الموضوع: قدمت إقرار الضريبة العقارية؟

المشاركة الأصلية كتبت بواسطة akramlail

لو شعب عاقل ومش جبان مكنش حد راح جرى وقدم لية هيسجنوا الشعب كلة ساعتها ؟؟؟ ناس مش عارفة حقوقها ودة جهل يودى فى داهية يضيع حقوق امة بحالها

انا مختلف مع سيادتك ان الشعب المصري من اعقل الشعوب و لكن متفق معاك انه يتمتع بصفة الجبن و انا و سيادتك مصريين عشان بس ما يجيش حد يقول الحق اللي بيشتموا في الشعب المصري
لكن هو جبان ليه...؟ لان الحكومة و النظام هما اللي خلوه كده و بسبب عدم ثقة المصريين في حكومتهم و تصرفاتها الطايشة الصبيانية ذهبوا و قدموا الاقرارات و انا اولهم لعدة اسباب
اولا : انا ما بحبش احتك بأي جهة حكومية الا في الضرورات القصوي جدا و اعلم ان معظم المصريين عندهم نفس الاحساس و بالتالي احب اتجنب اي صدام بيني و بين الحكومة لان بكل اسف دولتنا دولة حكومة و بس و مش دولة عدل ابدا بمعني اني ممكن اتبهدل و يبعتولي اعلان علي يد محضر علي محل عملي و انا وظيفتي حساسة شوية و يسوءوا سمعتك و انت ما عملتش حاجة انما هما محترفين في المواضيع دي انما طبعا لو زي ما سيادة العقيد بيقول و ان الشعب كله تكاتف و ده طبعا من رابع المستحيلات مش حيقدروا يبهدلوا الشعب كله ...لكن ده في حالة ان الشعب تكاتف
ثانيا : حكومتنا حكومة اتاوة بمعني انهم حيتلككوا و يطبقوا نظام الغرامة اللي هي 2000 جنيه علي امة لا اله الا الله حتي لو كان من المنبع و عندنا يوسف بطرس غالي يعرف يجيب الفلوس من بطن الحوت
لذلك انصح كل الاحبة ان يسارعوا بتقديم الاقرارات لان القانون ده حيطبق حيطبق لان الحكومة دلوقتي مفلسة و بتدور علي اي فلوس و مش حتسمع لاي كلام
و النصيحة التانية اللي انا عرفتها من مصادرها يعني من الضرائب ان هما لن يدخلوا الشقق فأنت لو عايز تلعب مع الحكومة اكتب بيانات العمارة الخارجية زي الكتاب ما بيقول انما جوه شقتك اكتب مواصفات الاسكان الشعبي و ده حيفرق كتير في تسعير الشقة و دخولها للشريحة من عدمه

محمد فهمي