أسئلة عن سيفيك 1993 من واحد مبتدئ

**marsguy** · 22-12-2007 09:16 PM

السلام عليكم ورحمة الله وبركاته،،،

أنا ربنا رزقني بهوندا Si موديل 1993

وأتشرف بوجودي معاكم في منتدى الهوندا

أنا لي كام سؤال، حيث إن دية أول عربية أشتريها وطبعاً أنا معلوماتي في الميكانيكا ضعيفة شويتين

أنا عندي مؤشر الحرارة بيكون عند النص بالظبط لما العربية بتكون ماشية (بعد التسخين يعني) فهل ده وضع طبيعي ولا لأ؟ ولو كدة درجة الحرارة عاليةـ تنصحوني بإيه عشان أظبطها؟

عندي صوت ضوضاء مستمرة كدة والعربية ماشية، بيجي من ناحية تحت العربية من قدام كدة، صديقي قال لي ده رولمان بلي، أعمل إيه في الموضوع ده؟ ومين هايصلحه وهايتكلف قد إيه تقريباً؟

عاوز أنضف الشنطة، أركب موكيت جديد وكدة، هل تنصحوني بسروجي كويس؟ وهايتكلف كام تقريباً الموضوع ده؟

عاوز أنضف الموتور من بره عشان شكله مش نضيف خالص، بس قالولي بلاش تنضفه بمية عشان ممكن حاجة في الكهرباء تبوظ، هل الكلام ده صحيح؟ ولو صحيح أنضفه أزاي وفين؟

جزاكم الله خيراً

**marsguy** · 25-12-2007 10:58 PM

هو أنا أسئلتي عويصه أوي كده يا جماعه ولا إيه؟

عامة، أنا لسة جاي من عند الميكانيكي اللي إسمه مسعد (هو شريك عدلي على فكره) وهو يمكن أحسن ميكانيكي هوندا في مصر وبييفهم كويس جداً في العفشة كمان.

أنا سألته الأسئلة اللي أنا سألتها فوق دية وحبيت أقولكم على إجاباتها عشان الكل يستفيد

بالنسبه لمؤشر الحرارة: هو قاللي إن ده عادي
بالنسبه لصوت الضوضاء: غيرنا الجوان الخارجي بتاع الكبالن والصوت قل شوية، بس لسه برضه في صوت عشان الكاوتش حالته صعبة جداً أوي وفيه حتت منبعجه.
نضفنا دورة البنزين وغيرنا فلتر البنزين والسحب وصوت الموتور بقوا أحسن كتير

**driftracer11** · 02-01-2008 12:12 AM

هى الهوندا 93 تعملها كام؟

**marsguy** · 03-01-2008 09:09 AM

السلام عليكم ورحمة الله وبركاته،،،

الهوندا سيفيك 93 في منها 3 موديلات منتشرين في مصر

El ودية أقل واحده، فيها تكييف وباور وموتورها 1500 كاربراتير و90% منها بيكون مانوال.
Ex ودية اللي في النص، فيها تكييف وباور ومرايات كهرباء وrpm و 80% منها بيكون أوتوماتيك وموتورها 1500 كاربراتير.
Si وديه أعلى واحده، جميع الكماليات وفتحة سقف كهرباء وموتور 1600 إنجكشن 130 حصان ودية برضه الغالب منها أوتوماتيك.

الـ El الكويسه تعملها 46 وإنت طالع
الـ Ex الكويسه تعملها 50 وإنت طالع
الـ Si الكويسه تعملها 53 وإنت طالع