طيب احنا مش هانروح بعيد
تعال نشوف افلام فتره الاربعينات والخمسينات والستينات
هتلاقى الموظف الحكومى (وهى وظيفه كانت لها هيبتها فى الماضى السحيق ولكن الان لم تعد تساعد صاحبها على اكل العيش الحاف كما يقولون ) ... هتلاقيه أيامها عايش فى شقه جميله وواسعه ويرمح فيها الخيل .. أما الان فالموظف عايش فى غرفه مترين فى مترين وكل سنه ولا سنتين بيغير الغرفه علشان قانون الايجارات الجديد
هتلاقى الموظف فى الافلام القديمه عنده خادمه صغيره تساعد زوجته فى الاعمال المنزليه وتجيبلهم الخضار من السوق .. دلوقتى الخادمه ممكن تعطف على الموظف وتديله حسنه
هتلاقى الموظف رايح شغله فى مواصلات اّدميه وقاعد مستريح سواء فى الترام او الاوتوبيس او حتى الحنطور .. دلوقتى شوف الموظف وهو رايح الشغل ويقعد يستنى علب السردين (الاوتوبيس) بالساعات علشان يوفر شويه من فلوس المواصلات
هتلاقى الموظف فى الافلام القديمه دى بيروح يتفسح فى أماكن جميله على النيل او ممكن يسافر رأس البر ولا جمصه فى الصيف ... دلوقتى الموظف علشان يروح يصيف يبقى هايبيع عفش البيت
هتلاقى الناس فى الافلام القديمه لبسها شيك ولابسين بدل وشكلهم نضيف .. دلوقتى هتلاقى فى الافلام البلطجيه ومسجلين الخطر
هتلاقى الناس فى الفيلم مقدرين قيمه التعليم والوظيفه الحكوميه ... دلوقت بيقدروا اللى يسرق أكتر ويبقى زعيم عصابه
المفضلات