الموضوع: ايها اشد فى التحمل و الاعتماديه لوجان&فرنا

المشاركة الأصلية كتبت بواسطة superiorboy

بص يا باشا انا معايا لوجان و ارشحهالك بصراحة
ليه
اولا عالية عن الارض و مبتتاثرش بالتحميل
موتورها حلو جدا عليها (هي بتنزل بره بموتور 1400 على نفس البودي)
وكيلها محترم جدا
سعرها منافس و لو كانت بجكارك كانت ممكن تدخل في اخر ال70 بداية ال80 و بالتالي دي تبقى فقة سعرية مختلفة
واااااااااااااااااااااااا اااااااااسعة جدا جدا
عفشتها تحفة (ناعمة و قوية و كلها حنية :) )
ثباتها ممتاز
استهلاك للبنزين رائع بالرغم من ان تكنولوجيا الموتور من سنة 99 (موتور ميجان 1)
امان كويس جدا (ايرباج في الفل اوبشن)
فرامل احسن من الفرنا
قطع غيار حاليا اسعارها عند الوكيل معقولة ما بالك مع انتشار العربية برة هتبقى عاملة ازاي؟!
تكيفها على خلاف الاوروبي تحفة و بصراحة كان مفاجأة ليا (انا كنت في عز الصيف بشغلو على 2 و شوية و اسقع و اطفيه) و مبيأثرش على سحب العربية خااااااااالص
واخدة 3 نجوم امان في اختبارات euro ncap
عربية شغالة في المغرب تاكسي (دليل على اعتماديتها)
مش معقدة ميكانيكيا

=====================================
نيجي للعيوب (اللي لا اعتبرها عيوب و لكن للأمانة)

صوت الموتور عالي نسبيا (في فترة التليين بعد كدة على حسب كلام الناس اللي عدو ال 5000 هدي بكتيير)
الموتور كامة واحدة 8 صباب (تكنولوجيا قديمة)
رعشة بسيطة في الفتيس (في عربيات و عربيات لأ)
حرارة عند الدواسات نتيجة مواسير التكييف السخن (ليها عازل عند الوكيل و بيحطها للناس اللي بتشتكي من الموضوع ده)
الكاسيت audio بس و بعض العربيات فيها mp3 (دفعات و دفعات بس نفس الماركة)
مكان زرار الكالكس بعض الناس مش حباه بس مع التعود خلاص
مكان زراير الازاز الكهرباء (بردو مسألة تعود)

==================================

اعتقد اني وضحت لحضرتك مميزات اللوجان و عيوبها و لو عاوز نصيحتي تبقى لوجان
و لو حضرتك حابب تسأل على اي حاجة انا تحت امرك و هتلاقي مواضيع كثير أوي في منتدى رينو توضح ليك كل اللي عاوز تعرفوا عنها

تحية لحضرتك على أمانه العرض وعدم التحيز للوجان وعدم اغفال عيوبها
بس احب اضيف أن معظم العيوب ديه لناس لسه ما خلصتش فترة التليين ومعملتش 5000 كيلو الى بعدها العربية بيبقى ادائها طبيعى وفقا لكلام مانيوال العربية وكمان مع توكيل قوى زى توكيل رينو يبقى الواحد بأذن الله مطمئن أن اى مشكلة أن شاء الله هتتحل

[quote=raedegypt;3872221659]ابعد عن الرينو حاجتهم غاليه ومش كل حاجه لاقدر الله فى حوادث لن تجدها ومحدش بيصلحها الا التوكيل لانه محتكر قطع الغيار . وبعدين هناك مشاكل فى هز عصايه الفتيس ومثبته هنا فى المنتدى دة غير ان شكل السيارة غير عاطفى . الفيرنا سيارة شيك وشكلها ما يقدم . العربيه اعتماديه ممتازة وكل جزء فيها يمكن الحصول عليه بسهوله ورخيصه فى سعر قطع غيارها. سريعه جدآ وتكييف فى عز الحر بارد جدآ .[/quote]
كلام مش مضبوط وقديم قوى اكل عليه الدهر وشرب قطع غيار اللوجان متوفره فى كل حته وكمان نزلت استيراد فى الحرفيين واحتكار ايه الى التوكيل محتكر قطع الغيار - ده كلا م حد مش عارف حاجة خالص -
اما بخصوص موضوع الحوادت- لاقدر الله - الى حضرتك بتقول عليها فهتلاقى قطع غيار متوفرة بأذن الله لان العربية مبلقهاش 6 شهور وقطع غيارها بره التوكيل وجوه التوكيل باسعار قريبة من الكورى
أما 4فى موضوع الحوادث فغالبا فالبرغم أنى مابحبش ابشر بس حضرتك بقى الى فتحت الموضوع - قلا قدر الله - الى كان راكب فيرنا وعمل حادثة مش هو الى بيجيب قطع الغيار والورثه هما الى بيتصرفوا عشان اللوجان 3 نجوم فى اختبارات الامان اما الفيرنا مدخلتش اختبارات امان من اصله وده احد الاسباب الى بيخلى جميع دول اوربا ترفض دخول الفيرنا ليها نهائيا بس الشعب المصرى الغلبان فرحان بكده
الشكل غير العاطفى ده اذواق وبعدين فى استطلاع هنا فى قسم المقارنات والناس الى مش عجباهم الفيرنا كتير جدا
ابتعد عن النعش الطائر

يا ترى مين أكثر تحمل و اعتمادية؟
سيارة أوروبية وألا سيارة كورية متقفلة في مصر على يد أسوأ توكيل سيارات في مصر والعالم ؟


سؤال محير بصراحة يا ترى أنهي ؟

المشاركة الأصلية كتبت بواسطة superiorboy

بص يا فندم صاحب الموضوع هنا طالب نصيحة من ملاك العربيات لأنهم احسن ناس تقدر تقيم العربية و المعروف على رجالة المنتدى انهم الحمد لله بيدوا نصيحة مظبوطة لأننا منعرف صاحب الموضوع ولا لينا مصلحة من انو يشتري الفرنا او اللوجان غير اننا نكسب وحش جديد معانا
بالنسبة لأن قطع غيار اللوجان غالية فدي مش مظبوطة لعدة اسباب اولها ان العربية معمولة اصلا للدول النامية و تبقى رخيصة و صيانتها مش غالية و التوكيل مش محتكر قطع غيارها ولا حاجة لكن السبب في اننا بنروح التوكيل هو ان اسعارو مش غالية عن برة كثير و دول ناس فاهمة العربية تمام و حافظاها و معلومة بسيطة جدا ان اللوجان زي ما قلت قبل كدة انها غير معقدة ميكانيكيا خااااالص و بعدين اللي خلى الميجان في ناس بتصلحها برة اللوجان مش هتتصلح برة؟!
بالنسبة لموضوع هزة عصاية الفتيس دي محدش نكرها لكن بردو مش مسببالنا اي مشاكل خالص و الفتيس سلس جدا في النقلات بتاعتو و مش مسبب اي مشكلة خالص بل تحس ان الفتيس ماسك نفسه و بيسيب النقلة و يروح للي بعدها بسهولة تامة و في نفس الوقت ماسك نفسو
قصة الشكل دي اذواق مش اكثر و على فكرة الفرنا ده شكل قديم من 2004 تقريبا و دي بردو لو انا بشتري العربية مش هتسببليس مشكلة طالما شكلها عاجبني و نفس القصة مع اللوجان اللي على فكرة بحب شكلها (اذواق بقلك)
و حضرتك قلت على ان الفرنا اعتمادية جدا و افترضت العكس في اللوجان لمجرد انها رينو؟! هقول لحضرتك حاجة واحد صاحبي معاه رينو 4 عربية مبتتشافش اصلا غير كل فين و فين و شكلها قديم و كهنة لكن ما شاء الله العربية ماشية معاه زي الفل و توارثتها اجيال يعني باباه و مامتو و اخوه و هو يعني مفحوتة و ما شاء الله ماشية كويس
بالنسبة لتكييف اللوجان فهو ممتاااااااز لأقصى درجة و مبيأثرش على السحب خالص
و نيجي لأهم 3 نقط
1- الوسع اللوجان اوسع بكثير جدا عن الفرنا و انا ركبت دي و ركبت دي و ركبت اللانوس و هي اوسعهم
2- الفرامل و دي في الفرنا ضايعة لأن الموتور قوي جدا (تحسب في صالح الفرنا) لكن على بودي خفيف (عيب في نفس الوقت) و فرامل بالنسبة لكدة تبقى على السرعات العالية متسعفش
3- و هي الاهم لو زي ماحضرتك بتقول لو عملت حادثة انهي الاهم العربية ولا حياتي و حياة اللي معايا؟ اكيد حياة البني ادم اهم بكثيييير من مليون فيرنا ولا لوجان لما نشوف الcrash test بتاع الفرنا و نشوف بتاع اللوجان اعتقد نقدر نحدد مين اللي هيبقى في الامان اكثر
و من فضل حضرتك متخليش كرهك لرينو يخليك تقول كلام مش مظبوط عليها بدون تجربة و لما تنقل حاجة من المنتدى (هزة عصاية الفتيس) انقلها مظبوط مش تقول فيه هزة و متقلش انها مش مأثرة على حاجة مش مبدأ (ولا تقربوا الصلاة)

+1111
بس ليه تعليق بالنسبة لموضوع الفتيس أنا معنديش المشكلة ديه خالص وده دليل أنها مش مشكلة (يعنى مش عيب تصنيع فى اللوجان ) الموضوع تظبيط مش اكتر