عضو جديد ... وعايز مساعدة (الأوتوماتيك بيهيس)(والسنتر متيس)
السلام عليكم ورحمه الله وبركاته
بدايه بجد بجد المنتدي أكثر من رائع , ومشاركات الأعضاء ماشاء الله ممتازة
دخلت من يومين بس لكن استفدت فيهم كتير قوي , ألف شكر للقائمين على المنتدى ولجميع الأعضاء :)
بدايه أنا خبرتى فى السيارات فوق الزيرو بشويه , واشتريت عربية من شهر
وطبعا كشفت عليها فى بنزينة قالولى كويسة(أوعى حد يكشف على عربية فى بنزينة:eek: - روحوا التوكيل)
المهم كل يوم من ساعتها أكتشف عيب جديد , أخطرهم من وجهه نظرى الفتيس
العربيه سيتروين إكسارا 2 , Automatic
بيحصل عندى مشكله غريبة ... العربية تمشى كويس وبتنقل كويس لكن فجأة تلاقى العربية نطرت نطره جامدة (أكنى عملت كيك داون) وبعدين ألاقى البيان بتاع الفتيس فى التابلوة اختفى وابتدى يعمل فلاش على Sport(s) and Snow(*)
والعربيه ماشية وكل حاجة بس ال أر بى أم لو زودت السرعة يعلى قوى وصوت الموتور بحس انى راكب جرار زراعي
مجرد ما أبطل العربية وأشغلها تانى ترجع لطبيعتها ........ شوية تشتغل كويس وشوية تعمل الحركة دى فى كل مشوار ... بصراحة أنا مرعوب إن يكون الفتيس بايظ لان دة على حد سمعى بيكلف ألوفات ..وربنا يستر
طبعا أنا عملت شوية حركات غبية منها أنى من ساعه مااشتريت العربية مغيرتش زيت ومش عارف أخر مرة كان صاحبها مغيرة امتى .... بس أن شاء الله بكرا أغيرة
المشكله التانية إن السنتر مش شغال لما أقفل يفتح تانى لوحدة , مع العلم انه قعد مثلا اسبوع مش شغال وبعدين اشتغل كويس اسبوع وبعدين مات بقاله اسبوعين ( أنا لم أغسل السيارة خالص :D) يعنى مش مشكله ميه !!
ورحت لواحد بتاع مفتاح وباب فتحه ومعرفش يعمل حاجة وقالى إن دى ممكن تكون مشكله فى ال (PSI)
اللى هوا الكمبيوتر وقالى عليك وعلى عز باشا العرب .... بصراحة أنا حاسس أن مفيش قدامى حل غير إنى فعلا أروح لمستر عز ..... بس دا أكيد هيكون بعد أول مرتب أقبضه بعد العيد :mad:
حد فيكم عنده فكرة دي ممكن تكون مشاكل ايه !!!!!!
ودى حاجات من البسيطة بتاعه ميات جنية ولا من بتاعه ألافات خاصة الفتيس (مش عارف كان ماله المانوال)
أنا كان معايا 132 ربنا يكرمها كانت بتمشى لوحدها , مفتكرش ان عمرى غيرت لها زيت (كنت بزود عليها بس كل ما أفتكر:p) ولو كان فيها حاجة كنت برميها عند أول عجلاتي وأنا مطمئن إنه أكيد هيعرف يصلحها
