مصرع‏7‏ وإصابة‏12‏ في تصادم بين سيارتي نقل بالصف

**سمير يونس** · 06-12-2007 08:34 PM

مصرع‏7‏ وإصابة‏12‏ في تصادم بين سيارتي نقل بالصف

في حادث مأساوي‏,‏ لقي سبعة أشخاص مصرعهم‏,‏ وأصيب‏12‏ آخرون بإصابات خطيرة في تصادم مروع بين سيارتي نقل بمنطقة الصف‏,‏ إحداهما كانت تقل عددا من العمال في طريقهم لعملهم بأحد مصانع الطوب‏,‏ حيث اقتحمت السيارة النقل ـ التي كانت تسير في الاتجاه المعاكس ـ طريق السيارة التي كانت تقل الضحايا‏,‏ واستقرت فوقها وحولتها إلي كتلة من الحديد‏.‏ وقد تسبب الحادث في توقف حركة المرور علي الطريق‏,‏ خاصة بعد خروج أسر الضحايا وأقربائهم لنهر الطريق بعد مشاهدتهم أشلاء جثث ذويهم‏.‏

عن جريدة الأهرام المصرية

بالله عليكم فين المرور ؟؟؟؟ هل أقتصر دوره فقط على الطرق السريعة على تحصيل مخالفات الرادار فقط ؟
و غني عن الذكر إن حوادث كتير زي دي بتحصل بسبب هذه المخالفات الهمجية التي يرتكبها سواقين النقل على الطرق السريعة مثل السير على أقصى الشمال و تجاوز السرعات المحددة و السير عكس الإتجاه و للأسف المرور لا يحرك ساكناً لمواجهة هذه المخالفات
في أي بلد فيها شرطة مرور مفروض متلاقيش مخالفات زي دي و اي واحد يتجرأ و يرتكب أي مخالفة من هذا القبيل بتتسحب رخصته فورا
و لا حول و لا قوة إلا بالله

**bassam nagy** · 06-12-2007 09:04 PM

لاحول ولاقوة الا باللة
ربنا يرحمنا برحمتة

**tutankhamoun** · 06-12-2007 09:09 PM

مخالفات سيارات النقل !!!!!!!!!!!!! أضحكتني

الأصح مخالفات جميع السائقين المتكررة و البلاوي اللي أحنا بنعملها على الطريق
متظلمش سواقين النقل لوحدهم

الكل بيسوق بطريقة أنتحارية بدون مراعاة أي أحد على الطريق

مع تحياتي لأسوء سائقين في تاريخ البشرية ( المصريين )

**ibrahimsaad** · 06-12-2007 09:15 PM

لاحول ولاقوه الا بالله العلى العظيم وانا لله وانا اليه راجعون

**mars3v** · 06-12-2007 09:16 PM

و ليه ماتقولش فين ضمير و لا اخلاق الحيوان السافل اللى يمشى فى عكس الاتجاه و يموت 7 و يصيب 12 بسبب استهتاره, و طبعا اللى ماتو دول كانوا ماسؤلين عن اسر و المرتب ماكانش بيكفيهم اصلا, و طبعا الى اتصابوا دول عمرهم ماهيشتغلوا تاني بسبب اصابتهم و كالعاده غير متعلمين فا مش هايعملوا اى اعمال مكتبيه و هايفضل يتعذب طول عمره بالعجز اللى جاله.
هى الحكومه هاتعمل ايه, هاتعين عسكرى لكل مواطن يبقى رقيب عليه؟, فى اى دوله من اللي فيهم المرور قاسي جدا, دايما بيبقى فيه ثغرات ولو عايز تمشى عكس الاتجاه او تعدى السرعه القانونيه من غير ما حد يشوفك هاتعمل.
و حضرتك اكيد بتشتغل و عارف ان جودة شغلك انت اللي بتحدده بضميرك حتى لو كان مديرك حازم جدا, فى حاجات مش ممكن ياخود باله منها, انت بس اللى عارفها و ربنا بس اللى شايفك.
لو احنا مكناش متعاونين و عايزين نغير نفسنا, لو هتلر نفسه جه يحكمنا هايفشل.

**tutankhamoun** · 06-12-2007 09:18 PM

المشاركة الأصلية كتبت بواسطة mars3v

و ليه ماتقولش فين ضمير و لا اخلاق الحيوان السافل اللى يمشى فى عكس الاتجاه و يموت 7 و يصيب 12 بسبب استهتاره, و طبعا اللى ماتو دول كانوا ماسؤلين عن اسر و المرتب ماكانش بيكفيهم اصلا, و طبعا الى اتصابوا دول عمرهم ماهيشتغلوا تاني بسبب اصابتهم و كالعاده غير متعلمين فا مش هايعملوا اى اعمال مكتبيه و هايفضل يتعذب طول عمره بالعجز اللى جاله.
هى الحكومه هاتعمل ايه, هاتعين عسكرى لكل مواطن يبقى رقيب عليه؟, فى اى دوله من اللي فيهم المرور قاسي جدا, دايما بيبقى فيه ثغرات ولو عايز تمشى عكس الاتجاه او تعدى السرعه القانونيه من غير ما حد يشوفك هاتعمل.
و حضرتك اكيد بتشتغل و عارف ان جودة شغلك انت اللي بتحدده بضميرك حتى لو كان مديرك حازم جدا, فى حاجات مش ممكن ياخود باله منها, انت بس اللى عارفها و ربنا بس اللى شايفك.
لو احنا مكناش متعاونين و عايزين نغير نفسنا, لو هتلر نفسه جه يحكمنا هايفشل.

+10000000000000000
هو مفيش فايدة
شعب يعشق الهمجية و الفوضى و التخلف و مخالفة النظام
لذلك مفيش فايدة

**الدكتوور** · 07-12-2007 12:10 PM

المشاركة الأصلية كتبت بواسطة tutankhamoun

+10000000000000000
هو مفيش فايدة
شعب يعشق الهمجية و الفوضى و التخلف و مخالفة النظام
لذلك مفيش فايدة

للأسف كلام صحيح 100\100

أنا كنت عايش في الإمارات طول عمري ، و الناس كلها بتلتزم بالمرور سواء في شرطة أو لأ ، يعني لو ماشي الفجر في شارع مفيهوش ولا عربية غيرك و الإشارة بقت حمرا بتقف ، مع العلم انه لو مشيت مفيش مشكلة لأنه محدش شايف ...

بس في مصر هل لو شالوا العسكري اللي بيبقى واقف على التقاطع و حطوا بداله إشاره ، حد هيقف؟ ولا هيقولك "محدش واخد باله !"..

الشعب المصري بيعامل قوانين المرور على انها محطوطه علشان "يقرفونا بيها " مش علشان "تحمي الناس "..و ده بيخلي الطرق واقفة ، و الناس بتموت في الحوادث بالهبل ، لدرجة اني مرة شوفت مزكرة في موقع أمريكي بيقولوا للسياح انه متسوقوش في مصر لأن الشوارع خطر ، و أجروا عربيات أحسن لأن المصريين بس بيعرفوا يسوقوا في مصر ...

**badblood** · 07-12-2007 01:04 PM

انا بردو كنت عايش في السعوديه اللي احنا بتريق عليهم ونقول عليهم متخلفين احنا التخلفين وهمج
الاشارات مراقيه 24 ساعه بكاميرات على اعلى مستوي لدرجه انها ممكن تجيب نمره العربيه اللي قطعت الاشاره ويجي عسكري الصبح يقوله انت قطعت اشاره امبارح عليك غرامه 1000 ريال او تتحبس 24 ساعه هو ده النظام مش فرحتي باكام النجمه اللي عليهم البيه على كتافه

حسبي الله ونعم الوكيل في اللي كان السبب

**Heshaam** · 07-12-2007 06:47 PM

المشاركة الأصلية كتبت بواسطة الدكتوور

الشعب المصري بيعامل قوانين المرور على انها محطوطه علشان "يقرفونا بيها " مش علشان "تحمي الناس "..و ده بيخلي الطرق واقفة ، و الناس بتموت في الحوادث بالهبل

مش ده برضه بسبب الكوسة ولا أنا غلطان

لو القانون بيطبق بحزم وعلى الجميع مكنش هيبقى فيه تسيب

وأعتقد إننا لازم ننظر لجميع الأبعاد ... لأنه لو قائدي السيارات بأنواعها متسيبين؛ فإدرات المرور فاشلة والطرق كارثية.

**tutankhamoun** · 07-12-2007 07:38 PM

المشاركة الأصلية كتبت بواسطة Heshaam

مش ده برضه بسبب الكوسة ولا أنا غلطان

لو القانون بيطبق بحزم وعلى الجميع مكنش هيبقى فيه تسيب

وأعتقد إننا لازم ننظر لجميع الأبعاد ... لأنه لو قائدي السيارات بأنواعها متسيبين؛ فإدرات المرور فاشلة والطرق كارثية.

أيه اللي جاب الكوسة هنا لحياة الناس ؟؟؟؟؟؟؟؟؟؟
لما تلاقي واحد معنوش دم و داخل قدامك عكسي على طريق سريع و كمان ماشي بسرعة و بالليل و كمان ضارب النور العالي في وشك
مش ده يبقى بيستعبط و بيستهبل ؟؟؟؟؟؟؟؟؟؟؟؟؟؟؟؟؟
و مخالفات من دي كتير
يبقى أحنا شعب بنحب النظام صح !!!!!!!!!!!! :) :) :)