع: هي السيريون صاجها جامد و لا بيتهيألي

السلام عليكم و رحمه الله و بركاته علي كل الاخوة هنا
انا حصل معايا موقفين العربيه مش عارف بيثبتوا ان العربيه جامدة و لا يمكن بيتهيألي

الموقف الاول كنت ماشي علي كوبري اكتوبر و الكوبري كان كويس فماشين عادي علي 80 كدة و سايب بيني و بين عربيه النترا قدامي حوالي 7 متر كدة و قدامه فاضي فماشي مريح علي البنزين يعني و فجاة لقيته وقف اكن في حائط وهمي قصادة كدة يعني اللي هو وقف فجأة اكنه هيخبط حد و كان واقف في النص بالظبط فلفيت الدركسيون بصراحه لف معايا علي الشعرة زي ما بيقولوا و دخلت علي شماله و هو طبعا العربيه عماله تحدف منه المهم حصلت حكه جامدة بيني و بينه عند اخر العربيه استنيت لما نزلت من علي الكوبري و ببص علي العربيه ملقتش حاجة شوية خدوش من عربيته و لما مسحتها بايدي راحت حمدت ربنا و مخدتش في بالي
الموقف التاني النهاردة بقي ماشي علي 90 فوق الاسعاف كدة بين رمسيس و التحرير و ماشي و قدامي عربيه مازدا 3 و لاذق جنبي من عند الرفرف اليمين الوراني عربيه اوبترا لقيت الباشا بتاع المازدا 3 حدف يمين فجأة من غير طبعا لا اشارات و لا حاجة يعني لقيت بوذ عربيته قدامي المهم اضطريت احدف يمين شوية و و اخدت خبطة جامدة في الاوبترا الرفرف الوراني بتاعي في الرفرف الشمال اللي قدام بتاعه و بصراحه العربيه برضة معومتش معايا يعني مسكت نفسها المهم انا نزلت اتاسف للراجل قبل مابص علي العربيه بتاعتي لانه ملوش ذنب بس لو كنت كملت في بتاع المازدا كان زماني في مكان تاني خالص دلوقتي
المهم لقيت عندة الرفرف اطبق خالص و الكوتش نام علي الارض مكنتش متوقع الخبطة جامدة كدة رحت ابص علي العربيه بتاعتي الحمد لله يعني لقيت شوية خدوش خفيفه جدااااااااا يعني تتشال بكمبوند اساسا مش ظاهرة الا لو ركزت

بصراحه العربيه ثبتت نفسها اوي في الموقفين دول بس انا مستغرب جداااااااا من اللي حصل للاوبترا هي الخبطة جامدة بس مش لدرجه كدة يعني انا بسال الراجل الخبطة دي مني لان الرفرف مطبق جدااااااا قالي شوف عربيتك و انت تعرف !!!!!!!! و انا ابص علي العربيه و مش لاقي حاجة الحمد لله

المشاركة الأصلية كتبت بواسطة motorizer

محمد باشا .. إيه الأخبار

بص هو بصراحة علي حسب مكان الخبطة .. يعني فيه أماكن في جسم السيريون قوية و فيه أماكن بسكوت.

انا قبل كدة خبطت فيه إالنترا خبطة علي شكل زاوية قايمة .. انا داخل بنزينة و هو طالع من الركنة من غير ما يبص و طالعلي يفكرك كمان .. هو عنده فانوس إتكسر وشه و الإكصدام إتفك و انا عندي خدش غائر شوية و تجاريح و المكان أخر الباب اليمين خلفي و الرف رف اليمين ورا.

إنما لو هنتكلم عالأبواب بقي ! بصراحة ورق.

محمود باشا اذيك عامل ايه و اية الاخبار انا الحمد لله كويس

هو اللي انا لاحظته ان الاكصدام ضعيف فعلا و الابواب لسة مجربتش ربنا يستر

بس عند الرفارف العربيه بصراحه كويسة

ربنا يستر طريقنا كلنا انشاء الله

المشاركة الأصلية كتبت بواسطة أبو عبدالله

هيا أكيد لكل حادثة وضعها وحسابتها
ولكن العربيه فعلا صاجها كويس
وانا جربته اكتر من مره وماشاء الله الحمد لله كويسه جدا
حتى الدهان بتاع العربيه مش سهل انه يتشال
اما بخصوص الأكصدامات
فالاكصدامات كويسه جدا من حيث الخامة
ولكن انت ممكن يكون قصدك انها بتفك لما تتخبط خبطه جامده
وده بفضل الكلبسات واظن ان الصانع بيقصد الموضوع ده
لأن نظام الكلبسات كله معتمد على كده انه لو الأكصدام اتخبط جامد
تلاقي الكلبسات اتكسرت والاكصدام زي ما هو

وعالعموم الحمد لله على كل حال

انا برضة ملاحظ حاجة في موضوع الدهان دة انا مغير الرفرف اليمين اللي قدام في التوكيل و حاسس ان دهانه بيطلع بسرعه عكس باقي اجزاء العربيه يعني في الحكات الخفيفه اللي بتاخدها العربيه و هي واقفه بلاقي الرفرف دة فعلا اسهل ان دهانه يطلع عن باقي العربيه معنهم قالولي في التوكيل انهم بيستعملوا نفس نوع الدهان
حد لاحظ الموضوع دة
و بالنسبة للاكصدامات انا نادرا مابشوف عربيه سيريون اكصدامها راكب كويس يعني .كله مفكوك بس بصراحه سليم و دي حاجة برضة كويسة ان شوية كلبسات يظبطوة تاني يعني في الحكات و الخبطات الخفيفه فعلا مش بيتني

المشاركة الأصلية كتبت بواسطة أبو عبدالله

بيبقى هو نفس الدهان
بس الخدمة في عمل الدهان مش زي المصنع خالص
يعني العربيه ببتعالج وبيتدخل الفرن اتوماتيك بدون عامل في مصنعها
اما في التوكيل العامل هو اللي بيدخل الفرن وطبعا ميقدرشي يقعد فيه فتره علشان الحرارة وكده
في النهاية الخطوات بتاعت المصنع غير بتاعت التوكيل فطبعا بيفرق في كفائته وجودته

انا نفسي تفتح انت ورشة و الواحد يجي يصلح و يسمكر عندك احسن و ترحمنا من التوكيل