تجربه قياده المحترمه تويوتا كورولا موديل 2009 - يابانى

السلاك عليكم ورحمه الله وبركاته

رجاله الياباني عامليين ايه اتمنى تكونوا في افضل حال


اتيحت ليا النهارده تجربه كرولا الجديده 09 الياباني

العربيه ايجار ماشيه 45 الف كيلو بصراحه مركزتش في الاوبشن بس هي من غير فتحه وبجنوط

طبعا الناس الي قبلي محترموش العربيه تماما انا صحبي اجرها وسافر بيها ولما رجع بيها جربتها في الهرم وطلعت بيها على الدائري وجريت بيها وغرز وكده

نيجي بقى للتقييم

الاداء ( محرك وفتيس)

فتيس اوتوماتيك عادي مش ام ام سلس لابعد الحدود فعلا ومتحسس بالنقلات تماما فتيس ممتاز بصراحه وكيك داون استجابته حلوه جدا جدا اول ما تدوس بنزين الكيك داون تنزل علطل


المحرك صوته هااااااااادي جدا جدا لابعد الحدود غير مزعج بالمره نهاااائي انا كنت بحرق لحد 6 ومفيش اي صوت مزعج تماما وعزل الصوت عن الكابينه حلوه جدا جدا
بس التسارع مش قوي مش عارف ممكن كنت ماشي عكس الهوا مش عارف

اولاني وتاني حلوين التالت بيتاخر شويه بس في اخره بيحرق حلو الرابع مجبتوش لاخره بصراحه انا جبت بيها 180




(العفشه والثبات ) بصراحه الكرورولا القديمه انا كنت بركبها كتير مع صحابي فعلا عربيه متعرفش حاجه عن الثبات 120 شكرا على العربيه انت ماشي في البحر مش في الشارع وليها نطه على الطريق بس نطه محدوده مش بتتحول لمراجيح بس البادي بتاعها تقيل بالنسبه للجديده
كنت بمشي مستقيم احسها تقيله اول ما تخطف الدركسيون ترووووح

الجديده بقى حاجه تانيه فعلا العفشه في ناس بتقول انها انشف من القديمه انا بصراحه شايف العكس عفشه محترمه جدا جدا جدا وناعمه وتعمدت اني البس بيها بلاعات ومطبات وعربيه مجنطه ولا مره رزعت اخرها تسمع حركه المساعد وبسلاسه ونعوميه في حين القديمه في بعض البلاعات المساعد بيزعل شويه

الثبااات بقى الحمد لله العربيه دي غيرت رائي عن الكورولا اخدت بيها غرز قطم على 140 كانت متماسكه حلو و160 كمان متماسكه حلو هوه انا من 100 ل 160 محستش في فرق ثبات وحاسس الكاوتشات فارشه على الارض وفي الغرز العربيه جوانبها مش بتمييل جامد زي القديمه بصراحه كانت تعاملها حلو جدا بس في نفس الوقت انت حاسس ان العربيه خفيفه مش من العربيات التقيله زي ركوبه الالماني مثلا الالماني انت حاسس انك جوا مصفحه فعلا بس الكورولا حلوه عشان ثابته وخفيفه ومرنه في السواقه جدا

باور محترم القايمين الاماميين معملوين بطريقه صايعه جدا ابعاد حلوه وزاويه القايم حلوه لا تحتاج قطعه زجاج صغيره جنب المرايا زي السيفيك مثلا ولا تحتاج تفير قعدتك عشان تشوف الجوانب

صاحبي الي سافر قالي بعد 180 الباور بيتقل جدا والله اعلم

عن نفسي بعد ما عديت 160 حسيت ان العريه خفت شويه حلويين وبقيت لازم اركز في الغرز وغيرت مساري على 180 بس باحترام كانت كويسه

من فضولي الشديد نفسي اعرف لورميت الدركسوين شويه حلوين العربيه هتعمل ايه على 180

بس فضلت اني اكون لوحدي مش باخد غرز

وانتهزت فرصه وانا في وصله الدائري الي بتودي اكتوبر على 180 مشيت على اليمين وروحت رامي الدركسيون شمال جامد شويه الشنطه كانت هتلعب بس لميت العربيه علطول الحمد لله

بعديها وقتي قولت لازم اجرب الفرامل روحت مهدي سنه 150 وروحت كاابس العربيه محترمه في فرملتها ومزحفتش والغريب اني محستش بعمل ال abs ولا رجرجه ولا الهوا

مع اني بحسه في المازدا والميجان وبحس رجته في الرمل

انا بصراحه مش فاهم النقطه دي هل ال abs اشتغل ولا لا مع اني كبست جامد على الفرامل المفروض لو مش فيها abs تزحف

وللعلم كمان الراجل حاطط تيل مش اصلي ومطلع ريحه شياط معفنه وكمان في حاجه في الطنابير بس بتبان على 170 مثلا وكمان في صوت خبطه بيطلع في الدركسيون لو كبست فرامل على غفله

بس ك عفشه اكتر عربيه شوفتها تصلح للبلاعات والشوارع والالغام الي عندنا دي هي الكرورولا بكل موديلاتها



الداخليه العربيه وسعها حلو للامام والخلف بس ممكن القديمه للخلف فيها مساحه لارجل الركاب الخلفيين اكتر بس الجديده كده كده افضل واحلى ومش تدايق في ركوبها تماما
وبرضو محترمه خاماتها من جوا مش اي كلام يعني بس تقليديه خصوصا العدادات مفيهاش افتاكسات ومنطقه التابلوه الكاسيت والتكييف تقليديين جدا بس برضو انت راكب عربيه زيرو ومحترمه ومش حاسس انك راكب موديل قديم اوي بس تقليدي

كنت ركبت من فتره الجنوب افريقي مش عارف ليه حاسس الياباني افضل ممكن عشان فرق الفتيس مخلي في فرق في مشي العربيه عشان الفتيس الجديد بيخليك تحس انك راكب مانيوال
والعفشه مش فاكر اوي بس اظن الياباني انعم ممكن..؟؟ ياريت الي جربوا الاتنين يقولوا عشان انا مش عايز اظلم الجنوب افريقي عشان بحبها برضو وشييك جدا


بس برضو صاحبها كان بيشكر فيها جدا


باختصار الكورولا تستحق انها تكون السياره الاولي في مصر

وانصح اي حد عايز عربيه عائليه فهي لايوجد مثيل لها فعلا في النعومه ومع الموديل الجديد الثبات بقى حلو ومطمئن الى حد كبير

هي طبعا لم ترقى الي ثبات المازدا والسيفيك والاوكتافيا بس ك عربيه عائليه افضل منهم كلهم بدون ادني نقاش الي غاوي بقى ثبات وجري عنده بقى سيفيك برافو مازدا كلهم في نفس المستوى والسعر والاوكتافيا برضو مصيبه ثبات ومتانه وده ما يميمز الالماني عن باقي العاالم (متانه صااج جدا جدا وامان واستحماال مع ان عفشته كله ناشفه)


اتمنى يكون التقييم عجبكم واتمنى اشوف ردودكم واتمنى نشوف نقاش حضاري يرقى بالجميع ويفيد من يريد الشراء بدون تعصب لماركه معينه وبدون اراء سلبيه غير واقعيه

على فكره انا لو معايا العربيه دي هنزلها جنط 17 او 18 ومش هقلق على العفشه

شكرا على التقييم الشامل ده .......
بس انتوا بتفحتوا العربيات المتأجرة ليه كده .... العربية على كده تتاجر سنة وتترمى

شكرا على نقل تجربتك وعلى الموضوع الجميل

تقييم جميل ولكن لى تعليق على عدة نقاط
الكورولا الجنوب افريقى الباور بتاعها اثقل من اليابانى وانا بعتبره اكثر من ممتاز فى الجنوب افريقى لان العربيه ممكن تسوقها على سرعات عاليه جدا بايد واحده وعلى فكره مش معنى انه اثقل انه رخم وثقيل لا اطلاقا الباور بتاعها خفيف وبيثقل على السرعات العاليه فعلا
بالنسبه للثبات انا بحس ان الجنوب افريقى اثقل من اليابانى (يمكن بسبب التصفيح اسفل السياره +جنوط 16 انش) والكورولا فى الغرز الضيقه كويسه جدا لحد 160 بعد كدا ممكن غرز بس مش ضيقه قوى يعنى السيفيك تتفوق فى النقطه دى تحديدا وتحس ان العربيه كلها بتتحرك قطعه واحده مش بتسيب من قدام ولا وراء خصوصا ال vti فيها نظام ثبات الكترونى VSA بيخلى العربيه ما تنحرفش عن مسارها
بالنسبه للماذدا 3 انا بكره ركوب العربيه دى بتنطط زى البومه بالظبط وطبعا التقييمات العالميه للعربيه دى ما جربوش فى فواصل كبارى ولا فى مطبات هواء علشان يحكموا على ثباتها صح ولكن للامانه ثباتها على الملفات كويس (بدون مطبات هواء طبعا على الملف)
بالنسبه لنقطة ال ABS غالبا العربيه اللى انت ركبتها ما فيهاش لان ال ABS فى 1.6 الخليجى نادر جدا جدا تلاقيه فى موديل اقل من الهاى لاين ولكن ده ما يمنعش ان بعض المستوردين بتجيبه بسعر اعلى عادى
وعلى فكره الجنوب افريقى 2010 فيها اوتوماتيك عادى زى اليابانى وصوت الموتور فيها انعم من الخليجى بكتير
تحياتى

والله الكورولا طول عمرها عربية كويسة

لكن فى الواقع سعرها غالى جدا جدا بدون مبرر

يعنى كان المفروض سعرها ميزيدش عن 125 لأعلى فئة خصوصا إنها بقت تجميع جنوب أفريقى وإن مواتيرها بتتصنع فى الصين

شكرا على التقرير

تقرير ممتاز بس فعلا الخليجي غلبا مفهوش abs

اقتباس:

---

المشاركة الأصلية كتبت بواسطة abo samra

تقييم جميل ولكن لى تعليق على عدة نقاط
الكورولا الجنوب افريقى الباور بتاعها اثقل من اليابانى وانا بعتبره اكثر من ممتاز فى الجنوب افريقى لان العربيه ممكن تسوقها على سرعات عاليه جدا بايد واحده وعلى فكره مش معنى انه اثقل انه رخم وثقيل لا اطلاقا الباور بتاعها خفيف وبيثقل على السرعات العاليه فعلا
بالنسبه للثبات انا بحس ان الجنوب افريقى اثقل من اليابانى (يمكن بسبب التصفيح اسفل السياره +جنوط 16 انش) والكورولا فى الغرز الضيقه كويسه جدا لحد 160 بعد كدا ممكن غرز بس مش ضيقه قوى يعنى السيفيك تتفوق فى النقطه دى تحديدا وتحس ان العربيه كلها بتتحرك قطعه واحده مش بتسيب من قدام ولا وراء خصوصا ال vti فيها نظام ثبات الكترونى VSA بيخلى العربيه ما تنحرفش عن مسارها
بالنسبه للماذدا 3 انا بكره ركوب العربيه دى بتنطط زى البومه بالظبط وطبعا التقييمات العالميه للعربيه دى ما جربوش فى فواصل كبارى ولا فى مطبات هواء علشان يحكموا على ثباتها صح ولكن للامانه ثباتها على الملفات كويس (بدون مطبات هواء طبعا على الملف)
بالنسبه لنقطة ال ABS غالبا العربيه اللى انت ركبتها ما فيهاش لان ال ABS فى 1.6 الخليجى نادر جدا جدا تلاقيه فى موديل اقل من الهاى لاين ولكن ده ما يمنعش ان بعض المستوردين بتجيبه بسعر اعلى عادى
وعلى فكره الجنوب افريقى 2010 فيها اوتوماتيك عادى زى اليابانى وصوت الموتور فيها انعم من الخليجى بكتير
تحياتى

---

ممكن تكون العربيه مفيهاش abs وده كده ميزه عربيه فراملها حلوه جدا بدون الجهاز ده

الجنوب افريقي محكمش عليها مسوقتهاش

اول مره بصراحه اشوف حد بيشتم في المازدا دي من افضل العربيات الي ركبتها في الفئه دي خصوصا في التنطيط مفيش ولا في اي شارع العربيه دي تحفه بجد خاصه لو بجنط دي عمرها ما بتتنطط نهائي لو ماشي فين ومريحه جدا في الخلف رغم ضيق المساحه وعن تجربه سنوات وكزا عربيه

اقتباس:

---

المشاركة الأصلية كتبت بواسطة feras_elngar

شكرا على التقييم الشامل ده .......
بس انتوا بتفحتوا العربيات المتأجرة ليه كده .... العربية على كده تتاجر سنة وتترمى

---

+11111