هتعمل اية لو لقيت حد قافل على عربيتك؟؟
السلاموا عليكم:
هو بس موضوع مضايقني شوية وعايز اعرف لو في حد تعرض للموضوع دة هيعمل اية؟؟
الموضوع أني ركنت عمودي على الرصيف ذي كل العربيات اللي واقفة ونزلت دخلت السوبرماركيت ولما خرجت لقيت واحد ابن حلال واقف ورايا بعربية لانسر اوتوماتيك ووجيبها على الـp وكمان شادد الهاند بريك وعاوج الكاوتش بتاعة .. انا قلت تلقية هيجيب حاجة من هنا ولا هناك بسرعة كدة فضلت قاعد وبعد 15 دقيقة كدة قلت لا كدة كتير قوي انا اخش ادور علية احسن في الكام محل اللي في المنطقة .. دخلت كل المحلات وصوتي اتنبح .ز يا جماعة حد معاه لانسر فضي ركينها بالعرض .. ومحدش بيرد .. المهم خرجت وفضلت قاعد كمان 20 دقيقة يعني تقريبا دخلتلي في ساعة الا تلت كدة .. وفين لاقيت صاحب العربية جي بيدنجل كدة .. وبصلي بقرف كدة وقلي (اية كنت بشتري حجات) .. رديت علية حضرتك انا بقالي ساعة الا تلت .. قالي ياراجل متقلش كدة دانا مطولتش خالص .. رديت علية طيب انت شادد لية الهاند بيرك .. قلي علشان محدش يزق العربية .. انا دمي اتحرق وكان قدامي شوية اختيارات (لاما اشد في خناقة .. لاما اشتمة .. لاما احرجه بالادب .. لاما مردش) .. المهم انا معملتش كدة خالص .. انا قلتلة حسبنا الله ونعم الوكيل ان شاء الله يوم القيامة ربنا هيجبلي حقي منك وسعتها ميش هتعرف ترد .. قلي والله طيب خلاص بقي نبقي نتقابل وتبقي تاخد حقك وشوحلي بايدة وركب عربيتة بكل هدوء
على فكرة نفس الموضوع دة حصل مع واحد صاحبي من عربية جيتا بتاعت واحدة ست .. بس هو فضل ملطوع ساعتين .. والست ولا قلتلة حتة انا اسفة .. ركبت عربيتها ومشيت .. وفضل هو يهاتي مع نفسة
وعلى النقيض تماما لي واحد من قرايبي عايش في الامارات .. تنزل لقي جارة قافل علية .. بعتلة تقريبا ملقهوش .. طلب الشرطة .. جابت ونش في 5 دقايق شالت العربية اللي قافلة علية وخلت صاحبها يدفع تمن الونش وعملتلة غرامة كمان.
معرفش بقي انا طولت عليكم بس بجد الواحد ميش عارف يتصرف اذاي في المواقف دي يجب مسمار ولا مفتاح احسن ويجبلة العربية بالطول علشان يحرم .. ولا يحضر معاه زجاجة زيت باكم ولي يضايقك ترشلة على البوية بتاعتة .. ولا تكتم وتمشي بحرقة دمك وارتفاع الضغط .. ولا تكسرلة الازاز ولا فنوس .. ولا تخرملة الكاوتش وهي تبقي عطلة بعطلة بقي .. ولا تاخد تاكسي وتروح وتيجي بكرة يكون حد غيره قفل عليك .. ولا تحضر طقم سنج ومطاوي في عربيتك تحسبا لحاجة ذي كدة .. ولا تشتري العصاية بتاعت الكهرباء وتلدعة بيها واحدة في بطنة تخلية يمشي ذي الالف بعد كدة .. ولا تعد تشتم في .. ولا تتصل بالواد حمادة جاركم اللي كان بيلعب معاك كورة زمان وبقي ظابط شرطة دلوقتي وبقي اسمة حمادة باشا يبعتلك عربية من القسم من عندة فيها اتنين امناء شرطة ينفخولك الراجل دة ..
والاسوأ برضة انك تلجأ لاي حل عنيف فيكون البديل اصعب يعني مثلا ربنا يزقك بواحد تور مثلا .. ولا توتو يتصل بصحابة وتبقي ليلتك سودة ولا يطلع ابوه كان زمان بيعدي من قدام القسم وبيقلهم سلاموا عليكم فيجرجرك لمشكلة اكبر .. وطبعا اللي هيفبرك محضر احسن هو اللي هيفوت وتطلع انت من نقرة تقع في دحديرة ..
ولا تمشي بادوية الضغط والسكر ولمون اضاليه تعصرها على نفسك عند اللزوم ومننساش يبقي معانا شوية جميز حلوة على الموبايل او تجيب دي في دي في العربية تشوفلك فيلم اهو منها تسلي نفسك ومن ناحية تانية متحرقش دمك ..
والحل الوحيد اللي المفروض انه صح بس مقترحتهوش لانة ميش عملي وميش مفيد ومحدش هيعبرك .. انك تطلب الشرطة .. من جهة لاني معرفش اصلا المفروض اطلب رقم كام .. وثانيا ان معتقدش مع كمية المخالفات اللي في شوارعنا هيبقوا فاضيلنك يجيبوا ونش ويجولك .. وبعدين انت ابن مين في مصر اصلا علشان يكلفوا خاطرهم ويجولك
والله محدش عارف هو اية الصح من الغلط ولا اذاي تعرف تاخد حقك في البلد دي (والله حقك بس ميش ازيد) .. اة يا بلد
:mahf(5):