إحترام وثقة
احترام من الشركة لعملائها سوف تجني ثقة أكبر من العميل
أعتقد إن المبالغ الطائلة اللي خسرتها تويوتا دي مش هتكون خساير قد ما هتكون استثمار في بناء الثقة و الإحترام بين الشركة و عملائها . . أقصد إنك كمان سنتين ثلاثة هتشتري التويوتا و انت واثق انهم مش بيسمحوا بالأخطاء دي في عربياتهم و كمان حتى لو خرجت من عندهم عربيات فيها عيوب فهما مش بيسيبوها فلا شماتة ولا مقاطعة لمنتجاتها بالعكس احترام و تقدير لشركة اعترفت بأخطائها و عالجتها على حساب سمعتها اللي بتبني فيها بقالها سنين فتحياتي و تقديري لشركة احترمت عميلها قبل أرباحها...
ده غير انهم بيقدروا حياة البشر ويمكن احنا اللي مش متعودين على كده .. وده بيفكرني بالميكروباص التويوتا الجديد أول ما نزل. الميكروباص ده موتوره قدام غير الميكروباص القديم اللي كان موتوره تحت الكرسيين اللي قدام وموضوع ان الموتور يكون قدام كان فيها نوع من الأمان علشان وقت الحوادث لا قدر الله يستقبل هو الصدمة قبل الركاب .. الميكروباص ده قعد فترة الناس هنا رافضاه و مش بتشتريه لأن الخبطة بتبقى في الموتور وطبعاً صاحب الميكروباص يهمه الموتور قبل حياة الناس يمكن ده بس الفرق بين الطريقة اللي بنفكر بيها و الطريقة اللي هما بيفكروا بيها..
وانا مش بدافع لأني عندي تويوتا ولا بمت بأي صلة ليهم لكني فعلاً إحترمتهم جداً و بتعجب من الناس اللي بيلوموا على من اعترف بخطأه و يمدحوا فيمن زين أخطاء وعيوب منتجه لتظهر وكأنها كماليات.