الموضوع: يا ريت حد يساعدني

اللادا الروسى الزيرو عربية ممتازة لكن لازم تكون عارف أحتياجاتك أية يعنى لآسرة ولا لفرد . يعنى هل عايز تكييف أو نعومة وراحة يبقى أبعد عن اللادا وفية ماروتى وألتو وبيكانتو وقبل كل دة فية لوجان وكل دة أسعارة عالية( ما عدا الماروتى أسعارها رخيصة وصيانتها وقطع غيارها بردة رخيصة ومتوفرة وسهلة) .أما لو عايز عربية عائلية وقوة ومتانة وخشونة نوعا ما وصيانة سهلة و قطع غيار رخيصةومتوفرة وشنطة بس ما فيش نعومة أوى ولا التكييف ينفع معاها لآنة بيسخنها زيادة لكن عملية جدا جدا عايزا اهتمام خاص بالعفشة وتستغنى نهائى خالص عن التكييف علشان السخونة . اللادا قابلة للتعديل فى حاجات كتيير ممكن تعالج السخونة لو وجدت بتغيير المروحة بواحدة أكبر من ناحية الريش زيادة وتشيل وصلة الترموستات وممكن تغيير الريداتير بواحد نحاس 3 ماسورة وبكدة مش هيبقى فى أى مشاكل للسخونة نهائى. الحاجة الوحيدة اللى ممكن تعمل سخونة مع كل التعديل دة هو أنك تكون عايز تركبلها تكييف . التكييف ممنوع نهائى . وأنا بصراحة شايف أن ممكن الآستغناء عنة مش ضرورى أوى لكن لازم تعرف أنة ما ينفعش مع اللادا وغير عملى خالص . أما لو عايز تكييف ونعومة يبقى تفكر فى حاجة تانى من المذكورين سابقا .و خلى بالك أن اللادا لازم تكون لادا روسى زيرو أو المذكورين سابقا . واللة الموفق

خليك فى اللادا سيارة قوية متينة وامان عملية قطع غيار رخيصة اى ميكانيكى يشتغل فيها تعمل على اى نوع بنزين 80/90/92 مشهورة جدا شغالة تاكسى من سنين بس خللى بالك من العفشة كل فترة تكشف عليها ...بس هنا انسى الرفاهية الانها سيارة غير مرفهة هذة هى الادا حيث بها بعض الخشونة وكفاية ان الجيش بيعتمد عليها والا كان اعتمد على نوع تانى........لو عاوز رفاهية وتكييف وغيرة هات حاجة تانية..فيرنا-لوجان -لانوس-والله الموفق....

بصراحة اشكركم جدا جدا على ردكم بس ليا استفسار تاني بحكم اني مليش في العربيات هو يعني ايه خشونة هحسها ازاي في العربية وانا سايق يعني انا عايزها سيارة عائلية ترحمنا من المواصلات وبس ده الهدف وتكون عملية ولو حبيت اسافر بيها هل هتبقى ليها مشاكل في السفر او لا وشكرا ليكم

الخشونة وهى جديدة أنا بتكلم عن اللادا الروسى الزيرو مش حتحس بيها قوى وممكن ما تحسهاش خالص فى الآول لكن بعد فترة طويلة مش قصيرة يعنى بيكون صوت الموتور عالى شوية هو بيكون ظاهر من البداية بس بيكون بسيط قوى بعد كدة بيزيد مع الوقت الخشونة مش أكتر من كدة . هى طبيعة العربية من بلادها كدة صوت موتورها عالى هى دية الخشونة . وحاجة تانى وهى تقل بسيط فى الدريكسون مش هيفرق لواحد لسة ما ركبش قبل كدة كورى أو يابانى يعنى مش تقيل قوى ومش ملحوظ الا للى ركب يابانى أو كورى باور قبل كدة وبيقولوا أن دة بردة خشونة فى الدريكسيون بس هى حاجة لا تذكر . لو أنت عايز العملية والرخص لكل حاجة مع القوة والمتانة ومش فارق معاك النعومة قوى أو التكييف يبقى أتكل على الله وهات الروسى وربنا يبارك .

انا بصراحة اشكرك جدا جدا على الرد الممتاز والسريع شاكر ليكم جدا

لا شكر على واجب يا باشا أى خدمة احنا هنا كلنا أخوة وربنا يسترها معانا ويصلح أحولنا ويكرمنا جميعا يا رب . وبالتوفيق ان شاء الله