فيات 131
لادا 2107
مازدا 323
جولف 2
بيجو 504
تيوتا كورولا 1984
ريجاتا
فيات 132
دايهاتسو شاريد "احدث شوية"
سوزوكى ماروتى
تعالى بقى لو حبيت تشترى سيارة حديثة شوية بنفس المبلغ عندك
اسكودا فليشيا 1997 او 99
كيا برايد عصفورة 1997 او 99
فيات اونو
سيات ابيزا "موديل اعتقد اوائل التسعينات"
جولف 2 "1989"
واعتقد كمان فيات بونتو او تمبرا
هيونداى اكسيل "مفضلة عند ناس كثيير"
هنا تظهر الحيرة الكبيرة بين القديم القوى المشهود له بالكفاءة
وبين الحديث نسبيا فى التسعينات
وبين السيارات الكورى التى افتحمت السوق المصرية
وبين السيارات اليابانية
طيب مين الافضل عندنا ؟
ممكن تلاقى سيارة موش فى تفكيرك
لكن اول ما تشوفها وتركبها تغير رايك
مثل الجولف 2 ....
عربية حكاية من الآخر "رائعة جدا لابعد الحدود ... منظر وسرعة وقوة وجمال وكل حاجة"
لكن طبعا عشان هى المانى وقطع غيار الالمانى غالية شوية
ولو المشترى دخله عادى ... يبقى احتمال يتعب شوية .... احتمال بعد ما يصرف 300 جنيه فى اى حاجة عايزة تتصلح مرة او مرتين يبدأ يضايق من العربية ... طبعا قطع غيارها بتعيش مدة طويلة ومعمرة لكن غالية بالمقارنة بالفيات الشعبى فى مصر او حتى المازدا 323 او البيجو 504 كمان
طبعا فيه ناس تقول لو هادفع فلوس فى عربية قديمة
يبقى موش هادفع مليم إلا فى الجولف او البيجو 504
طبعا البيجو 504 عربية غنية عن التعريف
والمعقول منها يبدأ من 30 الف الى 32 الف وطبعا احيانا يزيد عن كده للحالات النادرة
والموديل الشائع والمطلوب هو gl 1979
لكن للاسف معظم العربيات البيجو والقديم عامه
معظمهم فيه خبطات وسمكرة وبارومة
ممكن تكون اتعملها سمكرة ودهان ممتاز وكل حاجة
لكن فيه ناس كثيير عايزة عربية فابريكة وده صعب شوية ان لم يكن مستحيل
عمرك ما هتلاقى عربية قديمة وماتعملهاش سمكرة
طبعا اهم حاجة ان السمكرة دى تكون بعيد عن الحوض والشنطة والقوايم "اساسيات السيارة"
اما الباقى ممكن تضحى شوية فى مقابل انك تركب سيارة اسد حقيقى
وممكن تجيبها ارخص من كده شوية لو اشتريتها من الاقاليم بعيدا عن القاهرة وبحالات كويسة
تيجى بقى للسيارة مازدا 323
عربية موديل 1980 الى 1984 تقريبا
عربية مهما كانت تكنولوجيا يابانى
وناعمة وعشرة على عشرة
تعمل فى حدود 18 الف الى 22 الف حسب الحالة
والهاتشباك منها تعمل فى حدود 16 الف الى 18 الف
وفيه نسبة كبيرة منها متسقط لها مواتير مستعملة "مافيش مشكلة"
المشكلة ان العربية دى البارومة بتظهر فيها بشكل جامد ... مافيش عربية تفتح ابوابها إلا لازم تلاقى شوية باروما واتعمل لها سمكرة
عشان كده لازم تعمل شوية تضحيات وتنازلات
فى مقابل انك تركب عربية ثمنها معقول وواسعة وناعمة وتؤدى الغرض وموفرة للبنزين
طبعا الفيات 131
عربية جميلة وحاجاتها موجود واسعارها معقولة
واهم حاجة فى العربية دى انها "بياعة" يعنى لما تفكر تبيع تلاقى ناس كثيير عايزاها
وسعرها برضه فى حدود 22 الف للحالات الكويسة
نطلع شوية للتسعينات
تلاقى الاسكودا فليشيا اكثر عربية معروضة
وبكميات
وفى اى وقت تلاقيها
ايه السبب
العربية شكلها رائع "قريب من الجولف"
الصاج من الخارج قوى جدا
والعربية من الداخل حلوة وشكلها حلو قوى
لكن الموتور بيقولوا "بيسخن .. واحيانا يقولوا ضعيف شوية على العربية"
لان قوة الصاج عامل ثقل على العربية
واحيانا يقولوا عربية ناشفة
وناس تقول عربية لادا فى شكل حديث
وناس تقول عربية زى الفل وماشية وعشرة على عشرة
اما الكيا برايد عصفورة
زيها زى كل العربيات الكورى
عربية جميلة جدا
واسعة
موفرة جدا فى البنزين
موتورها من 1100 الى 1300 سى سى
وفى منها متركب له تكييف
لكن تلاقى ناس تقول لك معقولة تدفع فى عربية زى دى 30 الف
حرام والله
تقول له دى موفرة جدا فى البنزين يعنى تعمل فى الداخلى اكثر من 250 كيلوا فى الصفيحة
واحنا فى زمن البنزين ده مشكلة رهيبة
وفيه منها انجكشن على ما اعتقد وفيه منها كاربراتير
واعتقد قطع غيراها متوفرة ورخيصة " ماعنديش فكرة بصراحة"
اما الهيونداى اكسيل
عربية جميلة ومريحة
لكن النظيف منها يعمل حوالى 33 الف
وطبعا للاسف صاجها خفيف جدا
واى خبطة تعمل مشكلة فيها
واعادة بيعها ممتاز "مطلوبة كويس"
هى دى الحيرة بين القديم والجديد
والاهم من كده كيف تجد ميكانيكى "امين"
عشان ينزل ويلف معاك مدة طويلة ويختار لك عربية
ده صعب جدا
للاسف العربيات فى مصر
سمك .. لبن ... تمر هندى
من كل فيلم اغنية
فكروا معانا شوية
ازاى الواحد يرتب تفكيره قبل ما يشترى سيارة مستعملة
مع اطيب التمنيات
اخوكم حسين غزالة