صيانة ال 60 الف للماتريكس

**osamaelbaz** · 18-12-2009 07:18 PM

انا المفروض اعمل صيانة ال 60 الف للماتريكس يا ريت حد يقولى بيتعمل فيها اية وتكلفتها كام وتنصحونى بأية الى اعملة متشكر مقدما على الردود

**bassam nagy** · 19-12-2009 10:42 AM

تغير سير الكاتينة والباور والتكييف ودينامو
الكشف على تيل الفرامل تغيير فلاتر هواء وبنزين وبوجيهات
مش عارف التكلفة هاتبقى كام بس تقريبا هاتبقى 1500
لو فى التوكيل

**osamaelbaz** · 19-12-2009 11:42 AM

متشكر جدا يا بسام طب ممكن اجيب الحجات دى واعملها برة ولا هيبقى فية مشكلة

**bassam nagy** · 19-12-2009 11:55 AM

مفيش مشكلة خالص الضمان شغال لحد 60000 الف كيلو وكدة هو خلص
ولو عملتها برة مش هاتاخذ نصف التمن الية هاياخذة التوكيل بس اهم حاجة هات حاجاتها الاصلى وبالذات سير الكاتينة

**monmonmon** · 19-12-2009 02:32 PM

انا عند 58 او 60 ألف كم مكنتش غيرت اى حاجه فى العربية نهائيا بخلاف الزيت و الفلتر بصفه دوريه لانى مش بعمل صيانه فى التوكيل

اشتريت من غبور ابو رواش و فرع وسط البلد الآتى:

سير كاتينه

بلية كاتينه

سير دينامو

سير تكييف

تيل فرامل

فلتر بنزين

فلتر هواء

بوجيهات من بره التوكيل

زيت شل 10,000

فلتر زيت

بدون الزيت التكلفة كانت حوالى 1000 جنيه

روحت لميكانيكى بتعامل معاه من زمان فى عين شمس و اخد حوالى 250-300 جنيه و خلص الكلام ده بسرعه فى اقل من ساعتين يمكن.. انا عملت صيانة ال 5000 لعربية i10 فى التوكيل فى يوم كامل من 9 صباحا رجعت البيت 9 مساءا علشان اغير زيت و مش ناوى ادخله تانى و يولع الضمان

للعلم التوكيل بيغير سير الكاتينه بس بحوالى 200 او 300 جم

لو هتعملها عند ميكانيكى اتأكد انه فى فلتر البنزين (موجود تحت الكنبة الخلفيه) ركب اويل سيل من الفلتر القديم علشان من غيره العربية مش هتدور

انا الان عامل 74,000 كم و الحمد لله اداء العربية افضل من الاول

بالتوفيق

**monmonmon** · 19-12-2009 05:16 PM

مصنعية التوكيل فى تغيير سير الكاتينه بس 250 جم

مصنعية التوكيل فى صيانة ال 60,000 240 جم

معرفش دى شامله تغيير باقى السيور و لا ايه؟ بس انت لما تروح عادى جدااااا انك هتلاقيهم فى امر الشغل كاتبين المصنعية المتوقعة 600 جنيه مثلا لانى لما روحت صيانة ال 5,000 لل i10 دخلنى مهندس معرفه قديمه علشان مكنتش حاجز و مكانوش راضيين يدخلوا العربية و كان كاتبلى المصنعية المتوقعة 210 باين و على ايه تغيير زيت و فلتر

روح لأى ميكانيكى فاهم و بتثق فيه و العملية مش هتزيد عن 200 او 300 جنيه لان اللى التوكيل بيعمله ده سرقه (و كل التوكيلات زيه بيلموا فلوس و خلاص) و بعدين الضمان عندك يعتبر انتهى

**osamaelbaz** · 19-12-2009 09:47 PM

متشكر جدا على الردود وانا ان شاء الله هجيبلها كل حاجة من واحد موزع لهيونداى حجاتة كلها اصلية وهعملها برة بأذن الله

**Ahmed Anwer** · 19-12-2009 10:04 PM

واحد صاحبي قبل عرض خصومات قطع الغيار

عمل صيانة الستين الف للماتريكس في ابو رواش كلفته 1600 جنية

يعني اعتقد دلوقتي هتنزل مائتين و لا تلتميت جنية

فالأفضل تكلم التوكيل و تخلي مهندس الاستقبال يقولك تكلفتها الفعلية حاليا

و أسأل بره و شوف الفرق يستاهل و لا لأ

علي فكرة الضمان اتمد لكل سيارات هيونداي بأثر رجعي لمئة ألف كم أو ثلاث سنين

فالفرق لو بسيط اعملها في التوكيل و حافظ عالضمان

**osamaelbaz** · 20-12-2009 11:05 PM

انا جبت قطع الغيار من عند واحد عندنا فى المنصورة شارع الحسنية اسمة عادل وديع مجموعة السيور جبتها ب 250 وبلية الشداد الصغيرة ب 60 وبلية الشداد الكبيرة ب 60 وجبت منة تيل امامى كورى ب 65 وخلفى كورى 65 وفلتلر الهوا ب 35 وفلتر البنزين ب 80 على فكرة الحجات دى كلها اصلية ماعدا التيل الخلفى والامامى كورى كويس بس مش هيونداى وانا واخدة منة بضمان لو مش كويس هرجعهولة وان شاء الله اعملها برة واقولكم على الاخبار