الموضه فى الثمانينات والتسعينات
السلام عليكم ورحمة الله وبركاته
امبارح بالليل كنت قاعد لوحدى لقيت نفسى عمال استرجع ذكريات وافتكر حاجات كانت غايبه عنى وبالمقارنه لقيت حاجات كتيره اوى كانت جميله جدا فى حياتنا وللاسف اختفت وطبعا حاجات دلوقتى افضل من زمان بكتير
ماتيجوا نستعيد ذكرياتنا الجميله وبالمره الجيل الجديد اللى مالهمش اخوات اكبر منهم يعرفوا الشباب كان عايش ازاى فى الفتره دى
مش هابعد اوى بس هاقولكوا على حاجات انا افتكرتها
كنت عايش مع والدى ووالدتى واخين اصغر منى فى السن كنت فى ايام اعدادى فى اوائل التسعينات وكانت البنطالونات الجينز اهم حاجه فى السن ده المدارس كانت بتعترض طبعا عليها لازم الزى الخاص بالمدرسه فكان متعه حقيقيه ان الواحد يجيله خروجه ويلبس بنطلون جينز واهم حاجه طبعا الماركه كان فى ساعتها levi\'s و داندى ولي واشهر بنطلون طبعا الكيلفن كلاين والتيشرتات وهاى كول اساسى والاحذيه كانت الكوليدج والريدونج والكات والبلودوكتور
اه وافتكرت قبل الموضه دى موضه الكوتشى كان فى اميجو بينور ولوتو وحاجات تانيه كتير
وطبعا ماتنساش الكاب اللى عليه شيكاغو >>>>>>>>>ده بالنسبه لللبس
بالنسبه للاشياء الشخصيه كان اهم حاجه طبعا محفظه ملونه وسلسله وانسيال وساعه فى اليد اليمين ومشط فى جيبك وبالنسبه للمدرسه كانت الموضه شنطه بنورس او شنطه اكتف او اكلسير كارتون
وبمناسبه التليفزيون كان القنوات الاساسيه الاولى والتانيه والثالثه وبعد كده ظهرت القنوات المحليه الى القناه الثامنه وبعد كده نايل تى فى والقنوات المتخصصه وماكانش اى حد عنده دش الا ناس معينه طبعا
والدى الله يرحمه قالى انه فضل مستنى التليفون الارضى لمده سبع سنوات فى سنترال المهندسين
الخروجات كانت صالات البلياردو والبولينج والحدائق والنادى وصالات الديسكو وكنا بنعمل حفلات زمان ونطبع التيكت ونبيعه لمعارفنا وكانت اهم صاله فى الوقت ده ناريمان اللى موجوده امام الماريوت وطبعا كان المواصلات اتوبيس او تاكسى والتاكسى كان بياخد من 100قرش وانت طالع ياعنى كنت بروح المدرسه انا واتنين اصحابى بـ 150قرش متقسمبن علينا احنا التلاته من شارع احمد عرابى للدقى والنهارده نفس المشوار ده اقل حاجه 7ج
وتذكره الاتوبيس كانت بتبداء من 5 قروش
نتكلم عن ايه تانى ................ اه
بالنسبه بقا للاغانى طبعا كل واحد مننا كان عنده مكتبه للشرايط الكاسيت واهم حاجه طبعا عمرو دياب ومحمد فؤاد وحميد الشاعرى وحنان
مش محتاجين طبعا اقولكوا الاغانى كانت ايه
نيجى بقا للعربيات كانت عباره عن 128 و 127 و132 و125 والفاجر الغنى اوى كان معاه بى ام شارك وطبعا ماكنش فى حاجه اسمها جنوط لان الجنوط كانت بمبلغ وقدره كان اهم حاجه الكاسيت والسماعتين والاوكلايزر ابتداء من الجينسون 2002 الى 6006 تاتش
وزمان الواحد كان لازم يخفف الجنبين بالنسبه للشعر ويعمل دوجلاس ومش هانسى البناطيل الشارل استون وبعدها البناطيل الباجى
ومكانش فى موبايل ولا دش كان الاختراع اللى قلب الدنيا هو البيجر
ده اللى قدرت افتكره انتوا بقا فاكرين ايه ؟؟؟؟؟؟؟؟؟؟
والجيل الجديد ايه رائيه فى الكلام ده ؟؟؟؟؟؟؟؟؟؟؟
