لسلام عليكم
انا اشتريت عربية لانسر 96 اوتوماتيك والفحص بتاع البنزينة قالى تمام بس عايز الفتيس يتزبط لانه بيتأخر فى النقل واعمل طقم سرفيس
بس انا لقيت الزجاج الكهرباء عطل وشاط وسبت العربية تلات ايام راحت مادارتش البطارية نامت عايز ازبط الحاجات دى وباقى الحاجات اللى لسه ماظهرتش فاعمل ايه دلوقتى مع العلم انا قريت كل حاجة فى المنتدى الجميل ده بقالى شهر واستفدت كتير منكم
وشكرا مقدما
ربنا يبارك لك فيها و يديلك خيرها و يكفيك شرها
مبدئيا تشوف البطارية اذا كانت محتاجة تغيير و لا الدينامو هو اللى فيه مشكلة
و بعدين تشوف الفتيس اذا كان محتاج حساسات تتغير
يليها الزجاج الكهرباء
بس هى فى نقطة انت ماقلتش العربية عاملة كام كيلو
و النقطة الاهم انت ليه لما عرفت ان الفتيس بتاعها عايز يتضبط برضه اشتريتها ؟؟؟
العربية عاملة 19000والراجل بتاع الفحص قالى العربية ماشاء الله كويسة ومادانيش احساس ان الفيتيس فيه مشكلة كبيرة يعنى قالى كده مامعناه حاجة بسيطة السؤال اللى انا عايز اسأله فين احسن حتة ازبط فيها العربية واشوف الحاجات دى غير التوكيل والا لازم التوكيل والزحمة وشكرا تانى على سرعة الاجابة
هى العربية دى كانت مرفوعة و ما بتمشيش خالص ( كيلومتر قليل جدا ) خصوصا انها موديل 1996 ( بسم الله ما شاء الله )
على العموم و عن تجربة انا باحس ان التوكيل اغلى سنة صغيرة بس مش حاتقعد تلف حوالين نفسك كثير
لو انت من مصر الجديدة فى محطة بنزين موبيل اللى عند شيراتون المطار فيها مركز خدمة تابع لمصرية ( وكيل ميتسوبيشى )
او عندك جسر السويس
نصيحة لوجه الله لو انت مصمم تصلح برة هات قطع الغيار على الاقل اصلى علشان المغشوش كثير
و مرة ثانية الف مبروك و عقبال الشكل الجديد
روح الاول راجع مستوى زيت الفتيس الاتوماتيك او يفضل تغير الزيت الفتيس والفلتر علشان يمكن يكون هوه ده الى عامل موضوع التأخير فى النقل
انصحك انك تشوف اول حالجه حاله الفتيس عن متخصص والماتور قبل ما تعمل اى حاجه فى العربيه
الرقم كتبته غلط هوه 119000 ولو فيه حد قى منطقة الجيزة والهرم تبع التوكيل يبقى كويس مفيش حروح اللى قلتلى عليه بس لو ممكن تفصيل العنوان
روح مركز الرواس قدام مسرح البالون فى العجوزة
ابقى طمنا عشان الموضوع ممكن يبقى مش هين
بالمناسبة انت كشفت فى انهى بنزينة
ألف مبروك يا أستاذ ابراهيم ربنا يباركلك فيها و يعطيك خيرها و يبعد عنك شرها :)
استاذ ابراهيم أهلا بيك ومبروك عليك العربية وربنا يبارك لك فيها
انا لما قريت الموضوع مرضيتش اقول لك علطول تعالى التوكيل لأني بلاقي دايما اللي عنده عربية من سنوات سابقة مبيحبش يروح التوكيل لأن ممكن يقولوا له على حاجات كتير اوي عايزه اصلاح والموضوع يكبر
ولما لقيت حضرتك بعت لي ميل قلت يبقى ارد هنا احسن علشان الكل يستفيد من المعلومة
طبعا أهلا وسهلا بك في التوكيل في اي وقت علشان تتطمن على العربية
حضرتك ممكن تعمل فحص شامل للعربية (ومن ضمنه الفتيس) زي الفحص اللي بيتعمل لما تكون لسه هتشتري العربية وعايز تعرف تقرير عن حالتها هو تكلفته 132 جنيه بس يعرفك العربية محتاجه ايه وانت لما تعرف العربية عايزة ايه تقدر تحدد ايه اللي يتعمل وايه اللي حالته مثلا 70 -80 % ومش لازم يتعمل زي مثلا المساعدين اكيد هيتقال لك لازم يتغيروا (اصل العربية مشيت 119 الف في شوارع مصر)
ممكن تشرفنا في مركز الخدمة الرئيسي في قليوب أو جسر السويس أو المراكز التابعة زي مراكز الرواس الأربعة اللي منهم مركز العجوزة زي ما تفضل أخونا sabbagh بس الأفضل في أي حالة تتصل الأول قبل ما تروح ليكون عندهم حجز
احنا شغالين سبت - حد - اتنين وبعدين الوقفة والعيد اجازة كل سنة وانتم جميعا طيبين ونرجع السبت باذن الله
مراكز مصرية (التوكيل):
قليوب الطريق الزراعي الكيلو 16 ت 42157629
جسر السويس امام سوق القنال الدولي ت 26981976
مراكز خدمة الرواس الأربعة :
5 ش النيل المهندسين - بجوار نفق العجوزة ت: 33475992
ك 12 طريق الاسكندرية الزراعي بجوار غبور ت: 42151570
وسط البلد 12 ش عبد الخالق ثروت ت: 25758130
120 ش بورسعيد غمرة ت : 24830754
متشكر ياجماعة جدا على الاهتمام وحاروح بعد العيد انشاء الله واقولكم ايه الاخبار وبخصوص السؤال انا كشفت فين انا كشفت فى بنزينة شل فى شارع الهرم وهى تقريبا قبل دارى الهرم بشوية ودى بناء على توصية من واحد اعرفه خبير السيارات وربنا يستر انشاء الله