هدخل فى الموضوع على طول من غير مقدمات
امبارح باليل كنت فى كارفور المعادى أنا وزوجتى وإبنى عمر بنشترى حاجات للبيت كالمعتاد وركنت العربيه فى الباركنج العلوى فى كارفور والمكان هناك واسع جدا وحتى فى حاله الزحام تقدر تركن عربيتك واللى جنبك يركن ويكون فى مسافه مقبوله بين اللى على يميينك واللى على شمالك ودة طبعا لأن فى علامات على الارض محددة بتحدد المكان .
المهم خلصنا اللف والشراء وخرجنا للعربيه والمفاجأة الاقى واحد راكن على شمالى وتقريبا المسافه بينى وبينه لا تتعدى 30 سم ( أيوة فعلا مش غلطه كتابه ) وكمان هو راكن من ناحيه الباب بتاعى وطبعا مش عارف هو نزل ازاى !!!
وطبعا انا يمينى كان فى عربيه كبيرة تقريبا نقل وكمان قافل عليا بس المسافه بينى وبينه افضل حالا من التانى تقريبا حوالى 75 سم ودة اعتمادا منه على ان انا المفروض شمالى واسع والمحصله النهائيه انى قعدت واقف حوالى ربع ساعه مش عارف امشى ومش عارف اركب عربيتى وفى الحقيقه انا كنت فى قمه الغضب والنرفزة من صاحب العربيه اللى على شمالى اللى عمل الحكايه دى كلها ومش عارف لو شفته كنت ممكن اعمل ايه ؟؟؟؟؟؟
طبعا كنت بحاول افتح الباب ادخل بأى طريق من اليمين طبعا لأن الشمال مفيش منه فايدة .
ولكن الحمد لله لاقيت واحد جاى جنبى عند العربيه النقل وشاف طبعا المنظر وانى مش عارف اركب عربيتى واعتذر لى وقالى انه ساعه ما ركن العربيه النقل كان شمالى انا فاضى وانه اعتمد على دة ،
صدقونى انا مش عارف ازاى هديت ما انفعلتش نهائيا مع سواق النقل وشكرته والراجل مشى ووسع لى وركبت عربيتى ولكن ! كنت لسه متنرفز من الاخ التانى صاحب المشكله وفكرت كتير اعمل له ايه اكتب له ورقه واشتم شتايم محترمه !
لكن لاقيت نفسى بكتب الاتى ( من فضلك حاول تركن عربيتك المرة الجايه بطريقه افضل من كدة حرصا عليها وعلى عربيات الغير من أى ضرر وكمان علشان متعطلش حد بسببك وشكرا لسعه صدرك ) وقمت حاطط الورقه دى على المساحات بتاعه عربيته ومشيت .
الخلاصه :
- حاولت للحظات انى اتمالك اعصابى واحط نفسى مكان الراجل دة انى لو جيت ولاقيت حد سايب لى ورقه وبيشتمنى فيها كان هيبقى ايه رد فعلى فحسيت ان دى حاجه صعبه جدا وعلشان كدة كان قرارى انى اكتبله الفت نظرة وبدون أى غلط ، يعنى لو كل واحد فينا فكر للحظات قبل ما يغلط فى أى حد أكيد رد فعله هيكون مختلف
- معظمنا واخد فكرة عن سواقين النقل انهم مش ولابد ولكن اكيد فيهم ناس محترمه مع العلم ان سواق النقل اللى كان راكن على يمينى دى اكيد مندوب شركه او ما الى ذلك فأكيد شاب متعلم وطبعا نظرا لظروف العمل فى البلد كان مضطريشتغل سواق .
يعنى دايما منحاولش ناحد بالظاهر لأن دايما المظاهر خداعه
-اخر حاجه رجاء خاص من كل واحد فينا عندما تركن سيارتك فى أى مكان فكر قبل ما تمشى انت بركنتك دى هل معطل اى حد او ممكن تأذى أى حد , أكيد هتفرق كتير لو فكرنا بالطريق دى وبايجابيه يمكن يكون فى أمل فى الاصلاح .
اسف على الاطاله وتقبلوا تحياتى ،،،،
المفضلات