الموضوع كبييييييير اوى
بس متابع بشغف
عرض للطباعة
الموضوع كبييييييير اوى
بس متابع بشغف
يا جماعه انا مقولتش هيخلى المقاول يرسم هو اكيد مش هيبنى فرن بلدى
انا قولت هو يروح للمقاول يجيب له المهندس اللى بيتعامل معاه لأن لو راح الحى علشان يقابل المهندس من نفسه كدا هيتعمل عليه احلى شغل فى الحى وانا اشتغلت الموضوع ده كتير وشوفت فيه ايام ما يعلم بيها الا ربنا
مع المهندس بقا ممكن تتفاهم فى الرسومات والكلام ده لو ليك حاجه معينه عايزه يعملهالك وهو بيعرف يتصرف فى الكلام ده فى الرسم ويطلعه برده مطابق للمواصفات
التكلفه الاجماليه المهندس يقدر يقولهالك كدا كروكى لكن فى الحقيقه هيطلعلك مصاريف اكتر والارض ممكن اوى تاخد مون اكتر من اللى المهندس عامل عليها لان انت مازال شغال بلدى ومش معقول هتجيب مهندس يمسك الارض لأنك كدا هتتكلف حاجه تانيه وهتبقى سلمته الارض وبتستلم منه على طول ودى حاجه تنفع فى الشغل التجارى وانك تكون راجل بتفهم فى المبانى وتعرف تراجع وراه لكن لفرد عادى المهندس والمقاول هيحطك فى جيبه ويعمل عليك شغل
الحكايه من برا كدا سهله لكن فى التعاملات اثناء الشغل فيه حاجات كتير بتتعرف مع الخبره
انت اول حاجه بس اختار مقاول يعملك الشغل وقابل المهندس اتفق معاه على الرخصه والادوار وفى حاله ارضك هتعمل الرخصه حوالى 8 وبعدين قبل ما تبدأ ممكن تسأل تانى وربنا يقدرنا جميعا ونقولك على اللى نعرفه
بس مقولتلناش الارض فين ولو فى حد اقصى للأدوار فى المنطقه او مساحه مستقطعه للشارع او حديقه او خلافه , على العموم هى الرخصه هتلاقيها 6 أو 12 علطول دلوقتى مفيش ادوار تانيه
دوستم على الجرح
اليومين دوله بفكر فى حاجه ذى كده
متابع بأهتمام وكلى شغف لكل جديد
السلام عليكم
جزاكم الله خيراً، وخالص الشكر والتقدير للجميع:
الاستاذ AhmedONouh: وفيت يا باشا وربنا يبارك ليك ولوالدك ويرزقكم من فضله.
وشكر خاص لكل منA.Saad، Mostafa_Elhussain، HanyHany، : KSA2011، osoliman88.
والحمد لله عرفت معلومات اقدر ابدأ بيها إن شاء الله
* يبقى الخطوة الأولى هي الحصول على الرخصة، وده يتم عن طريق البحث عن المقاول والاتفاق معه، والوصول الى مهندس الحي عن طريقه.
طيب سؤال 1 ؟
هو مهندس الحي بيكون ليه في الرسومات والانشاءات بشكل فني، ولا دوره يجيب الموافقة بس.
يعني ايهم احسن الذهاب الى مهندس معماري يرسم ويحدد المطلوب، واخد الرسمة وادور على المقاول، ومنه لمهندس الحي؟ ( وفي الحالة ديه تكلفة المهندس المعماري بتكون في حدود كام؟ )
ولا اتجه مباشرة للبحث عن المقاول ومنه لمهندس الحي، ومهندس الحي يحدد الرسمه ويجيب الموافقة، ونوفر تكاليف المهندس المعماري.
سؤال 2 ؟
تكلفة الرخصة على ما ذكر في حدود متوسط 8، هل ده يشمل الورق والرسوم واكراميه مهندس الحي، ولا ايه بالضبط؟
سؤال 3 ؟
الوقت المستغرق للحصول على الرخصة في حدود قد ايه ؟
سؤال 4 ؟
في ناس تم ذكرها في المشاركات السابقة وموش عارف دورهم ايه بالظبط ؟
المقاول، الحفار، الموان، المهندس المدني.
سؤال 5 ؟
فيه معلومات موش عارف يعني ايه ؟
خوازيق في حالة وجود جيران، الردم بالرمل، عزل القواعد، الدور السحري.
سؤال 6 ؟
الارض مبني على جزء منها مبنى قديم بسيط في حدود 60 م والباقي جنينة 290، أي انها ارض اعتقد طينية، وامامها مصرف.
فهل في اجراءات خاصة بالدور الارضي لضمان سلامته بعيد عن اي مشاكل تسريب مياه، والبعض يشير علي بتغطية الجزء من المصرف المار أمام الأرض على حسابي الشخصي عن طريق مواسير، فهل ده حل مناسب للتخلص من المصرف
سؤال 7 ؟
في حالة الحصول على الرخصة ان شاء الله، فيه وقت معين للبناء، تكون الايد العاملة ارخص ( شتاء، صيف، ....) ؟
سؤال 8 ؟
في حالة توافر السيولة المادية ممكن المشروع يخلص في وقت قد ايه؟
ويارب ما كون طولت عليكم ولكم كل المودة والتقدير.
الله يكرمك يا استاذ عاشور وربنا يتممها لك على خير ان شاء الله
1 - المهندس بتاع الحى هو مهندس مدنى عادى بس كل ما هنالك انه متعين فى الحى وبيبقى ليه سكه جوا فبيريحك من قرف الجرى ورا الورق واكراميات الحى وهو بيتعامل بطريقته , معنديش فكره لو مهندس من برا هيتكلف كام بس لو فعلا محتاج يبقى المهندس ده فاهم كويس اوى رخامه مهندسين الحى لأنك اخدت اللقمه منهم وهيبدأو يطلعولك غلطات فى الرسم لا تتوافق مع متطلبات الحى بعكس لو المهندس اللى انت جيبته من جو هيمشيلك حاجات مخالفه كمان لو تحب واعمل حسابك ان لو عملتها عند مهندس برا برده هتدفع فى الحى لأن مفيش حاجه بتخلص فى الحى ببلاش ابدا
2 - تكلفه الرخصه اللى بيتفق معاها المهندس عليها دى بتبقى 70% ليه والباقى رسوم وهياخدها ومش هيطلب منك جنيه تانى هو بقى بيطلع منها نصيبه والاكراميات للناس اللى جوا ومصاريف الورق
3 - زمن الرخصه حسب الضغط على الحى بتاعك من ناحيه الانشاءات بس بتاخد عامه من شهر لشهرين يمكن اقل ويمكن أزيد بس طبعا انت تابع مع المهندس الورق فين دلوقتى كل اسبوع
4 - المقاول : ده هو اللى هيمسك عمليه البناء هيجيب لك المعدات والعمال فى كل المراحل وهيشرف على الشغل وهيستلم من العمال ويسلمك وهو اللى عنده الخشب اللى هتشتغل بيه وتقدر تقول انه المهندس التنفيذى للمشروع
الحفار : ده هتحتاجه فى حاله اذا كان المقاول ملوش دعوه بأعمال الحفر , بيبقى واحد هيجيبهولك المقاول يجيبلك حفار اللى هو بجنزير وبلدوزر علشان تحفر الارض للقواعد هتلاقيه بيقول عليها لبشه :) , وهتحتاجه تانى للردم على القواعد بعد ما تخلص ومجرد ما طلعت بعواميد الاول مش هتشوف وشه تانى
المهندس المدنى : فى ناس بتبقى مش فاضيه للبناء فبتجيب مهندس يمسك الموضوع من اوله لأخره وانت بس تديله فلوس وتراجع وراه فواتير وبعدين تستلم منه وهو بقى بيروح للمقاول ويتفاهم معاه ويبقى انت برا الموضوع خالص
الموان : ده اللى هتجيب منه الطوب والاسمنت والحديد والزلط وده ليه حكايه طويله فى التعامل هقولهالك فى الاخر
5 - الخوازيق دى نوع من انواع القواعد , فى ناس بتعمل بس حفر على قد العواميد المسلحه وتصب فيها مسلح وتطلع منها العواميد لحد فوق ودى بتبقى فى بيوت الاهالى اللى مش هتعلى عن 4 ادوار وبيبقى صاحب البيت مش عايز يدخل نفسه فى تكلفه كبيره , وفى قواعد مسلحه اللى هى تحفر الارض كلها وبعدين تصب فيها كلها مسلح ودى بتبقى فى العمارات المساحات الكبيره وادوارها عاليه وبيعملها الاهالى عادى بس اللى عايزين بيت واقف صح ومخدوم ومش مهم التكلفه لأنها بترمى معاك فلوس جامد وبيبقى شدتها حسب سمكها وبيتعمل لها الاول صبه اسمنت وبعدين صبه مسلح اقفاص حديد بكل مساحه الارض يتصب فيها اسمنت بزلط برمل والكلام ده المهندس هيبقى يكلمك فيه وقت الرسمه حسب متطلباتك وظروفك الماديه
بص فى الصوره دى , اللى تحت ده 20 سم من الصبه العاديه والاقفاص دى كانت تجهيز رمى الصبه فى القواعد المسلح
http://img109.imageshack.us/img109/6833/dsc02173j.jpg
http://img195.imageshack.us/img195/4710/dsc02174v.jpg
الردم بالرمل : انت طبعا هتحفر علشان تعمل قواعد وبعد ما تخلص سواء كانت مسلحه او خوازيق وتعمل سملات الدور الاول والعواميد عايز بقا تردم الفراغ ده علشان يبقى الدور الارضى ليه ارضيه لأن القواعد دى بتبقى سطح الارض بشويه وانت الاول هيبقى عالى ففى ناس بتردم بالتراب اللى طلعته تانى لكن فى حالتك انت بتقول الارض طين يبقى علشان الطين ده ميريحش ويقرفك فى الارضيات بعد كدا ممكن تردم برمله نضافه ومش هتريح مع الوقت
الدور السحرى : هو هو فكره الجراج , انت طبعا مش هتبنى بسوا الشارع لكن هتطلع على الاقل متر عن الشارع ودايما خليك اعلى واحد فى الجيران علشان لما تحب تبيع ده بيرفع سعر البيت وبيديله واجهه فى وسط الشارع الا اذا كان الشارع ده متسفلت وكبير , فالدور ده بتعمل انك تعلى البيت شويه كمان ويبقى من غير ما تردم فى فرق بين الاول والقواعد تروح فاتح فيه ابواب دكاكين ويبقى تدخله بالعربيه بمنزل كجراج او تأجره مخازن او خلافه بس نصيحه بلاش تعمل كدا لو ارضك فيها ميه هيعملك مشاكل مستقبليا او هيصرف معاك عزل كتير جدا دلوقتى لو هتتلافى المشكله دى
بص الصوره دى ده كدا القواعد المسلحه خلصت والعواميد اللى طالعه دى اللى هى انت هتقف عليها بالدور الاول وخلى بالك راس العمود من فوق توازى سطح الشارع يعنى كل الهيصه دى تحت فأنت بقا المفروض تردم الكلام ده علشان يبقى فى ارض للأول وفى نفس الوقت ممكن تعلى العواميد دى شويه كمان وتعملها جراج
http://img43.imageshack.us/img43/1001/dsc02195h.jpg
ودى العواميد دى وهى بتتقفل بحوائط تجهيزا للردم وبص هتلاقى العمود من فوق يادوب بسوا البيت اللى فى الوش
http://img13.imageshack.us/img13/6165/dsc02197mk.jpg
وبعدين بيتم عمل حاجه اسمها سمل وهى كمره هيترص عليه الطوب بعد كدا للأول
http://img25.imageshack.us/img25/7703/dsc02208e.jpg
ودى بعد ما اتردم بص الحيطه اللى كانت فوق بقت فين والكمر اللى معدى ده ( السمل ) هو ده بدايه الاول
http://img130.imageshack.us/img130/1738/dsc02221t.jpg
وكدا الاول خلص هترص الطوب وتصب وتكمل بقا الادوار عواميد طوب صب بنفس المنوال
http://img130.imageshack.us/img130/7411/dsc02226c.jpg
عزل القواعد : بيبقى بمواد كيماويه وده علشان لو الارض رشحت ميه متبوظش لك الشغل اللى انت عملته تحت وده بيحميك على المدى الطويل خصوصا ان طبيعه ارضك اكيد فيها ميه وكمان بيبقى الموضوع ده مفيد فى ان الدور الاول يبقى الرطوبه فى الحوائط فيه قليله والدهان ميقشرش مع الوقت زى كل الادوار الارضى اللى مش معزوله
6 - انا هقولك رأى بس انا مش مهندس طبعا فحد من الاخوه المهندسين يفيدك اكتر منى بكتير , الارض اللى فيها ميه مصرف دى بتتعامل نفس معامله ارض فيها ميه مالحه وبيتم استخدام اسمنت لكل القواعد اسمه Sea water او بيقول عليه المقاول السويتر وده بيبقى اسمنت معالج انه يقاوم الميه المالحه وتأثيرها على المدى الطويل وفى فكره تانيه كنا بنعملها فى الاراضى اللى زى كدا , بعد ما القواعد بتخلص بنبنى تحت الارض بجانب القواعد قبل الردم حائط طوب بينه وبين القواعد حوالى 10 سم من كل جوانب اللارض اللى مفيهاش جيران وبعدين نعزل الحائط ده كله ببلك كويس قوى وكدا انسى ان الميه تعدى للقواعد نهائى لا فوق ولا تحت لأن انت بيبقى تحت المسلح فى طبقه اسمنت عادى تحميه اساسا من الميه اللى تحته
7 - لا عادى هى نفس اليوميه وبعدين انت ملكش دعوه بالموضوع ده انت مثلا هتتفق مع المقاول ان المتر ب 45 وخلاص هو بقا بيدفعلهم
8 - والله حسب تساهيل ربنا , ممكن القواعد تاخدلها شهرين شغل على ما تطلع بيها فوق الارض وممكن ربنا يسهلها فى شهر تكون خلصت حسب المشاكل اللى هتقابلك وظروف المقاول اللى انت شغال معاه بس بشكل عام بعد ما تطلع بالاول خلاص لو انت هتبقى معلق اللى هو الطوب بعد البنا ممكن تخلص دور كل اسبوع لكن لو هتبقى طوب الاول وتصب عليه وده الافضل للبيت طبعا الدور هياخد اسبوعين وهو مرتاح
معلش انا اسف لو كترت الصور بس انا خدت بالى ان خبرت قليله فى الموضوع فمش هتبقى متخيل معاى اللى بشرحهولك وفكرت ان الصور افضل
وتحت امرك فى اى اسئله تانيه
رائع يا أحمد
والله العظيم انا سعيد جدا لأنى بدأت أفهم الprocess ماشيه ازاى
الله ينور عليك
===================================
الف شكر على الشرح الجميل الوافى لكن لى استفسار حضرتك شرحت فى البند 5 نظام الخوازيق والقواعد واللبشة وقبل كدة قلت لو فية جار فايه علاقة نظام اللبشة بالجار يعنى افترض انى انا الجار ايه حقى على اللى بيبنى يعن يحفر جنبى مباشرة لغاىة اساسات بيتى اوحتى اسفل وهل دا له تاثير على بيتى ولا يترك مسافة غير محفورة بينى وبينه ولو كان حقه الحفر بكامل المساحة وبجوارى مباشرة فاية الحتياطات اللى ممكن اعمله علشان بيتى مايريحش او يميل ناحية الجار نتيجة الوزن الهائل على التربة المجاورة لى
موضوع جميل
ليا سؤالين لو سمحتم
اولا الرخصة دي شكلها ايه؟
لان احنا مرخصين وللاسف مش لاقي الرخصة بس فيه الورق الهندسي اللي هو علي ورق الكلك معمول ب5 ادوار واحنا مطلعين 3
ثانيا تكلفة الدور كام علما ان الارض مكتوبة في العقد 178 متر
اى خدمه ولو عندك اى استفسار تحت امرك
العفو يا دكتور
والله انا مكدبش عليك معرفش ايه علاقه تفضيل الخوازيق فى حاله وجود جار لأنى لسه واخد بالى دلوقتى من كلام استاذ احمد سعد فى النقطه دى ومش عارف اذا كان قصده على خوازيق القواعد ولا نوع تانى بيتم تنفيذه فى حاله الجيران انا كنت بشرح الفرق بين القواعد فى البيوت العاديه بشكل عام
بس تقدر تقول فى حاله وجود جيران بنقول ان البيوت شايله بعضها وتقليلا للتكلفه بنعمل خوازيق بدلا من قواعد مسلحه وده طبعا فى حاله لو البيت مش هيطلع بأدوار كتير وليكن مثلا اخر الحركه دى فى حدود 5 ادوار واكتر من كدا يبقى لازم قواعد وطبعا التقديرات دى بتكون من تخصص المهندس اللى هيعمل الرسمه
وطبعا التربه مفيش مجال انها تريح من على الاجناب لأنك بتبقى لازق فى الجار وفى عواميد على الحرف ماسكه البيت داير وبيبقى مقاس عواميد الحواف اكبر من مقاس العواميد اللى جوا علشان بتبقى محمله
الرخصه بتبقى الرسم الهندسى بتاع البيت ومعاها ورقه واحده فيها اختام وبيانات الارض , ولو لقيتها قبل ما تشتغل صور الرخصه الهندسيه الكبيره 5 صور وخليها عندك فى مكتبات كبيره بتصور الخرايط
الادوار المخالفه دى هتعمل مشاكل فى دخول المرافق حاول تتصرف فيها من دلوقتى وتروح الحى تزود ادوار على الرخصه هيجى معاك مهندس يعاين الاساسات علشان يصرحلك بالادوار الجديده لازم تأكله جامد علشان ممكن يجيبلك ازاله فى يوم وليله وخليك انت سباق وروح اتصرف فيها بدل ما لا قدر الله يجولك هما
تكلفه الدور بصراحه مقدرش افيدك فيها لأنها معتمده على مساحه الارض ومقاسات العواميد وعددها فأنت تحسبها بأجره المقاول فى المتر والمون اللى محتاجها
الخوازيق اللى بين الجيران
عارفين الناس اللى بييجوا يحفروا فى الارض برافعة بينزلوها وتلاقيهم بيلفوا حواليها وبيقعدوا يغنوا اغانى جميلة
دول كدة بينزلوا الخازوق
وده فكرته
اسياخ حديد ملفوفه على شكل دايرة بتنزل فى الارض ويتصب عليها خرسانة والمسافة بينهم تقريبا متر او نص متر مش فاكر
والهدف ان التربة ما تتحركش من تحت بيت الجار
التربة ممكن تتحرك امتى
لو اللى هيحفر نزل عنك
او انه عنده مياة فى الارض وسحبها بغشومية يعنى جاب ماكينة سريعة للسحب
surgeon
طبعا اللى بينبى يعمل الخوازيق
كمان يحط عازل بينه وبين الجار فى الاماكن الخرسانة علاشن ما تلزقش
العاظل ده ممكن يكون
ابلاكاش
الواح فوم
او شكاير اسمنت ودى اضعفهم والبديل الفوم والابلاكاش مش غاليين