سيمبول أوتوماتيك و السيريون 1300cc GLX و الجتز أوتوماتيك..أيهم أشتري؟؟؟؟

**DViPER** · 24-05-2010 11:16 PM

المشاركة الأصلية كتبت بواسطة mhoss

بص حضرتك مفيش حد فى المنتدى عمل مقارنة بين عربيتين أو اكثر علشان يستقر على إيه اللى يشتريه إلا و أزداد حيرة على حيرته...

بص اللى أنا أتعلمته من ده إن كل عربية فيها مميزات و ليها عيوب..

سواء تقفيل أو قطع غيار او توكيل او إستهلاك أو... أو... أو......

ده حتى النيو سيراتو يا راجل و اللانسر طلعوا فيهم عيوب ده غير بقه ال بى أم دبليو علشان طبعاً تقفيل مصرى..شوفت ازاى

و اللى أنا عملته إنى بصيت للفلوس اللى معايا و شوفت العربيات و عجبتنى العربية اللى هاشتريها و نفضت للعيوب اللى فيها كلها طالما العربية عجبتك وديه أذواق طبعا

خلاص متحيرشى نفسك بقه و توكل على الله إلا طبعاً لو فى شكوى جماعية من العربية نفسها فابعد عنها و الثلاث عربيات اللى انت مخترهم زى الفل شوف أى واحده أنت مستريحلها و أشتريها و ربنا يوفقك للخير و لا تنسى الاستخارة...

ردك مفيش أروع منه بجد
بارك الله فيك

**Usama Nagi** · 19-01-2010 08:36 AM

معلشي ليا راي لازم تحدد احتياجاتك بدقة السيمبول سيارة عائلية صالون يعني شنطة اكبر و حجم خارجي اكبر و السيريون و الجيتز هاتشباك شبابي يعني شنطة اصغر

يبقي لو عايز صالون المقارنة خلصت للسيمبول
لو عايز هاتشباك يبقي تشوف الأتنين في المعارض و تركبهم لأن الأتنين حلوين بس الجيتز موتور اقوي شوية

**M.Mosaad** · 19-01-2010 10:33 AM

دة رأي و اتمني انه يفيدك بالنسبة للسيبمول انا معنديش معلومات كافيه عنها فمش هفتي لكن كلام الاخوة في قسم رينو حلو عنها

بالنسبة للسيريون و الجيتز انا ركبت الاتنين و اقدر انشاء الله افيدك فيهم

التوكيل
مفيش مقارنه بين توكيل ديهاتسوا و غبور بشهادة ناس كتير توكيل ديهاتسوا من احسن التوكيلات في مصر محترم جدا بجد

قطع الغيار

الجيتز متوافرة لكن السيريون معمرة فهي معادله لو بتحب مصاريف اقل يبقي الجيتز لو بتحب تحط الحاجة و تنساها في العربيه و تدفع ازيد شوية يبقي السيريون

المساحه

السيريون واسعه جداااااااااااااااا من جوة مش هتصدق لما تركبها و عندك اماكن تخزين كتير فيها و في نفس الوقت صغيرة من برة فبتركن في اي مكان انت عاوزة (( علي فكرة انا اشتريت جزامه جديده و حطيتها في العربيه بس طبعا تنيت الكنبه و صاحب المحل كان بيوقفلي تاكسي علشان اشيل الجزامه عليه و ضحك لما قلتله هحطها في العربيه بعد كدة وقف فاتح بقة وانا بحط الجزامه فيها و دي ميزة مش هتلاقيها في السيدان و هو ان السقف عالي و لما بتشيل المسند اللي ورا بيبقي عندك بحرررررررررررر و الجيتز كدة برضة ))

الموتور

الجيتز موتور اقوي بس زميلي معاه جيتز اتوماتيك و انا معايا سيريون اتوماتيك برضة محدش بيطلع من التاني السيريون موتور عفريت بجد
لكن رقميا الجيتز موتور اقوي بس السيريون بتمشي بشمه بنزين بتقطع 100 كم ب 6.4 لتر بنزين (( بالنسبة للاتوماتيك ))

التقفيل

السيريون تقفيل انضف من الجيتز

سهوله اعادة البيع
الجيتز طبعا لكن السيريون ماسكه سعرها كويس بس صعبه في بيعها بس خلي بالك السيريون الشكل الجديد من ساعه مانزل سعره زاد حوالي 3000 و ثبت علي كدة بقاله سنتين و دي نقطة في صالح العربيه ان الجديد ماسك سعره لانها بتبيع كويس لكن مع غبور انت مش ضامن ثبات السعر (( زميلي اشتري الجيتز 2009 الاتوماتيك ب 69000 و سعرها كان 81000 جديد و كانت عامله 3000 كم بس لان صاحبها مكانش عارف يبيعها بس دي حاله فرديه منقدرشي نقيس عليها ممكن يكون صاحبها كان مستعجل ))

الشكل

اذواق بس السيريون اشيك الجيتز في رايي شكل قديم شوية و بكرر دي اذواق

الرأي النهائي

1- السيمبول ( لو عايز سيدان و توكيل محترم و عربيه كويسة بشهادة اصحابها انا مركبتهاش )
2- السيريون
3- الجيتز

**Mostafa_ENG911** · 20-01-2010 03:56 PM

مش عارف أستقر علي عربية لسه.....[marq="6;down;2;alternate"]ألحاقووووووووونيييييييييي يييييييييييييييييييي[/marq]

**Mostafa_ENG911** · 16-02-2010 05:44 PM

أنا خلاص قررت أجيب السيريون GLX ال1300 بس عاوز اعرف هل فيها aux و لا لأ , و هل ليها مفتاح ريموت؟؟؟؟

**د.محمود صلاح** · 16-02-2010 06:38 PM

قرار صائب لسه كنت هنصحك بسيريون ويكفي انها يابانى وتوكيل محترم

**Terrible_DaRsH** · 19-02-2010 07:47 AM

صحيح دى سيدان و دول هاتش باك !

انت مش عارف انت عايز ايه ؟؟

السيريون يابانى و ثبات كويس و تمشي شبابي و عائلية .

الجيتز موتور قوى جدا و سحب محصلش لكن ثبات قليل نسبياُ و كويسة فى اعادة البيع ..

السيمبول مركبتهاش بصراحة , بس حدد انت عايز ايه الاول و انزل اركب العربيتين و قرر .