سؤال من خبراء ال 128 محبوبة الملايين : -
لما اروح اتفرج على عربية ابحث فيها عن ايه ؟
يعنى ايه الحتت اللى ابص فيها عشان اعرف انها سليمة ومش مرشوشة او مقلوبة ؟
شكرا للإفادة ولكل من رد على الموضوع بمعلومة مفيدة
سؤال من خبراء ال 128 محبوبة الملايين : -
لما اروح اتفرج على عربية ابحث فيها عن ايه ؟
يعنى ايه الحتت اللى ابص فيها عشان اعرف انها سليمة ومش مرشوشة او مقلوبة ؟
شكرا للإفادة ولكل من رد على الموضوع بمعلومة مفيدة
بص يا دكتور محمود .. القواعد العامة لفحص أي عربية (مش 28 بالذات) أنك تبص على اساسيات العربية كالتالي :
1) القوائم بتاعة العربية .. فيها أي حاجة مش مظبوطة .. وكمان العتب اللي تحت الأبواب والحتت اللي تحت قفل الباب (ودي في أي عربية) وبتشوف الفوارق اللي بين الأبواب متساوية ولا مفرقة في حتت وحتت
2) نيجي بقى للحوض .. تبص على أي لحامات وكمان في الكرتيرات (أو العلب) أو أي خبطات (يفضل اللي مش راشه دواخل) بس فيه ناس بتبقى راشه دواخل لمجرد النظافة مش أكتر .. ودي بتبان من حاجة اسمها اقفال العربية .. يعني أماكن اللحامات في الحوض .. ملحومة لحام المصنع (الفبريكة .. وبتبقى عبارة عن لحامات ذُنب .. مش أجزاء ملحومة بشكل يدوي) .. وكذلك فرد الشاسية فيها لحامات ولا لآ .. على فكرة 99% من العربيات ال128 ملحومة في الركب .. ودي بتبقى في مقدمة العربية (العيب الأزلي في 128) .
3) الشنطة .. حتشيل الفرش منها وتراجع على اللحامات اللي فيها (زي النقطة السابقة) .. وتشوفها راشه ولا لآه (مع مراعاة إذا كانت راشه بسبب حادثة ولا نظافة)
4) نيجي للماتور (في 128).. بيبقى فيه خرطوم واصل من الماتور للعمة اللي فيها فلتر الهواء .. فك الخرطوم من ناحية العمة (وسيبه واصل في الماتور زي ما هو).. ودور العربية لفترة .. وشوف لو طالع منه دخان أو زي ما بيقولوا بالبلدي (بخرة .. أو الماتور بيبخر) يبقى الماتور ده خفيف وعاوز على الأقل طقم شنبر .
5) شكل العربية بصفة عامة .. يعني زي ما بيقولوا كدة واقفة على رجليها ولا مش تمام .
6) حالة الصالون والتابلوة .... إلخ .
أرجو أني أكون افدتك
اولا حضرتك بتبص على القوايم بتاعت الابواب علشان تعرف اذا كانت مقلوبة ولا لاء
وكمان بص على الداير بتاع كل باب (فى مكان الباب فى الشاسية مش فى الباب نفسة) لازم الدورانات وكدة يبقى كلو تمام مفيش تطبيقة مفيش تخزين وهكذا
تانى حاجة تقف خلف او امام العربية بعيد عنها بكام خطوة وتبص على العجل الشمال اذا كانوا على خط مستقيم ونفس الكلام تقف امام العجلتين اليمين وتبص هل برضة على خط واحد ولا لاء علشان تتاكد اذا كانت العربية ملوحة ولا لاء
وكمان خلى حد يطلع بيها وانت اقف خلفها وشوف برضة وضعها اية وهى ماشية ماشي حلو ولا فيها لوحة
هتفتح كبوت العربية حلو بيبقى راكب جلد اسود كدة للكبوت صح مد ايدك تحت الجلد دة فى حتة كدة داخلة لجوة مشي ايدك عليها من علشان الحتة دى غالبا بيبقى فيها برومة (مش عارف حضرتك فهمتنى ولا لاء)
تانى حاجة هتمشي بعنيك برضة بعنيك هتلاقى الحتة اللى هى الكرتيرة (التجويف بتاع العجل) ماشي شوفة هل متقفل حلو مع الصدر بتاع العربية ولا لا ولو فى اى انتفاخ او تخزين فى الحتة دى هتعرف ان كدة كان فى خبطة فى العربية
برضة فى زى دراعين كدة طالعين من جسم العربية من عند الصالون لغاية صدر العربية هما شيلين الموتور بس بصراحة مش فاكر اسمهم دلوقتى المهم برضة الحتتين دول بص عليهم واتاكد انهم مفهمش لحامات او اى حاجة
كمان هتبص على نهاية الرفرفين الشمال واليمين من عند العتب وتشوف برضة الحتيتين دول غالبا بيبقى فيهم برومة
والقى نظرة سريعة على العتب
عندك برضة الشنطة هتفتحها وبص على الصدر بتاعها من جوة لو عدل يبقى العربية تمام من ورة وكمان هتنزل بعنيك شوية هتلاقى الحتة اللى ماسكة بين الصدر والارضية بتاعت الشنطة عملة زى حتيتين صاج ركبين على بعض اتاكد انهم تمام ومفيهمش لعب وبص على البطختين اللى ورا (التجويف بتاع العجل الخلفى)بص على اخرهم من تحت غالبا الحتة دى بيبقى فيها بارومة برضة وكمان هتشيل الفرش بتاع الشطة وهتبص من اول راس المساعد الشمال لغاية راس المساعد اليمين طبعا هتمشي بعنيك كمان على الارضية اللى ماسكة بنهم (علشان تتاكد ان القنطرة اللى ورا مفيهاش لعب)
يفضل كمان ترفع العربية فى بنزينة او كدة وتشوفها من تحت
وعلشان تعرف اذا كانت الدواخل مرشوشة او لا غالبا بتلاقى مثلا سلوك كهرباء داخل الكبوت مرشوشة ومثلا السيرفو وكمان ماكينة المساحات وكمان البطاحات بتاعت المساعدين او علبة التكيف وكمان فى بعض الويرات بتبقى مرشوشة ومن الشنطة برضة البطاحات والسستة بتاعت باب الشنطة
وانت سايق العربية بتجربها هات الغيارات عادى فى ميعادها بس حرك العصاية نفسها بسرعة علشان تتاكد ان الفتيس مبيزعقش
كمان وانت ماشي اسمع هل فى صوت تزيق صاج ولا لاء علشان تتاكد من ان الركب بتاعت العربية سليمة
كمان شوف لو الموتور بيطلع دخنة من الخلف ولا لاء
بتشيل الخرطوم اللى طالع من الموتور داخل فى الكربراتير هل بيطلع دخنة اولا
معلش مقدرش افيدك فى الموتور قوى
وان شاء الله لو عرفت اصورك الحتت اللى قلت لحضرتك تبص عليها هصورهالك
واتمنى انى اكون افدت حضرتك
أنا اعتذر لحضرتك بشدة على موضوع التصويير ده لسببين أولهم جوهري وهو أني معنديش كاميرا ممكن تلقط صور حلوة .. بالإضافة إلى أني رجلي فيها شرخ في الوقت الحالي ومتجبسة .
بس على العموم مش دي نقطة الفصل .. لأن الركب حتى لو دايبة بيتعمل ليها مرمات وبترجع تاني .. وأنا مش عاوز أجزم أن كل العربيات موديلات السبعينات والتمانينات وكمان التسعينات فيها الموضوع ده .. ونادر جداً (شبه مستحيل) لو لقيت عربية مش ملحمة ركب .
وهي مكانها في مقدمة العربية .. وممكن تشوفها من الحوض في الركنين الأماميين من ناحية الفوانيس .. أو من تحت العربية في نفس المكانين وزي ما قلت ده العيب الأزلي في 128 .
على ما اتذكر أن كان في عضو معانا بيشد عربية 128 وبيعمل ليها دعامات في الحوض .. وكان موضوع هايل جداً .. دورت عليه ومش لاقيه .. وكان مصور كل جزء في الحوض والشنطة .. والأماكن اللي محتاجة تدعيم في العربية ومنها الركب طبعاً .
شكرا على ردك أنا هبحث عن الموضوع وأشاهد الصور ,, وآسف ان كنت ثقلت عليك ,,, وألف سلامة لحضرتك
مع الوضع فى الاعتبار ان العربيات الـ 128 موديلات 90 فأقل مقبول انك تلاقى فيها لحامات ورش دواخل لأن الوقت ده صعب جداً يمر من غير بارومة.
مفيش تعب ولا حاجة .. أنا والله دورت على الموضوع ده بس ملقتوش .. وربنا يسلمك من كل سوء .
الله يسلمك من كل شر .. وشكراً على المجاملة الجميلة دي وذوق حضرتك
تمام كدة .. وكمان الموديلات اللي أعلى من التسعينات بس النسبة بتكون أقل .. وعلى فكرة بصفة عامة العربيات ال128 لغاية موديل 91 زي الفل من ناحية المتانة .. بعد موديل 91 كفاءتها قلت كتير عن الموديلات اللي قبلها .