الموضوع: في حد راح العريش قبل كده ؟؟

المدينه هاديه جدا جدا ولو انت من النوع اللى بيعشق الاستجمام هتعيش هناك اجازه فوق الوصف

مفيش خروجات جوا العريش نفسها غير انك تنزل تتفرج على وسط البلد وهو شارع طويل فيه محلات عطاره ومستحضرات تجميل ودى الحاجه اللى مشهوره بيها البلد وكمان غالبا فتره الصيف بيكون فى معارض من بلاد عربيه للملابس هناك ومستحضرات التجميل برده , او ممكن تروح السينما وفى هناك حوالى 4 سينمات بس كله صيفى و 3 افلام او فلمين ب 15 جنيه وعيش يا معلم طول الليل كراسى بلاستيك فى جنينه وجو جديد

غير كدا كل القرى هناك بقا بتعمل رحلات اسبوعيه لرفح تقضى اليوم هناك وتشوف اماكن ليها علاقه بالحرب هنا وتشوف الحدود مع فلسطين , وفى كمان الكورنيش طويل وعليه كافتيريات وبيبقى حى قوى بليل

اسعار الايجارات هناك رخيصه جدا مقارنه بأى مدينه على الساحل تانيه , وهتلاقى اماكن الاقامه كلها على الشاطئ مباشره فى كل القرى او على الاقل جوا نفس القريه ومش هتخرج تعدى طريق او حاجه

والشواطئ هناك فاضيه وتقدر تنزل تقعد مع العيله براحتكم واقرب شمسيه ليك مثلا على بعد 20 متر والميه هناك نضيفه جدا جدا جدا وممتعه قوى بس الموج عالى وتخلى بالك لو معاك اولاد

وبشكل عام الخضار والاكل والشرب وحتى المواصلات هناك رخيصه جدا وفى محلات اكل كتير هتعيش حياتك منها وكمان لو حبيت تقضى الاسبوع كله سمك مش هتلاقى اجمد من حلقه السمك هناك , وحتى لو معاك العربيه البلد فاضيه وهتستمتع فيها بالسواقه

لو عايز تعرف اى حاجه عنها تانى قولى , بقالى 11 سنه بصيف هناك :)

بس علشان متروحش وتدعى عليا لو انت من عشاق الناس والهيصه والخروج للصبح وكدا مش هتعجبك هى عايزه تكون رايح تبعد عن الزحمه والناس والطرقعه وتقضى وقت هادى وتاكل وتشرب وتبلبط وتنام بس :)

المشاركة الأصلية كتبت بواسطة dr zezo

استاذ احمد

ما شاء الله لخص الموضوع بشكل رائع و ممتاز

علي فكرة انا عشت في العريش ما يقارب ال 16 عاما

و عائلتي لازالت تقيم هناك

و العريش اكثر من رائعة لهواة الهدوء

بس نصيحة

لو حبيت تنزل العريش في الصيف روح بعد شهر 7 عشان موسم القناديل يكون خلص و تعرف تستمع بالبحر

و فيه بعض اماكن علي البحر في العريش غير ممتلئة او تكاد تكون فارغة في حال اراد افراد عائلتك التمتع بمياه البحر بعيدا عن العيون

الله يكرمك يا دكتور

وفعلا نسيت حته القناديل دى , متفكرش فى العريش قبل بدايه شهر 8 لأنها فعلا بتبقى بهدله فى نزول الميه فى الوقت ده

اسأل ملسووووع :)

المشاركة الأصلية كتبت بواسطة hellboy

يعني اجازه نصف العام هتبقي ان شاء الله اخر شهر يناير . ايه ظروف القناديل في الوقت ده ربنا يهديهم ؟

لا مفيش قناديل خالص

بس دكتور زيزو بقى يفيدك عن الجو هناك فى الوقت ده , اصل دايما اسمع ان العريش فى الشتا بيبقى البحر فيها صعب اوى والميه بتبهدل الدنيا