هل انت بتغطي العربية لما بتروح ...؟؟ طب ليه ..؟؟

**memoo305** · 07-01-2010 09:12 AM

انا مش بطلع بيها كل يوم علشان كدهبأغطيها ليه بقى:
1- لو مغاطتهاش ركنتها يومين تلاتة بتلاقي كمية تراب وهمي عليع وأنا ماعنديش بواب.
2- في الصيف الشمس بتبهدل التابلوه والإجزاء البلاستيكية في الصالون والفرش.... بلإضافة لأنك لو جيت تطلع الظهر بتلاقي الصالون عامل زي الفرن والتكييف مابيعملش أي حاجة.
3- في كمية ندى وهمية بتطلع الصبح من الزرعات جنبينا (حسب المنطقة)لو مش متغطية مع أقل تراب بطين العربية.
4- يتبقي معرضا أقل لسرقة الأجزاء الخارجية (هوية & علامة & مسمار عجل&...)
5- بشعر براحة نفسبة لما بأسبها متغطية.

**N.a.j.d** · 07-01-2010 10:59 AM

المشاركة الأصلية كتبت بواسطة م.احمد زكريا

مش باغطيها

مفيش وقت الصبح اخلي البواب يشيل الغطاء وبعدين انا بانزل قبل ما يصحى اساسا
وانا راجع باكسل اغطيها

خليها في الهوا عشان عضمها ينشف

حلوه دي هههههههههه لا غطيها عشان متبردش

**Eng_Mostafa_89** · 08-01-2010 02:22 AM

بغطيها علشان التراب والندى وكمان العيال هنا ولاد شياطين بيحبوا الرسم على العربيات بالمسامير طبعا لما بيلاقى الغطا بتاع العربية بيكتفى انة يقطعة بس

**wkisho2005** · 08-01-2010 06:00 AM

كنت بغطيها لحد ما في مرة نازل في امان الله الصبح برفع الغطا لاقيت تك تك تك تك تك والاكصدام بيتفرفت ادامي وطبعا واحد ابن .........دخل فيه وانا ماخدتش بالي ولو بالصدفة جيت ابص عليها اهي متغطية وتمام ومش باين اي حاجة من يوميها وانا اتعقدت من الغطا بقيت بحس اني لو جيت اشيل الغطا هلاقي خبطة جديدة(حالة نفسية بعيد عنكوا)

**mrghost** · 08-01-2010 07:33 AM

عندنا عاملين الدور الارضى جراج للعربيات بس وبسيبهم مش متغطيين بس بيتبهدلوا تراب بسرعه اوى

**mohabelnegm** · 08-01-2010 08:21 AM

أسوأ حاجة فى الغطا أنك تبقى نازل لابس و حاطط برفان و زى الفل و بعدين تلاقى الغطا معفوق تراب و تقعد تشيل فيه و تلفه و تحطه فى الشنطة و بعدين تكتشف أنك اتبهدلت تراب و عايز تطلع البيت تانى تغسل أيدك ووشك من التراب. أنا بطلت أغطى العربية.

**migo9898** · 08-01-2010 02:39 PM

بغطيها علشان التراب والندى والشمس

**omar-saad** · 08-01-2010 07:17 PM

احسن حاجة ياجماعة
الجرااااااااااااااااااااا اااااااااااااااج
ويسلام لو الشخصى بتاعك
حاجة تانية عن تجربة
تلاقى الولاد يطنططو على العربية تلاقى واحد غشيم خبطهالك وهى واقفة
تلاقى لاقدر الله ممكن بلكونة نزلت عليها
وحاجات تانية كتير مش هاقولوكو بقى عليها

**Ahmed Nouh** · 08-01-2010 09:09 PM

بغطيها علشان التراب والخرابيش البسيطه لانى بركن فى جراج والعربيات جنب بعضها بالطول والامر ميسلمش من زرار فى بنطلون واحد راكن جنبى او يفتح باب عربيته على البحرى يخبط فى , ولو خارج وانا لابس رسمى ومتبرفن بخلى السايس هو اللى يتعامل معاها