السلام عليكم ورحمه الله وبركاته.
عاوز اعرف أيه ميزه وسلبيه توطيه وتعليه الكهرباء من الاسبراتير؟
السلام عليكم ورحمه الله وبركاته.
عاوز اعرف أيه ميزه وسلبيه توطيه وتعليه الكهرباء من الاسبراتير؟
أنا أعرف ان الموضوع ده بيتم حسب نوع البنزين اللى بتمونه
يعنى فيه نوع بنزين بتأخرله الكهرباء زى بنزين 80 علشان تمنع تسقيفة الموتور لتلاشى تلف عامود الكامه على المدى البعيد
أنتظر باقى ردود الأعضاء .
لما بتعلى الكهرباء العربية بتسحب اكتر على السلانسيه والغيارات بتبقى ناعمة بس فى المعقول - يعنى لو عليت اكتر من اللازم العربية هتسقف معاك وبتبان قوى عند الشد - وايضا بيعتمد على حالة البوجيهات
بص ظبط (على ووطى) وجرب تدوس بنزين لغاية متلاقى مفيش تسقيف وكده يبقى تمام
وزى مقال الاخ أحمد التسقيف خطر على عمود الكامة على المدى الطويل
شكرا جزيلا على ردك.
تأخير الكهرباء يعنى تعليتها أم توطيتها،وأنا عالطول بحطت بنزين 92 والمكانيكى فى اخر زيارة له علالى الكهرباء علشان بيقولى توفى معاك فى الاستهلاك بس لاقيت فى تسقيفه فى الماتور ولازم احرق اوى على الغيار علشان تتمنع.
وألف مليون مبروك لمصر............:rolleyes2:
ألف مبروك يا باشا
بص لف الاسبراتير سنة يمين بس امسك من عند الالمونيوم اللى فى الجنب دى متلفش من الغطا عشان ميتكسرش وتبقى مشكلة
لف سنة صغيره يعنى حوالى 3 -5 مللى بالظبط مع عقارب الساعه (والعربية مطفية عشان متصعقش)
http://t1.gstatic.com/images?q=tbn:G...istributor.jpg
تعلية = تقديم ودة المصطلح الأصح لأنك بتقدم ميعاد الشرارة
توطيه = تأخير ودة برضة الصح لأنك بتأخر ميعاد الشرارة
التصقيف حله تأخير الكهرباء شوية لأنة شكلة قدمها زيادة عن اللزوم
شوف دور العربية ولف الاسبراتير سنه يمين اكنك بتربط مسمار كل سنة حوالى 2مم وزود للمكنة وشوف لحد متح ان المكنة نعمت معاك والله اعلم
بالفعل أنا أخرت شرارة الاشتعال سنه يمين اكتشفت ان صوت المكنه وطى شويه والتسقيفه منعت،بس نفسى اعرف ده ايه علاقته لما تكون العربيه تعلى الكهرباء فيها بيأثر على استهلاك البنزين أزاى من الناحيه العلمية،علشان الميكانيكى هو الى على الكهرباء.
هى عربيتك نوعها ايه؟
سوزوكى سويفت
يا جماعة انا عندى مشكلة مش عارف زى دى ولا لأ . انا عندى العربية بتعمل صوت خروشة كدة يشبة بصيت صوت التسقيف بس متواصل لو دوست بنزين جامد وانا ماشى فى اول الغيار وبيروح بعد مالعربية سرعنها تعلى وبيبان اوى لما اجيب الخامس وانا على سرعة 80 بس لو فضل ماشى على الرابع لحد 110 ميعملش الصوت دة .انا عربيتى اونو موديل 93
أيوا ده نفس العيب بس انا مش عارف عربيتك فيها إسبراتير عادي ولا لأ
لو فيها يبقى توطي الكهرباء منه لكن لو إشعال إلكتروني يبقى مش هتعرف توطي الكهرباء ولا تعليها ساعتها بقى تغير البوجيهات وفلتر الهواء وتحط بنزين أوكتان أعلى من اللي إنت بتحطه
يعني لو بتحط 80 تحط 90 ولو بتحط 90 حط 92 هتلاقي التسقيف ده راح إن شاء الله
وبالنسب للتفسير العلمي للأخ anwarnono
ببساطة كدة لما الكهرباء بتكون عالية أو بعنى أصح مقدمة بيكون توقيت شرارة الإشتعال بدري قوي قبل مايكون البستم طلع لأعلى نقطة في الشوط بتاعة فبيحصل الإنفجار وبيولد طاقة بتحاول تدفع البستم لأسفل ولكن البستم لازم يكمل مشوارة لحد فوق وبعدين يبتدي ينزل فبينتج تضارب بين قوة الإنفجار وقوة دفع البستم لأعلى ودة اللي بيطلع صوت التسقيف
وبعد مالبستم يخلص مشوارة لفوق يبتدي ينزل تاني مدفوع ببقايا قوة الدفع التولدة من الإنفجار
وبالتالي بيكون في جزء كبير من الطاقة فقد في الخناقة اللي كانت حاصلة بين البستم وهو طالع والطاقة اللي بتزقه لتحت يبقى بنزين إتحرق وجزء كبير منه راح على الفاضي!
وبكدة يبقى البنزين بيتحرق على الفاضي والعزم بيروح في الخناقة
ههههههه
ياباشا مهو التأخير زيادة بردة مش كويس، هو طبعا مالوش ضرر على الموتور زي التقديم
بس بيخلي الشرارة تنطلق بعد ميكون البستم طلع للأخر ونزل شوية كمان فبكدة بتكون نسبة إنضغاط خليط البنزين والهواء اللي في الغرفة قلت فلما يحصل الإنفجار بتكون الطاقة اللي ناتجة عنه أقل من الطاقة الناتجة عن إنفجار نفس الكمية بس بمعدل إنضغاط أعلى يعني لما يكون البستم مقفول على الأخر فبالتالي مش بناخد العزم الكامل للموتور طبعا ده عيبه الوحيد إننا مش بنستفيد الإستفادة القصوى من الوقود اللي بيتحرق
فا الأفضل إننا ولا نقدم ولا نأخر نحاول على قد مانقدر نخليها مزبوطة
واغلب الميكانيكية بيقدمو لحد ما العربية تسقف وبعدين يوطي سنة سنة لحد مالتسقيف يروح لما يدوس بنزين مرة واحدة والعربية واقفة ماتسقفش يبقى تمام
السلام عليكم ورحمه الله وبركاته
انا امبارح كنت عند الميكانيكى قالى عربيتك بتصقف اخبرته انى معرفش يعنى ايه بتسقف اللى اخبرته انى بضع وقود 80 وصاحبها اللى اشتريتها منه كان بيضع 90
قال لى هضبته لك طبعا غيرت طقم كهرباء كامل بوجيهات وبالاتين زكوندنسر وعمل مثلما احد الاعضاء قال لى فضل يلف الاسبراتير يمين سنه سنه مع الضغط على الوقود حتى صوت الموتور اصبح اقل صوتا من زى قبل
والعربيه حسيت بعدها انها عايزة طريق تطير فيه والعربيه بدور من اول تكه بدون زواده بنزين
لكن مشكلتى هى انى لما بكون فى طريق مزدحم جدا والعربيه بتمشى ببط جد وطبعا العربيه فى الاماكن المزدححمه بتسخن ساعات لما بشيل رجلى من على الدبرياش بتبطل وارجل اودورها وامشى
مش عارف ده سببه ايه هل هى نتيجه سخونه السيارة التى بسبب وقوفها فى الاماكن المزدحمة مع المشى ببط ولا الكهرباء العاليه بالسيارة
شكرا لكل الاعضاء
هو تقريبا الميكانيكى وطى لك الكهرباء اوى فالسلانسيه بقى واطىاقتباس:
العربيه فى الاماكن المزدححمه بتسخن ساعات لما بشيل رجلى من على الدبرياش بتبطل وارجل اودورها وامشى
ممكن تعليها بنزين ( تظبط مسمار البنزين اللى في الكاربرتير ومش هتبطل منك )
شكرا للساده الاعضاء
بالنسبه لللاخ عمر السقا قال
هو تقريبا الميكانيكى وطى لك الكهرباء اوى فالسلانسيه بقى واطى
والاخ ميدو قال
هو كل العملو الميكانيكى انو زودلك كهربة المحرك ودة بيسخن العربية لكن مميزاتة كلها بتظهر فى السلانسية وعيوبة بتظهر مع السخونية
الان اصبح عندى مشكله هل شغل الميكانيكى فى سيارتى هو على الكهرباء ولا وطى الكهرباء لان اصبح عندى رائيان مختلفان
بالنسبه للاستهلاك الوقود فى بدايه انطلاق الشرارة مع خروج البستم ثم الإنفجار بتكون الطاقة هل هو استهلاك وقود وقتى ولا هو استهلاك وقود دائم مع تشغيل المحرك
ولو ممكن مثال بالبلدى ازاى افرق بين الاصوات الخاصه بالموتور لاعرف انه ده صوت تسقيف الموتور لانى اللى اعرفه ان الموتور لما يعلى بيخبرنى انه عايز الغيار الاعلى اكثر من كده معرفش
شكرا لمعلوماتكم القيمة
انا متابع باهتمام الموضوع دة
انا عربيتى 127 و لسة مركبلها ابلاتين و كوندنسر انا الى مركبهم بايدى شيلت دة و حطيط دة فهل فى مشكلة؟
هل احتاج انى ازبط الاسبراتير؟
و ازبطة ازاى بالظبط
و ياريت حد يوضحلى صوت التسقيف دة شوية و شكرا يا رجالة
صوت التسقيف اللى هو لو انت ماشى على الرابع مثلا وهديت بالعربية لحد سرعة 25 مثلا
ودست بنزين فجأة من غير ما تديها التالت او التانى هتسمع صوت في الماتور ( تكتكتكتكتككتتكتك )
وهو نفس الصوت لو نقلت بدرى
هو ده التسقيف
لو انت ماشى على غيار اعلى من سرعته ده طبيعى انما لو بتسمعه على طول يبقى تظبط الكهربا
لو عايز تظبط الاسبراتير
علي الكهربا ( لف الاسبراتير كأنك بتفتح حنفية مية ) و بعدين دوس بنزين هتسمع التسقيف
وبعدين وطى واحدة واحدة ( حرك الاسبراتير كانك بتقفل حنفية مية )
لحد ما الصوت يروح وسيبه على كدة
اتمنى اكون افدتك
أحب ازود على كلام ا/ عمرو السقا
ان التقديم او التاخير والعربية مطفية عشان لو حد اتكهرب ميرجعش يقول انتوا السبب
الف شكر يا رجالة تعبينكو معانا :)
ياجماعة انا ملا حظ انك لما تعلى الكهربا الموتور العربية بتجرى اسرع عن الظبط العاادى
منتا يا باشا لما بتعليها من الاسبراتير زيادة العربية بتسقف!
ولا اية يا شباب؟
انت بتعليها اخر المسموح و الى المتور يقدر عليه يبقى دة التمام و الطبيعى بتاع العربية يبقى كدة تمام جدا!
و ممكن توطيها شوية و هتمشى برضة و مش هتسقف!
بس السحب هيبقى تعبان!
لازم تكون العربيه دايره ياباشا عشان يسمعها ويزود بايده من الواير بتاع الاكسراتير بدل مايقعد يطفى ويدور ويدخل ويزود من العربيه ويطلع ويسمع تانى ويرجع يعيد نفس الكرهاقتباس:
(والعربية مطفية عشان متصعقش)
مالراجل كدة هيتكهرب يا باشا :)
ولا اية؟
انا جربتها و متكهربتش :) بس كنت ماسكة بفوطة :)
على فكرة يجماعه انا من ساعه ماعليت الموتور وظبته على وقود 80 السيارة اختلفت السيارة معى فى السحب وفى معدل الوقود من 170 كيلو فى الصفيحة الى 185 كيلو فى الصفيحة
ريجاتا من الكيلو 28 الى داخل المدينه
يعنى تقدر تقول جوة البلد
مش عارف ده كويس المعدل ده ولا لا
السلام عليكم
كلامكم رائع وكان عندى استفسار الام بي ثري الولاعه شغال والعربية واقفه ولكن لما بدورها او انقل او مطب بيفصل روحت للكهربائي كذا مرة قالى غير الام بي ثري غيرته 3 مرات وبرده نفس المشكله واخر مره قالى كهربة العربية عاليه ومش هيظبط معاك هات mp4 ووصله مع شريط الام بي ثري مارايكم وهل كهربة العربية توطى شوية وتتظبط الولاعه ولا فيها مشكله