خلى بالكم البرد قارس اوى

**khalid9411** · 18-12-2009 02:45 PM

ابقى يا احبائى تخلى بالكم قولوا من ايه؟
وانت نازل الصبح تدور العربيه اوعى تدور ولا تشغل المحرك اياك قبل شئ ايه هو؟
تفتح الكبوت وتبص كويس احسن تلاقى قطه بتدفى من البرد ولا اى شئ تانى يوذى المحرك او سيرة او بكرته انا افتكرت قلت لازم اقول لاحبائى

**kemoelord** · 18-12-2009 02:59 PM

هو حضرتك حصل معاك حاجة قبل كده او حصلت لحد قبل كده ؟؟؟
لان لو حصل يبقى ممكن يحصل في اي سيارة

**khalid9411** · 18-12-2009 03:04 PM

طبعا والحمد لله انها جت على قد كده
كسر راس مقاس الزيت

**yssryaae** · 18-12-2009 09:00 PM

والله عندك حق واشكرك على نصيحتك لاخوانك بالمنتدى الحكاية دى حصلت لواحد صاحبى بس عربيته كانت ربع نقل سمع حركة غريبة جوه كبوت العربية وهو ماشى وقف فى جنب وفتح الكبوت يشوف فى ايه تصوروا لقى قطه جوه الكبوت نطت فى وشه وجرت فى الشارع فياريت الكل ياخد باله مش بس جوه العربية لا فوق العجل كمان وتحت العربية لان العربية بتبقا سخنه والقطط بتدفا تحتيها وربنا يسترها معانا

**SBkr** · 18-12-2009 09:28 PM

القطط بتظبط نومة مريحة جوة حوض المحرك وكمان سعات بتاخد ورك او دبوس او صدر وتقعد تأكل علي الفيبرة الي بتغطي غطاء التاكيهات المحرك وتسيب المكان موش نضيف واقعد انضف لدرجة سيبت جوانتيات بلاستيك مخصوص في العربية علشان الموضوع دة بس. طيب دلوقتي جمعيات الرفق بالحيوان لو عرفت مكن تطالبنا بأننا ننزل كل ساعتين نشغل المحركات نسخنها علشان ندفي القطط وهية نايمة لأن المحرك في البرد دة بيبرد عالطول ..... ومن دلوقتي ياشباب اي حد عندة عيب في الشكمان وبيصدر صوت واي حد مكنتة موش مظبوطة وبتعمل ارتجاج يعالج المشكلة فورا علشان القطط لو نايمة متصحاش لأن القطط زعلها وحش قوي كذلك ممكن نواظب كلنا علي وضع مخدة او اي حاجة قطن مريحة في الفراغات المسطحة علشان القطط تنام وبرضة مفيش مانع نغسل حوض الماتور كويس من اي زيوت وشحوم انتوا عارفين القطط نظيفة وفي نفس الوقت مبتستحماش لأنها مبتحبش الميه ......
علي فكرة بقي احنا كلنا مفتريين احنا مفروض نسيب الزجاج مفتوح تلت فتحة علشان القطط تخش تنام جوة العربية بدل البهدلة ....... كل سنة وانتم طيبين

**samirayad** · 18-12-2009 10:05 PM

علي فكرة بقي احنا كلنا مفتريين احنا مفروض نسيب الزجاج مفتوح تلت فتحة علشان القطط تخش تنام جوة العربية بدل البهدلة

وياريت لو نحطلهم شواية سمك كمان جوه الصالون
علشان يسلوا شويه بالليل
مع لفة سمك بورى على شبار وشوية رده بالمره
وياسلام
لو حطينلاهم كمان بورى و5 بواكى معسل
يحبسوا بعد الأكل

دا كده يبقى ميت فل وأربعتاشر

**shanodaa** · 18-12-2009 10:18 PM

دي مشكله كبيره جدا ممكن تخليك تحرم تركب العربيه تاني

**هيثم** · 18-12-2009 10:47 PM

انا عندى قطتين صغيرين مقيمين فى حوض الماتور بصفه مستمره
ومش لاقى حل معاهم

**samirayad** · 18-12-2009 10:52 PM

هاتلهم كلب وأربطه بسلسله بجوار العربيه

مجرد ما حيشوفوه
مش حيفكروا يقربوا من العربيه

**SBkr** · 18-12-2009 11:21 PM

مادام مقيمين بإستمرار احتمال تضطر تكتبلهم عقد ايجار

وبعدين كلب اية يا استاذ سمير طب اية رأيك انا كذا مرة اشوف قطط مثبتة كلاب انتباة وموش عارفة تعمل معاهم حاجة - بوري وشبار طبعا ياعم السمك عندكم الله ينور سمك القناة الكل بيحلف بية يمكن وانا نازل اجازة اعدي علي الإسماعيلية اشتري شوية سمك حلوين