السلام عليكم و رحمة الله و بركاته
رغم إنى من هواة الجرى جدا بس مش بحب الشد مع حد لكن فى بعض الأحيان تلاقى ناس كده مصرة يتعلم عليها تقوم معلم عليه و سايبه و باى باى و سمعنى بودعك:
نبتدى الأول بالجين 2 الأتواماتيك بتاعت اخويا موديل 2007:
علمت بيها على جولف 4 كنت رايح الشغل فى بورسعيد من القاهرة و معادى الساعة 10 و خارج من القاهرة على أول الصحراوى الساعة 8:45 بالليل و طبعا كنت شادد فى الجرى علشان ألحق ميعادى المهم كانت الجين 2 لسه مش منتشرة و عديت جنب أخونا بتاع الجولف سخن و راح جارى ورايا حصلنى فى كارتة إسماعلية بالعافية علشان كان فى طوابير و كان نفسه يعرف المشكلة عنده فين بالظبط
ده غير المازدا 3 و الكرولا القديمة و اللانسر بكل موديلاتها حتى الشارك و العديد و العديد مش فاكرهم كلهم مع إنى مش بحد الشد مع حد.
نيجى بقى للواجا هانم بتاعتى 2006 أتوماتيك:
على الرغم من إن المحرك عندى ميتسوبيشى 1600 ال 102 حصان بس باعدى من أى لانسر بردوا بسهولة و لما يشد معايا بيبقى الفارف لصالحى بيجى 50 متر كده مع إن الواجا ما بتعديش ال 175 كم / س فى الطرق العادية يعنى مش منازل.
ده غير بقى الكرولا القديمة و حاجات تانية.
نيجى بقى للى علم عليا:
فى الجين 2 كانت مرسيدس إس 500 لما كنت باشد مع بتاع الجولف دخل وسطنا و بصلنا إحنا الإتنين و إبتسم و بعدين ..... ما شوفناهوش تانى مع إن الكارتة فى إسماعلية كانت زحمة
أما الواجا فاللى علم عليا فيها كانت الكرولا الجديدة 1600 و بى إم 318 مش عارف كان مصر يشد معايا ليه بس الفرق بينا كان مش كبير.
كفايا كده بقى بس يا ريت الناس كلها تبطل موضوع الشد ده و مش كل واحد قلب نورأو ضرب كلكس نجرى وراه أو نقفل عليه ممكن يكون وراه حاجه و عاوز يلحق معاده فا يا ريت مش كل حاجة تستفزنا لأن فى بعض الأحيان بيبقى الواحد بيجرى علشان حاجة مهمة يجى واحد مش فاهم يشد معاك و يقفل عليك بدون أى سبب و يمكن لسه الموضوع حاصل معايا من 10 أيام كنت مسافر من بورسعيد للقاهرة لأن الوالد كان مريض جدا و حالته متأخرة جدا و معايا زوجتى و إبنى و ماشى 150 كم / س الساعة 5 المغرب و واحد مش عارف إيه مشكلت جيه جانبى و أنا مش شايفه خالص و زنق عليا بدون سبب كان هاليبسنى فى الحاجز فى وسط الطريق و كانت هاتبقى حادثة مروعة و لما قدرت ألملم نفسى و أتمالك أعصابى كان فات يجى ساعة و أنا أصلا كنت قلقان جدا على وادلى و للأسف لما وصلت كان توفاه ربنا إدعولوا ربنا يرحمه و و الله ساعتها بقيت نفسى كنت أمسك اللى زنق عليا ده و أخنقه بس أقول إيه ربنا يهديه و يغفر لينا جميعا علشان كده يا جماعة بلاش جرى و ربنا يديكم بلاش نشد مع حد هوا مش بيشد معانا أصلا.
المفضلات