الموضوع: سوال عن لون العربيه

انت ممكن تغير لون العربيه من بره بس بس دا حيحتاج انك تزيل البويه الموجوده كلها و تبدأ تعالج الصاج من اول و جديد(برايمر و معجون حديد و فيلر ) و بعد كده ترش و تروح المرور تغير للون هناك بس نصيحتي بلاش علشان بيقلل من قيمه العربيه و بيبقي منرها مش قوي لما تفتح الشنطه او الكبود او تفتح الابواب بيبقي لون العربيه حاجه و لون القوايم حاجه بيبقي شكلها مش قد كده.خليك في لون العربيه احسن.
بالنسبه للاكصدامات الاحسن ليك لو اكصداماتك لونها مش قد كده هات لها اتنين جداد مش حيبقو غاليين بس حيغيرو منر العربيه علشان لو سيبتهم حيبقي شكلهم بايخ (العربيه كلها نضيفه و الاكصدامات تعبانه تخيل كده) ف نصيحه اي بلاستيك بره العربيه تقدر تغيره غيره م حبخسر معاك انما الملمع بتاع الاكصدامات مش بيستحمل اكتر من 4 ايام و لا حاجه و حيكلفك كتير و في فكره تانيه انك ممكن ترش الاكصدامات اسود مطفي(بيسموه اسود مط) او ممكن ترش الجزء التحتاني من الاكصدام بلون العربيه و تسيب اللي فوق اسود بيبقي شكله حلو علي الشاهين مش وحش

شكرا اصل لونها بايخ و كنت عايز اغير للتجديد (عشان الواحد بكسر الوتيره الواحده و يكون فى شى جديد مدام مش هغير العربيه)
و الاكصدامات سليمه الصراحه بس لونهم مجرب و بعد الغسيل بالصابون مفيش فرق عن الاول

ممكن ترش الجزء التحتاني من الاكصدام بلون العربيه و تسيب اللي فوق اسود بيبقي شكله حلو علي الشاهين مش وحش

قصدك الجزء المرشوش ده بس ممكن البويه تاشر من البلاستيك بعد كده

طب سؤال كمان

ايه هى الخطوات اللى بتاع الدوكو بيمشى عليها لما يديها وش نظافه كامل
عشان الواحد يبقى عارف ايه الخطوات الصح و ميدحكش عليه
مثلا هو النهارده هيمعجن فوق البويه القديمه ده صح و لو غلط مفروض يتعمل ايه

شكرا مقدما على الرد

ايه هى الخطوات اللى بتاع الدوكو بيمشى عليها لما يديها وش نظافه كامل
عشان الواحد يبقى عارف ايه الخطوات الصح و ميدحكش عليه
مثلا هو النهارده هيمعجن فوق البويه القديمه ده صح و لو غلط مفروض يتعمل ايه

بص مفيش حاجه اسمها وش نضافه البويه يعني بويه كامله و دا علشان الشغل يطلع مظبوط و كويس انك بتمعجن في الجو الحر دا علشان المعجون يعضم علي العربيه .هو المفروض بيسنفر البويه القديمه كلها و يحط معجون حديد بس في الحتت اللي مش مبوطه او متسمكره ما تخليهوش يحط علي العربيه كلها علشان في صنايعيه بتستسهل و لو قالك مثلا (يا بيه اصل شغل السمكره مش اد كده) هات السمكري له و خليه يقوله هو عاوز ايه بس بلاش تزود معجون علشان البويه مش تبوظ بعد كده.المهم لما يلقط بمعجون الحديد حيسنفر بعد كده و يقوم يرش العربيه ببطانه او فيلر علي حسب(لو حترش فرن يبقي فيلر) و بعد ما تترش تبص علي العربيه تاني و تشوف لو فيها غلطه او حاجه يمعجنها و يرش فيلر تاني لحد ما العربيه تظبط و خليه ياخد باله من السوك بتاع الاجناب و لازم يظبطها كويس ما يخليش واحده طالعه او معووجه و بيتعمل ليها حاجه اسمها (فليتو) و دا عباره انه بيحدد السوك بمعجون حديد و يلزق لزق بطريقه معينه كده علشان السوك تظهر و تبان و تاخد بالك كمان من فروق الابواب و يا ريت تجيب كاوتش الابواب و تخلي السمكري يركب الكوالين علشان تشوف يا تري مبوطه ولا لاء علشان ما تجيش ترش و تقفل تلاقي الابواب مفارقه او القوايم مش مظبوطه مع الابواب و لو عملت شغل تحت البرابيز الامامي او الخلفي برده خليه يحط البرابيز و يقيس عليه علشان ما تفرقش معاك و كمان تحط الفوانيس و الشبكه و اعمل بروفا لو في حاجه عاوزه تعديل حتي لو جايب فوانيس جديده لازم تبط الوش علي الفوانيس الجديده.و بعد دا كله العربيه لما تبط و تلاقي الاجناب مبوطه و كده ترش العربيه و ما تسترخسش في البويه هات بويه نضيفه علشان تعيش(سكنز)و دا احسن نوع حاليا.
اه نسيت اقولك ابقي قول للبوهيجي يدق معجون في الفجاوي و يديها بلك علشان البارومه ما تمسكش فيها تاني خد بالك او و كمان الدواسات من جوه و ما تخليهوش يخف البلك ب تينر يا ريت لما يبقي مركز بيبقي احسن طبعا.
و و بالنسبه للاكصدام صح زي ما انت بتقول كده هو دا اللي قصدي عليه بس تحت التحديد اللي حضرتك حددته بشويه صغيرين(عند الفاصل بالضبط).
و الف مبروك مقدما

الف شكر ليك على ردودك الهايله دى بس انا ليه كام استفسار

كويس انك بتمعجن في الجو الحر دا علشان المعجون يعضم علي العربيه

هو المفروض نسيب العربيه كام يوم لغايه المعجون و الفلر متعضم ولا يرش تانى يوم و خلاص
و يعنى ايه مبوطه

علشان ما تجيش ترش و تقفل تلاقي الابواب مفارقه او القوايم مش مظبوطه مع الابواب

معلش مش فاهمك هيه الابواب هتفارق ليه وانا مفروض ارش القوايم و العتب كمان ولا اسبهم فابريقه

ابقي قول للبوهيجي يدق معجون في الفجاوي و يديها بلك علشان البارومه ما تمسكش فيها تاني خد بالك او و كمان الدواسات من جوه

برده مش فاهم هيه ايه الفجوات دى . ممكن قصدك ظهر الرفارف و فوق العجل ولا ايه

انا عارف انى طولت عليك بس هو شغال فيها دلوقتى و عايز الحقه قبل ميلخبط ويكروت الشغلانه

لو العربية شاهين هاتلها جوز اكصدام جداد وخلص نفسك لأن الواحد اصلى ب175 جنيه

ايوه شاهين بس العمليه عماله تزيد (مكنتش خبطه دى اللى الواحد اخدها)
عشان طول ما الواحد عمال شغال فيها فى جديد بيزهر و هكذا

و و بالنسبه للاكصدام صح زي ما انت بتقول كده هو دا اللي قصدي عليه بس تحت التحديد اللي حضرتك حددته بشويه صغيرين(عند الفاصل بالضبط

زى ده كده