الموضوع: الجزائر كسبت و دمى اتحرق

انا حاسس ان الزمن بيرجع بينا لقبل ماتش مصر والسودان انا بس نفسي اعرف ليه دايما بنحب نعلق اخطائنا على شماعه ونكذب ونصدق نفسنا وكل واحد يغلط ويبرر الغلط احنا نلتف حوله ونصدقه خسرنا في السودان مع ان كان نفسنا وحلم حياتنا اننا نطلع كاس عالم ولما خسرنا قلنا لو كنا كسبنا كانو موتونوا طيب كنا حتى موتنا بشرف احسن ما خسرنا وضاعت كرامتنا .
انا بس خايف يعدي بيا العمر وملحقش اشوف مصر في كاس العالم في حياتي خصوصا اننا مشاكلنا وهمومنا كتير اوي وما بنصدق نضحك واحنا بعاد اوي عن بعض ونفسنا في اي حاجه تجمعنا بس ارجع واقول احنا شعب الغلابه كرامتنا بتضيع بنتهزا وبيحصل فينا كل حاجه ومش بنقول اي حاجه .
رغم اني متوقع حاجه من السنياريو دايما اننا نخسر ويجي حد يبرر الخساره ويدور على اي شماعه يعلق عليها الخساره او تيجي كارثه طبيعيه او حكوميه تلهينا عن اننا خسرنا.
انا على فكره مش بحب الكوره اوي وغالبا مش متعصب لاي فريق بس بحب اشجع الكوره واللعب الكويس بس انا في الفتره الاخيره بدات احس ان كل ماتشاتنا مش مجرد ماتشات كوره دي بدات تكون مناسبات اجتماعيه بنهني بعض فيها بنفرح كبير وصغير راجل او ست الموضوع بقا اننا نفسنا نفرح حتى لو اللي ملوش في الكوره بينزل يظيط في الظيطه ويهيص .

نفسي نفضل نفرح نفسي نبطل خوف ونبطل نقول بس كلام وشعارات ونطلع ولو خطوه لقدام حتى لو في لعبه

التوقيع : مصري بيحلم