تاني حادثة : خرجت من الحادثة الاولي دخلت في التانية في نفس اليوم

**georgedada82** · 21-01-2010 08:53 AM

ميرسي ياجماعة ليكم وشكرا لمواساتكم ليا بس بجد الواحد نفسيا تعب جدا
وبتوع النقل دول ربنا بجد يسامحهم ده الراجل شافني قدامه والعربية بتلف ولا فكر حتي يوقف العربية الراجل طار
طبعا انا نقلت العربية علي كساحة علي توكيل العامرية الكساحة لوحدها من عند صينية مطار برج العرب لحد التوكيل ( ما يعملوش 25 كيلو ) قالك 300 جنيه بالخناق لا والواد السواق عاوز اكرامية يعني واحد عامل حادثة يقوله عاوز اكرامية بجد ثقافة غريبة
تاني يوم بقي قولت اعمل محضر روحت قسم اول العامرية وحكيت له فعلا علي اللي جري قالي لا الحادثة تبع قسم تاني ياعم يهديك ياعم يرضيك مفيش
روحنا قسم تاني الظابط قالي هاتها هنا قولت له العربية ما بتتحركش وهي في التوكيل قالي مينفعش لازم اعاين علي الطريق او تجيبها هنا
قولت له احنا ممكن ناخد حد معانا بعربية واحد صاحبي ونجيبه تاني قالي ربنا هو اللي بياخد يا استاذ مش هطلع حد يعاين في التوكيل !!!
من هنا لهنا ماشيين كده قابلنا راجل اللي هو بموتوسيكل ده قولنا له
قالنا انا لازم عشان ابلغ ان في حادثة لازم تبقي العربية علي الطريق
الحمد لله ربنا الهمني قولت حاجة بسيطة خالص احنا نطلع العربية من التوكيل نحطها كده علي الطريق ونبلغ ان الحادثة لسه حاصلة النهارده قال ماشي طلعوها وتعالي بلغني بس طلعناها علي اول الطريق والراجل جه وبلغ العمليات علي ان الحادثة حاصلة قدامه وبعتوا امين شرطة من القسم اول برضه عاين وهي مكانها زقيناها جوه التوكيل تاني ( بجد بلدنا تموت في اللي يشتغلها ) لا ولقينا واحد من قسم عامرية تاني برضه جاي يعاين الحادثة فراح قالي تحت امرك بقي في ساعتها بدل الامين اتنين مشينا بتاع قسم تاني ( طبعا اخد له حاجة برضه ) وبتاع قسم اول اللي عمل المعاينة اخد له حاجة برضه
الحمد لله التلفيات في تقدري الخبطة اللي في رفرف شمال ورا
رفرف يمين هيتغير غالبا الكبوت برضه اتعوج من اليمين ممكن يقولك يغيروه اكصدام امامي بالشبورة كارتير رفرف يمين الجير بوكس قافش معرفش ليه بس العربية بتدور الموتور سليم التكييف سليم مواسير وكومبريسور وحتي الريدياتير سليم العفشة معرفش فيها ايه
ومستني بقي المقايسة
ربنا يبعد عنكم شر الطريق والنقل لان دي عالم مش بترحم والكساحات كمان والشرطةةةةةة ( دول سبب عقدتي المرة دي )

**neemmohamed** · 21-01-2010 09:19 AM

الف سلامة عليك
و حمد لله على سلامتك

قدر الله و ما شاء فعل ...قل لن يصيبنا الا ما كتبه الله لنا

ان شاء الله العربية تتصلح و ترجع زى الفل و ربنا يزل عنك الهم ... و ترجع تخرج و تتفسح بيها و تتمتع ... يا رب

**aelhossan** · 21-01-2010 09:35 AM

قدر الله وما شاء فعل
ماتزعلش نفسك
بس انت اخبار سوقتك ايه
اصل حرام تكون بتتعلم في عربيه جديده

**tmz9111** · 21-01-2010 09:38 AM

قدر الله و ما شاء فعل

**menocomp** · 21-01-2010 10:08 AM

أنا عاوز أقولك حاجة , أنا حاسس بيك وبحالة الحزن اللى جواك بسبب الحادث , لكن لازم تحط فى بالك ان أهم حاجة هى البنى ادم أما العربية فهى شوية حديد راكبين على بعض حتى الفيرارى والامبورجينى فهى حديد برضة.
حمد لله على سلامتك وقدر الله وماشاء فعل.

**georgedada82** · 21-01-2010 01:17 PM

المشاركة الأصلية كتبت بواسطة aelhossan

قدر الله وما شاء فعل
ماتزعلش نفسك
بس انت اخبار سوقتك ايه
اصل حرام تكون بتتعلم في عربيه جديده

لا انا كان معايا عربيتين قبل دي اصلا وانا من النوع اللي كل حاجة بالاشارات والكلاكسات كمان ده بتاع النقل هو اللي جابني من اخر عربيتي من ورا مش انا خابط حد قدامي
بس الحمد لله
وميرسي ليكم كتير وربنا ما يحط حد في الموقف ده ابدا

**gebreel** · 21-01-2010 01:22 PM

قدر الله و ما شاء فعل و الحمد لله انك سليم

اما بالنسبة لبتوع الشرطة و الكساحة و النقل فانا مش لاقي تعليق لائق اقوله بجد حسبي الله و نعم الوكيل و ابقى طمنا عليك