الموضوع: انا عايز اشترى عربيه صغيره ومش عارف اشترى اسبارك ولا سوزوكى سيلاريو

المشاركة الأصلية كتبت بواسطة abdm

البيكانتو عربية ممتازة لكن لية محدش رشح الآلتو 1100 وسعرها موديل 2009 بعد التخفيض 51000 وعربية يابانى ممتازة وقطع غيارها قريبة أرخص شوية من السبارك و البيكانتو يعيبها نوعا ما مش قوى توكيلها مش نفس مستوى توكيل كيا لكن أحسن من منصور . والله الموفق

تصحيح بسيط يا باشا الالتو مش ياباني هية تبع شركة ياباني لكن تقريبا - و دي مش متأكد منها - انها بتتعمل في الهند زيها زي الماروتي او اي دولة تانية لأنها لو اتعملت في اليابان هيبقى سعرها عالي اوي

كنت فكرت فيها بردو بس رحت مودرن موتورز اللي في شارع متفرع من عباس العقاد و اتفرجت عليها العربية ضيقة اوي من جوة و مفيش شنطة اصلا مش هنقول صغيرة و بس لأ دي مفيش تقريبا هية شنطتها اكبر من الماروتي شوية + ان تابلوها فقير من جوة و كوالتي مكانتش قد كدة

معاك مليون % في قصة التوكيل دي يعني السبارك لو كان وكيلها اي حد غير منصور كانت هتبقى ممتازة بالنسبة لسعرها
انا عاوز اقلكم اني لما رحت صيانة ال5000 بتاعة السبارك مع صاحبي تخيلوا ان منصور مش محدد نوع زيت معين يتحط في عربيتو و لما سألنا الزيت اللي هيتحط ايه موبيل 1 ولا شل ولا توتال ولا ايه قالولنا لأ احنا مبنحطش حضرتك هاتلنا الزيت اللي انت عاوزو و نحطهولك بدون اي اعتبار لللزوجة المطلوبة للموتور ولا المواصفات بتاعتو اللي المفروض يكونوا عارفينها ... شغل الاسطى بلية و اعوانه للأسف

المشاركة الأصلية كتبت بواسطة mahmoud_tito

انت رايك اجيبها جديد ولا تكون كسر الزيرو يعنى مستعمله سنتين ثلاثة

نصيحة بلاش مستعمل لأن مقالبوا كتير و اسأل مجرب انا كنت اشتريت عربية فورد عاملة 32000 كيلو عداد و حالتها ممتازة مكنش فيها حاجة غير ان التكييف مكنش شغال و بعد ماشتريتها بالرغم من اني كان معايا ميكانيكي و سمكري العربية دخلت في عمرة موتور و كان فيه احتمال عمرة فتيس كمان و كانت مخبوطة في الشنب من قدام و بهدلتني اخر بهدلة و بعتها بعد ما صرفت عليها اكثر من 9000 جنيه بس بيبقى فيه لقط بقى يعني مثلا حما اختي اشترى فيرنا كسر زيرو كانت عاملة 24000 كيلو و كانت بتتباع لأن صاحبتها كانت كويتية و نازلة مصر و قالت بدل ما تأجر عربية اشترت ارخص عربية موجودة و اشترها هوة منها بخسارة من ثمنها 12000 و كان بيشيل البلاستيك من على الحاجة بايده

فبالنسبالك انت شكلك لسة جديد في السواقة و دي هتبقى اول عربية ليك نصيحة لتجنب البهدلة بلاش مستعمل لو قفلت معاك اوي على الفلوس هات السبارك و استحمل عم منصور هية كلها 3 سنين و خلاص و تبقى كسبت عربية جميلة بردو لكن لو في امكانية البيكانتو يبقى بدون كلام البيكانتو و ربنا يوفقك و بردو انا معاك لو عاوز اي حاجة

المشاركة الأصلية كتبت بواسطة mahmoud_tito

طيب انا فى واحد عرض عليا عربيه ميتسوبيشى لانسر مو 99 ايه رايك فى العربيه ومميزاتها وعيوبها

بص انا معرفش عن العربية دي كتير بس كل اللي معاهم مبسوطين منها اوي و بيقولوا فيها شعر انا مسقتهاش غير هية مرة واحدة بس و مسافة مش كبيرة اللي لاحظتو ان العربية تحس انها ماسكة نفسها مش عارف فاهم قصدي ولا لأ الباور بتعها تقيل سنة بس ده عن تجربة مع اللوجان في الجري بيديلك تحكم اكبر في العربية و اسمع ان الثبات بتاعها على السرعات العالية ممتاز بس اللي يحكم هوة 3 حاجات
1- حالة العربية
2- اللي هيبعلك يعني لو محترم ولا لأ علشان تعرف اذا كان هيقلك العيوب اللي فيها كلها ولا لأ
3- راحتك النفسية

و لازلت عند رأيي بالنسبة للمستعمل يعني انت ممكن تطلع تكشف عليها في التوكيل بس انا معرفش توكيل متسوبيشي نظامو ايه في الكشف يعني مثلا رينو بيبقى الكشف ب550 جنيه ميكانيكا و سمكرة و بيجبلك تاريخ حياة العربية كلها و الصيانات بتاعتها كان منتظم عليها ولا لأ و لو فيه حاجة شغالة بس بنسبة 80% و احتمال تحتاج تتغير بيقلك عليها في التقرير و بناء عليه بتاخد القرار لكن معرفش ايه نظام ميتسوبيشي و ممكن لو ناوي فيه عندك مهندس مش فاكر اسمو في منتدى متسوبيشي هو عميد ميتسوبيشي وشغال اعتقد في التوكيل تشوفو و تظبط معاه

هي معروضة على كام و حالتها ايه بالمناسبة؟

المشاركة الأصلية كتبت بواسطة mahmoud_tito

العربيه شكلها جديد لكن معرفش حالتها ايه بالظبط هى مانيوال 1300 جميع الكماليات السعر 48 الف

بص هية لو سليمة و حالتها كويسة يبقى كدة سعرها حلو لأن العربية دي بتلعب من 47 لحد 52000 بس متتخدعش بالشكل لأن بكل بساطة العربية ممكن تكون معجونة و راحت لسمكري ايدو نضيفة و طلعها تحفة لكن ساعتها اساسيات العربية ممكن يكون فيها حاجة فتاخد معاك حد بيفهم اوي اوي و تسأل واحد و 2 يبوصولك على العربية و ترفع العربية و تفحصها صح لو ناوي عليها انا مش بخوفك بس وارد جدا ده كلوا في المستعمل خصوصا بعد اللي شفتوا في سوق العاشر و انا ببيع عربيتي القديمة من التجار و الناس اللي معندهاش ضمير

يعني هديلك مثال انا كنت بلف في السوق و انا ببيع العربية لما بزهق من القعدة و الف اشوف اخت عربيتي بيتكلموا في كام و حالتها و كدة كانت فيه عربية اخت بتاعتي في كل حاجة ابص عليها عربية متأسف في اللفظ معفنة من برة بوية بهتانة و قرف ابص عليها من جوة فيها ريش تكييف مكسرة و الفتيس شكلوا محلول قبل كدة 100 مرة افتح الكبوت الاقي خبطة محترمة في عضم العربية و مع ذلك عمال يقنعني ان العربية فابريكة و طالب فيها سعر خيالي

مثال تاني عربية ميجان هاتشباك كان فيه حد اتكلم عليها هنا في المنتدى انها ب51000 كاملة تيترونيك لما احمد عبد المقصود كلم صاحب العربية لقى العربية مغيرة ربع وراني

اللي اقصده من كلامي على القصص دي انك متأمنش اوي خصوصا ان العربية لو كانت مريحاه مكانش هيبيعها الا بعض الناس مبتحبش تقعد العربية معاها كثير و يغير و دول مش كثير كنسبة من اللي بيبيعوا

المشاركة الأصلية كتبت بواسطة mahmoud_tito

معلش انا اسف علشان اتخرت عليك فى الرد لكن للاسف العربيه اتباعت وملحقتش اشتريها لو قدامك وحده زيها ابقى قلى بس حد تكون عرفه وواثق فيه

انا مفيش حاجة قدامي دلوقتي بس بدور لواحد صاحبي على ابيزا 94 و هبصلك على لانسر معها من عينيا حاضر