اشتريت عربية لانسر 96 اوتوماتيك اعمل ايه بعد كده يالانسراوية

**ابراهيم** · 12-12-2007 03:18 PM

لسلام عليكم
انا اشتريت عربية لانسر 96 اوتوماتيك والفحص بتاع البنزينة قالى تمام بس عايز الفتيس يتزبط لانه بيتأخر فى النقل واعمل طقم سرفيس
بس انا لقيت الزجاج الكهرباء عطل وشاط وسبت العربية تلات ايام راحت مادارتش البطارية نامت عايز ازبط الحاجات دى وباقى الحاجات اللى لسه ماظهرتش فاعمل ايه دلوقتى مع العلم انا قريت كل حاجة فى المنتدى الجميل ده بقالى شهر واستفدت كتير منكم
وشكرا مقدما

**ihab** · 12-12-2007 08:54 PM

ربنا يبارك لك فيها و يديلك خيرها و يكفيك شرها
مبدئيا تشوف البطارية اذا كانت محتاجة تغيير و لا الدينامو هو اللى فيه مشكلة
و بعدين تشوف الفتيس اذا كان محتاج حساسات تتغير
يليها الزجاج الكهرباء
بس هى فى نقطة انت ماقلتش العربية عاملة كام كيلو
و النقطة الاهم انت ليه لما عرفت ان الفتيس بتاعها عايز يتضبط برضه اشتريتها ؟؟؟

**ابراهيم** · 13-12-2007 12:11 PM

العربية عاملة 19000والراجل بتاع الفحص قالى العربية ماشاء الله كويسة ومادانيش احساس ان الفيتيس فيه مشكلة كبيرة يعنى قالى كده مامعناه حاجة بسيطة السؤال اللى انا عايز اسأله فين احسن حتة ازبط فيها العربية واشوف الحاجات دى غير التوكيل والا لازم التوكيل والزحمة وشكرا تانى على سرعة الاجابة

**ihab** · 13-12-2007 12:30 PM

هى العربية دى كانت مرفوعة و ما بتمشيش خالص ( كيلومتر قليل جدا ) خصوصا انها موديل 1996 ( بسم الله ما شاء الله )
على العموم و عن تجربة انا باحس ان التوكيل اغلى سنة صغيرة بس مش حاتقعد تلف حوالين نفسك كثير
لو انت من مصر الجديدة فى محطة بنزين موبيل اللى عند شيراتون المطار فيها مركز خدمة تابع لمصرية ( وكيل ميتسوبيشى )
او عندك جسر السويس
نصيحة لوجه الله لو انت مصمم تصلح برة هات قطع الغيار على الاقل اصلى علشان المغشوش كثير
و مرة ثانية الف مبروك و عقبال الشكل الجديد

**limo** · 13-12-2007 01:53 PM

روح الاول راجع مستوى زيت الفتيس الاتوماتيك او يفضل تغير الزيت الفتيس والفلتر علشان يمكن يكون هوه ده الى عامل موضوع التأخير فى النقل
انصحك انك تشوف اول حالجه حاله الفتيس عن متخصص والماتور قبل ما تعمل اى حاجه فى العربيه

**ابراهيم** · 13-12-2007 04:16 PM

الرقم كتبته غلط هوه 119000 ولو فيه حد قى منطقة الجيزة والهرم تبع التوكيل يبقى كويس مفيش حروح اللى قلتلى عليه بس لو ممكن تفصيل العنوان

**أبو_حمزة** · 14-12-2007 02:42 PM

روح مركز الرواس قدام مسرح البالون فى العجوزة
ابقى طمنا عشان الموضوع ممكن يبقى مش هين
بالمناسبة انت كشفت فى انهى بنزينة

**اسلام المصرى** · 14-12-2007 03:08 PM

ألف مبروك يا أستاذ ابراهيم ربنا يباركلك فيها و يعطيك خيرها و يبعد عنك شرها :)

**مصراوي جدا** · 14-12-2007 07:49 PM

استاذ ابراهيم أهلا بيك ومبروك عليك العربية وربنا يبارك لك فيها

انا لما قريت الموضوع مرضيتش اقول لك علطول تعالى التوكيل لأني بلاقي دايما اللي عنده عربية من سنوات سابقة مبيحبش يروح التوكيل لأن ممكن يقولوا له على حاجات كتير اوي عايزه اصلاح والموضوع يكبر

ولما لقيت حضرتك بعت لي ميل قلت يبقى ارد هنا احسن علشان الكل يستفيد من المعلومة

طبعا أهلا وسهلا بك في التوكيل في اي وقت علشان تتطمن على العربية

حضرتك ممكن تعمل فحص شامل للعربية (ومن ضمنه الفتيس) زي الفحص اللي بيتعمل لما تكون لسه هتشتري العربية وعايز تعرف تقرير عن حالتها هو تكلفته 132 جنيه بس يعرفك العربية محتاجه ايه وانت لما تعرف العربية عايزة ايه تقدر تحدد ايه اللي يتعمل وايه اللي حالته مثلا 70 -80 % ومش لازم يتعمل زي مثلا المساعدين اكيد هيتقال لك لازم يتغيروا (اصل العربية مشيت 119 الف في شوارع مصر)

ممكن تشرفنا في مركز الخدمة الرئيسي في قليوب أو جسر السويس أو المراكز التابعة زي مراكز الرواس الأربعة اللي منهم مركز العجوزة زي ما تفضل أخونا sabbagh بس الأفضل في أي حالة تتصل الأول قبل ما تروح ليكون عندهم حجز

احنا شغالين سبت - حد - اتنين وبعدين الوقفة والعيد اجازة كل سنة وانتم جميعا طيبين ونرجع السبت باذن الله

مراكز مصرية (التوكيل):
قليوب الطريق الزراعي الكيلو 16 ت 42157629
جسر السويس امام سوق القنال الدولي ت 26981976

مراكز خدمة الرواس الأربعة :
5 ش النيل المهندسين - بجوار نفق العجوزة ت: 33475992
ك 12 طريق الاسكندرية الزراعي بجوار غبور ت: 42151570
وسط البلد 12 ش عبد الخالق ثروت ت: 25758130
120 ش بورسعيد غمرة ت : 24830754