الموضوع: هية الشرطة معانا ولا علينا

الجزء الاول في ناس ظباط مرور ارخم خلق الله حلصت مع واحد صحبي معاه نيسان صني مترخصه دقهلية دخل شارع في اسكندرية عكس سير وبردو اتحجز ودفع غرامه عادي انتا في مصر لازم تشوف المستحيل امال ام الدونيا ازاااي

الجزء التاني انا معاك ان في ناس محترمين في جهاز الشرطه بس دول ممكن يتعدو علي صوابع الايد الواحده لان اي ظابط فاكر نفسه الحاكم بأمر مصر ومفيش حد يقدر عليه والله لو حكتلك علي شوية بلاوي كدا حصلت لصحابي وليا ان شخصيا مع الظباط انتا مش هتصدق لانهم فعلا بتحس عندهم كمية امراض نفسيه حقد علي نفسنه علي غرور وتكبر وخصوصا لو شافك راكب عربيه نضيفه شويه يولع من جواه

المشاركة الأصلية كتبت بواسطة aapaap855

السلام عليكم ورحمة الله وبركاته

سؤال مهم هية الشرطة معانا ولا علينا؟؟؟؟؟
احكيلكو قصتين حصلو الشهر دة والاتنين عكس بعض تماماً

يوم الاجتماع الاخير الي كان في توكيل عز العرب والي حضر فيه الوفد الماليزي
كنت مستني صديقي العزيز (الضحية) م.م.
وكان اول مرة يروح التوكيل الصحراوي فميعرفش مكانو كويس
الدخول كان من باب شيروكي مش من بروتون
فطلع من الشارع بتاع بروتون ودخل على الباب بتاع شيروكي وعشان حظو مكانش تمام
قابلتو عربية كيا من بتوع الشرطة وقالو انك ماشي عكس الاتجاه وهات رخصة العربية ورخصتك وحصلني عالقيادة
بكل احترام ادالو الرخص وقالو انا مطلعتش عالاسفلت انا ماشي عالطريق الخدمي بتاع عز العرب والموضوع عشرة متر بالظبط
الظابط:حصلني عالقيادة وانا مش هعملهالك سير عكس الاتجاه (بيثبتو عشان يقبض عليه)
صاحبي كلمني وقالي تعالة معايا .روحت معاه عالقيادة سالنا عالظابط قالو لسة مجاش
لفينا عليه الصحراوي مش لاقيينو
ساعة ورجعنا عالقيادة برضو مجاش (براحتو مهو باشا واحنا ولاد تييييت)
روحنا حضرنا الايفنت وكان في حدود ساعة (يعني متاخرناش كتير)
رجع تاني القيادة لقي الظابط بعت الرخص النيابة (قلة ...)
المهم النيابة دي طلعت في حتة تبع كرداسة في حدود 10 كيلو من الطريق الاسفلت مطبات ومدقات وبلاوي سودة
كلم ظابط صاحبو. قالو انو يعرف حد هناك. راح للظابط لقي الرخصة هناك ومكتوب في المحضر انو كان ماشي عكس السير ومش بس كدة لا دة كاتب انو حاول الهروب ساعة الضبط (شوفو تلئيح الجتت ورمي البلاوي على الناس) حسبي الله ونعم الوكيل
الظابط قالو انا الخدمة الي هعملهالك اني اسيبك تروح البيت وتيجي بكرة للنيابة مع اني المفروض اقبض عليك واحطك في الزنزانة
ههههههههههههههههه والله عمل الواجب
راح النيابة تاني يوم (طبعا النيابة دول مش شرطة يعني مش بتوع رمي بلاوي )
الراجل بكل بساطة قالو يدفع الحد الادنى 1000 جنيه ويروح البيت بس مينساش يدعي عالظابط الي بيتلكك وبيرمي بلاه عالناس
يا ريت كلنا نقول حسبنا الله ونعم الوكيل فيه

القصة التانية حصلتلي يوم الجمعة الي فاتت

متعود العب كورة في نادي قدام كارفور المعادي(طلعة المقطم) كل يوم جمعة.
بنركن العربيات برة وبنسيب فيها هدومنا وحاجتنا
كان معايا اربعة صحابي راكبين معايا
نزلنا نلعب وسيبنا الحاجة كالعادة في العربية
طلعنا من النادي بعد ساعتين وكانت المفاجئة الي عمري مكنت اتوقعها
لقيت قزاز العربية بتاع الباب اليمين ورة مكسور
وطبعا كل حاجة مسروقة
(3 موبايلات - 2000 جنيه - الهدوم كلها)
بلغ الشرطة يا معلم
ساعة والشرطة جت (انجاز)
قبل متيجي الشرطة المسئول عن الحجز كان كلم صاحب النادي وقالوا انو هيعوضنا عن كل حاجة لان دي مسئوليتهم وبلاش نعمل محضر وفي واحد لواء شرطة شغال معاه هييجي يتفاهم معانا بخصوص المسروقات
جت الشرطة قبل مييجي الراجل ومن هنا بدئت قصة حبيل لجهاز الشرطة الي انا قولت فيهم حسبي الله ونعم الوكيل من شوية
معاون المباحث بعد الاسئلة العادية والتحقيق خدني على جنب وقالي ان الموضوع دة مسئولية النادي والحل انك تتفاوض معاهم عالتعويض واذا مرضيوش يتفاوضو شاورلي وانا هقبضلك على كل الي بيشتغلوا في النادي بتهمة انهم الي سرقو العربية

الراجل بتاع النادي جه
وبدا يقول كلام غير الي اتقال في التليفون (دي مش مسئوليتنا ودي مش مشكلتنا وكلام من كدة)
مبدهاش يا معلم
محضر في القسم ضد النادي ولم كل العمال في البوكس
(بالرغم من ان الراجل لواء شرطة. موقفوش معاه ووقفو معايا)
روحنا القسم وعملنا محضر الراجل اللواء بدا يحس ان الموضوع خرج من ايدو
بعد مشاف ان كل الي في القسم (مامور القسم ومساعد المامور والمباحث) محدش معبر انو لواء وواقفين مع الحق
بدا يرجع في كلامو ويقول انتو ايه الي ضاع منكو وبدا يحسب قيمتها لحد مسلمنا التعويض ومضينا على محضر الصلح
(مكان من الاول)
المهم ان من اول امناء الشرطة لحد مامور القسم كلهم ناس محترمة جداً جداً
وفضلو طول الطريق وطول المحضر يفهمونا نعمل ايه عشان ميتضحكش علينا وميضعش حقنا
ويجيبولنا مية وسجاير (للي كانو بيدخنو) وقعدونا في مكان محترم جداً
ويا دكتور ويا بشمهندس ويضحك في وشك (غريبة ؟مش كدة؟)
انا مش مصدق نفسي

فعلا انا مش عارف هية الشرطة معانا ولا علينا؟؟؟

يا صديقي الشرطة ما هى إلا قطاع خدمى فى الوحش وفى الحلو فى المره الأولي كان مثال على الوحش على حسب كلامك لأنه كان هيلبسك قضية هروب على كلامك
والثانى مثال جيد على الصنف الكويس ببساطة

وعلى العموم من خلال التجارب اغلب الضباط الشباب من ملازم لغاية نقيب وأنا بقول مش كلهم لا يحسنو التعامل مع الجمهور نهيك على العوجان والكلام اللى احنا فهمينه وده لصغر سنهم يعنى انا لما اقابل واحد مثلا ملازم أول أو حتي نقيب سنهم مش هيعدي ال 32 سنة بعاملهم كانهم اطفال فرحانين بالبدله والسلطه والكلام ده وقليل منهم بيطلع ذوق يعنى زي ما أقول لسيادتكم كل فئه فيها الحلو والوحش
على العكس خالص بقا الضباط الناضجين والكبار فى الرتب أغلبهم محترمين وعلى درجة من الأخلاق العالية لأنه شبع من الكلام ده وخلاص فهم إنه اللى كان بيعمله ده طيش شباب وفى ناس من صغرها محترمه .... صوابع إيدك مش زي بعضيها

وكمان فيه حاجه للأمانه : فى بعض الناس تستاهل اللى بيتعمل فيها وانت عارف وانا عارف أول ما ينزل من العربية يقوله أنت عارف أنا مين ( الجمله اللى فى لسان كل الشعب المصري ) وفى الآخر يطلع أهوجي
وديه وجهة نظر

وتحياتى

انا رأيي ان الموضوع ليه زاويه تانيه الناس مش واخده بالها منها, تلاقى حد من النادى ده مضايق حد فى القسم او يمكن البيه المأمور حب يدخل النادى فى مره قاموا منعوه علشان مش معاه كارنيه مثلا او اى حاجه, فالناس ماصدقت مصيبه تلبسهالهم

ويمكن مخبر ولا اتنين من القسم هما اللى كسروا زجاج العربيه وعملوا الفيلم ده كمان علشان يلزقوه للناس اللى فى النادى

بمناسبة المشكله اللي حصلت لصاحبك على الصحراوي كنت مع والدي رايحين على التوكيل وكان الطريق شبه متوقف المهم والدي قال ادخل على القياده ونسأل الظابط ليه سايب الطريق بالمنظر ده لقيناه حاطط عسكري على البوابه من بره ومانع دخول الناس كأنه قاعد في الفبلا بتاعته وناس كتيره واقفه لانه سحب رخصهم منهم سواق عربيه نص نقل قالي انه الظابط سحب رخصته علشان مارضيش يعمله نقله لعفش بيت الظابط ببلاش وموقفه من الظهر وكنا ساعتها داخلين على العشاء المهم في الاخر بعد ما الظابط رافض دخول حد عليه رغم ان احنا كنا رايحين له في مصلحه عامه وهي ان الطريق واقف بدون سبب واضح طلعنا على مديرية امن 6 اكتوبر التابع لها الطريق الصحراوي وطلبنا مفتش الداخليه وقابلناه وبابا حكاله كل حاجه عن افعال هذا الظابط الغير محترم ومشكلة الزحمه في الصحراوي راحوا طالبينه يجي على المديريه فورا بس معرفش عملوا معاه ايه بعد كده
علشان كده اكيد هوا ده الظابط الي سحب رخصة صاحبك كان لازم صاحبك يطلع يعمل فيه بلاغ لانه كذاب وبيلقح جتته على الناس ولازم يتحاسب